Sondaı-aq shahar ortalyǵyndaǵy Qaırat Rysqulbekov saıabaǵyn jáne Baýyrjan Momyshuly atyndaǵy «Jeńis» saıabaǵyn qaıta jańǵyrtý jumystary bastaldy. Deı turǵanmen Áýlıeata áleýmetiniń jıi kóterip júrgen, sheshimin tapsa degen máseleleri de jeterlik.
Elbasy usynǵan «100 naqty qadam» Ult josparyna sáıkes, barlyq deńgeıde qoǵamdyq keńester qurylǵan edi. Atalǵan keńestiń qoǵamdaǵy máselelerdi jergilikti atqarýshy bılikke jetkizip, máselelerdiń sheshilýine oń yqpal jasaıtyny belgili. Osy oraıda Jambyl oblysynyń ákimi Asqar Myrzahmetovtiń qoǵamdyq keńes múshelerimen kezdesýi barysynda óńir damýyna qatysty birqatar máseleler aıtyldy.
Ákim áýeli oblys ortalyǵyndaǵy «Tarazenergoortalyǵy» AQ-tyń búgingi jaı-kúıin áńgimeledi. Qazirgi tańda atalǵan ortalyqtyń tolyq qýaty paıdalanylmaı otyr. Ári bul mekeme jekeshelendirý tiziminde tur. Bul másele de turǵyndardy oılandyrmaı qoımaıdy. Oblystyq qoǵamdyq keńestiń múshesi Qaırat Shotbaqovtyń aıtýynsha, ınvestorlardy tarta otyryp ortalyqty jańǵyrtý mańyzdy. О́z sózinde ákim eger bul ortalyq jekege ótken jaǵdaıda salynǵan ınvestısııany óteý úshin olar tarıfti kóteretinin aıtty. Bul qarapaıym halyqtyń qaltasyna salmaq túsiredi. Sondyqtan másele eki tarapqa da tıimdi bolyp sheshilýi kerek.
Búginde Jambyl oblysynda shıkizat kólemin ulǵaıtý, qant óndirisin arttyrý da úlken másele bolyp otyr. Bul oraıda aımaqta gıdromelıorasııa júıesin jańartýda eski toǵandardy qalpyna keltirý jáne sýarmaly jerlerdiń kólemin jańa tehnologııanyń kómegimen ulǵaıtýdyń mańyzdylyǵyn ákim atap ótti. Budan bólek jambyldyq jas daryndardy qoldaý maqsatynda taǵy bir «Daryn» mektebin ashý máselesi kóterilip, «Taraz-Arena» sport kesheniniń artyqshylyqtaryn paıdalaný jaıy sóz boldy. Biraq ashylýy tıis «Daryn» mektep-ınternaty Taraz shaharynda emes, aýyldyq jerlerde ashylýy múmkin. Eger oblystyq bilim basqarmasyna tapsyrylǵan is aıaǵyna deıin jetetin bolsa, aýyl balalarynyń da daryndy balalarǵa arnalǵan mektep-ınternatta bilim alatyn kúni alys emes.
Memlekettik qyzmetke kelgen jas mamandarǵa qoldaý kórsetý de aıtarlyqtaı mańyzǵa ıe. Keshe ǵana joǵary oqý ornyn bitirip kelgen jas maman jaǵdaıynyń turaqty bolmaıtyny belgili. Asqar Myrzahmetov óńirge «Jastar tájirıbesi» arqyly kelgen jas mamandardyń aılyǵy jergilikti bıýdjet esebinen qarastyrylǵanyn, biraq esepti merzim aıaqtalǵanda tıisti basshylarǵa sol jastardy jumysqa qabyldaýdy mindetteý artyq bolmaıtynyn jetkizdi. Máselen, jyl saıyn Jambyl oblysynyń ózinde júzdegen jas maman joǵary oqý oryndaryn qyzyl dıplommen bitiredi. Olardyń bárine birdeı jumys tabyla bermeıdi. Osy turǵydan alǵanda bilimdi jastardyń bilimin aımaq ekonomıkasyn ilgeriletýge paıdalaný kerektigi de sóz boldy.
Qaharyna mingen qys mezgili ótip, kóktem kelip qaldy. Bul tirshiliktiń qaıtadan túrlenip, qarbalastyń qyzatyn shaǵy. Biraq óńirde egis naýqanyna qajetti tehnıka jetispeıdi. Máselen, Baızaq aýdanyndaǵy «Talap» sharýa qojalyǵynyń jetekshisi Maýyt Fazýlov bıyl aýdan sharýalary 2 myń 300 gektar jerge qyzylsha ósirýdi josparlap otyrǵanyn aıtty. Aıta keteıik, jalpy oblys boıynsha bolashaqta tátti túbir ósirýdi 11 myń gektarǵa jetkizý josparlanýda. Biraq tehnıkamen qamtý máselesi sharýalar úshin ózekti bolyp tur. Oblystyq aýyl sharýashylyǵy basqarmasyna osy máseleni kúzge deıin sheshý tapsyryldy.
Búgingi tańda kásipkerlikti damytýǵa mańyz berilip otyrǵany belgili. Árbir azamat kásip ashý arqyly adamdardy jumyspen qamtyp, óńir ekonomıkasyn damytýǵa úles qosqany jaqsy. Biraq Áýlıeata óńirinde kásip ashqan keıbir azamattardyń salyq tóleýden jaltaryp júrgeni shyndyq bolyp tur. Mysaly, osy ýaqytqa deıin Taraz qalasynyń «Aýyl-Bereke» bazaryndaǵy saýdagerler zań talaptaryn oryndamaı kele jatyr. «Ánel» saýda kesheniniń dırektory Ábdirahym Edigeevtiń aıtýynsha, «QazTransGazAımaq» AQ-tyń Jambyl oblystyq fılıaly turǵyndarǵa usynatyn qyzmetiniń qunyn 30 paıyzǵa kóterip jiberipti. О́tken jyly Astana qalalyq soty atalǵan mekemeniń isin qarap, aksıonerlik qoǵamnyń 9 oblystyń turǵyndarynan negizsiz alǵan aqshasyn ózderine qaıtadan qaıtaryp berý týraly sheshim shyǵarǵan. Onyń ishinde Jambyl oblysy da bar. Alaıda olar sottyń sheshimi shyqsa da qarjyny áli kúnge deıin qaıtarmaı otyr.
Iá, másele tek aıtýmen ǵana sheshilmeıdi. Jambylda budan ózge de sheshimin kútken másele kóp. Osy ýaqytqa deıin talaı usynystar aıtylǵan. Aldaǵy ýaqytta tıisti mekemeler ózderine júktelgen jaýapkershilikti tolyǵymen sezinip, sheshim qabyldaı alsa, naqty nátıje de bolar edi.
Hamıt ESAMAN,
«Egemen Qazaqstan»
Jambyl oblysy
