Sońǵy kúnderi Aq Jaıyq óńirinde tabıǵat tosyn minezin kórsetip tur: naýryz aıynda Batys Qazaqstan oblysynda respýblıkalyq jáne jergilikti mańyzy bar avtojoldar burqasynǵa jáne kóktaıǵaqqa baılanysty birneshe ret jabyldy. Tipti naýryzdyń 24-25-i kúni soqqan borannan Qaztalov aýdanynyń eldi mekenderinde jol qatynasy kidirip, Oral qalasynan arnaıy ınjenerlik tehnıka kómekke barǵan.
– Sońǵy borannan Qaztalov aýdanynda 12 eldi mekenniń joly jabylyp qaldy. Aýdan basshylary kómek suraǵan soń Qaztalov jáne Tasqala aýdanyna arnaıy tehnıkalar jiberdik. Dál qazir Taldyqudyq pen Bolashaq aýylynan basqa jerde jol qatynasy qalpyna keltirildi, – deıdi Batys Qazaqstan oblystyq tótenshe jaǵdaılar departamenti basshysynyń orynbasary Aqylbek Ahmetjanov.
Naýryzdyń 25-i kúni Batys Qazaqstan oblysynyń ákimi Altaı Kólginov barlyq aýdan jáne tótenshe jaǵdaı qyzmeti basshylarymen kóktemgi sý tasqynynyń aldyn alý boıynsha qurylǵan shtab májilisin ótkizdi. О́ńir basshysynyń buıryǵymen 26 naýryzdan bastap Batys Qazaqstan oblysynda azamattyq qorǵanys mekeme-uıymdary eń joǵarǵy daıyndyq rejiminde jumys isteýge kóshti.
– Kóp jylǵy baqylaý saraptamasyna qaraǵanda kóktemgi sý tasqynynan zardap shegýi múmkin aımaqta oblys boıynsha 36 eldi meken ornalasqan. Bul jerlerde 9 myń úı bar, 36 myń adam turady. Al qala mańyndaǵy saıajaılarda, ózender ańǵarynda ornalasqan 75 baý-baqsha seriktestigin 13 myń adam jyl boıy meken etedi. Bulardyń 4 myńy – balalar. Biz bıylǵy sý tasqynyn tosyn shyǵynsyz ótkizýge barlyq kúsh-jigerimizdi salyp jatyrmyz, – deıdi Aqylbek Qosmanuly.
«Qazgıdromet» RMK Batys Qazaqstan oblystyq fılıalynyń dırektory Nurjan Shııaptyń aıtýynsha, sáýir aıynan bastap aýa temperatýrasy túnde de jylyna bastaıdy. Birinshi onkúndikte jylylyq +12 gradýsqa jetse, ekinshi onkúndikte +20 gradýsqa deıin kóterilýi múmkin. Jerdegi tońnyń qalyńdyǵy ońtústik aýdandarda juqaryp keledi eken. Biraq Darııan aýyly tusynda toń qabaty 115-ten 119 santımetrge qalyńdaǵany baıqalǵan. Jalpy, oblystyń soltústik óńirinde, Oral qalasy mańynda toń áli qalyń. «Tasqyn qaýpi bar, turǵyndarǵa biz ony ashyq aıtyp otyrmyz», deıdi Nurjan Aıtmaǵanbetuly.
Aýa raıyn boljaýshylar Jaıyq ózeniniń muzy 8-13 sáýir aralyǵynda buzylyp, seń júredi dep otyr. Basqa da shaǵyn ózenderdiń muzy, ásirese seń jınalyp, sý arnasy bitelip qalý qaýpi bar tustardyń muzy arnaıy aramen tilinip, keptelistiń aldyn alý jumystary júrgizilgen. Byltyr 50 myń sharshy metr muz aıdyny tilinse, bıyl onyń kólemi 209 myń sharshy metrge jetken. «Tabıǵat apatynyń aldyn alýǵa adam kúshi de, tehnıka da, qarjy da jetkilikti» dep sendiredi tótenshelikter. Laıym solaı bolsyn!
Qazbek QUTTYMURATULY,
«Egemen Qazaqstan»
Batys Qazaqstan oblysy
