Ant
Qaıyrshy tartqan sybyzǵynyń syrly sazyndaǵy, О́leń,
Shoq bulttyń úlpa úkisine qudiretti qolmen jazylǵan, О́leń,
Jasynnyń júzinen jap-jasyl nur bop taraǵan, О́leń,
Aı astynda jaly burqyrap jortqan abadan, О́leń,
Aq súti syzdatqan Ana omyraýynyń yrysty úrpisindegi, О́leń,
Shalyqtap jatqan sábıdiń jumaq lebindeı kúlkisindegi, О́leń,
Juldyz kózinde,
Bulaq úninde,
Japyraq sybyryndaǵy, О́leń,
Arý anarynda,
Jupar atqan sulý burymyndaǵy, О́leń,
Jer qazanynda,
Aspannyń adal ýysyndaǵy, О́leń,
Shamyrqanǵan Táńirdiń kıeli, tylsym tynysyndaǵy, О́leń,
Tereńde tebindep,
Bıikte jaratylǵan, О́leń,
Patsha tájine sańǵyǵan qustyń qanatyndaǵy, О́leń,
О́mirdeı aýyr,
Ajaldaı asqaq máńgilik, О́leń,
Jalǵyzym – О́leń,
Talqyǵa túsken taǵdyrym, О́leń,
Men seni saraı tabanyna,
Tobyr aıaǵyna tastaı almaspyn!..
Kóktem kelse …
Ustap tura almaıdy ǵoı ony aqpan,
Bulbuldary saırap atar áli aq tań.
Men kóktemniń kúnderine ǵashyqpyn,
Kókireginen sel aqqan.
Barady, áne, ýaqyt-arba yshqynyp,
Jyrlaıdy kep túsime ylǵı qus kirip.
Kóktem-qyzdyń demindeı bop tıedi,
Jyrtyq úıdi urǵan túngi úskirik.
Eseńgirep kedeıliktiń ýynan,
Jatyr jarym jas kóńili sýyǵan.
«Kóktem kelse, – uıqysyrap qoıady –
Jasyndardyń jarqylymen jylynam».
Kóktem kelse jadyrarmyz, kúlermiz,
Tánimizge jasyl japyraq ilermiz.
Teńge bıler teksiz mynaý qoǵamda,
Tas ǵasyrdyń adamyndaı júrermiz.
Ketetindeı uly aqyny adasyp,
Barlyq shyraq turar bizge jol ashyp.
Sup-sýyq sol terezeler tamsanyp,
Seniń mármár omyraýyńa qarasyn.
Gýleser jurt «jer» ǵyp jáne «aspan» ǵyp,
Aıqaılaıdy Alataýdy basqan bult.
Erkin ómir súrgenimiz úshin de,
Myń rahmet, O, kıeli Bostandyq!
Kóktem kelse…
Tolqyn
(Tolqyn Aqanulyna)
Atyń da – Tolqyn,
Zatyń da tolqyn jarǵa urǵan,
Qaısar bop óstiń qaımyqpaı qatal taǵdyrdan.
Atajurtyńdy ańsaǵan uldyń biri ediń,
Asqaqtap seniń Alataý shyqty aldyńnan.
Jyr bolyp aǵyp Maılynyń apaı tósinen,
Án bolyp estiń Jaıyrdyń qońyr keshinen.
Sarnatyp jettiń saǵynysh atty qobyzdy,
Aldyńda seniń Sararqa jatty kósilgen.
Alty alashyńa «Qazaq elińdi» al tyńdat!
Maxabbat rýxy boıyńnan qalaı sarqylmaq.
Esińde – Esil, keýdeńde Balqash shaıqalyp,
Kózińde turdy aq aıdyn Kaspıı tolqyndap...
Aspanmen astas asqarly erdiń qııaly,
Qulystaı – keýdeń,
Ulystaı dosyń sııady.
Jalǵyz atyn da jaıaýǵa túsip beretin,
О́zińdeı me eken jomarttyń sońǵy tuıaǵy.
Táńirden násip – azamat boldyń tulǵaly,
Janyń da jaısań,
Syryń da tereń jylǵaly.
Dertin de emder, órtin de emder pendeniń,
О́zińdeı me eken Ibn Sınanyń barlyq
uldary...
Shanaqtan shalqyp, sharq uryp ketti kúı-kóńil,
Sazyna eltip, san yrǵaq taýyp bıle, ómir!
Basyńda seniń jyǵa bop tursyn jyǵylmas,
Ultanyń bolsyn óz topyraǵyn óle súıgen ul!
Turady bir sóz
Taýsylyp túger bir ómirdiń sońǵy tusynda,
О́sıetimdeı kóringen –
Turady bir sóz tilimniń ǵana ushynda,
Aıta alman qazir ony men.
Sol sózdi týǵan dalamnan uqtym keshe men,
Aljyǵan oıǵa es bitti!
Aýyrlap baryp qara jerge baýyryn tósegen
Qobyzdyń úni estirtti.
Kóne bir eles janymdy qansha jyltady?!
Ińkármin, áıteý, men oǵan.
Estidim ony tuıaǵynan ushqan tulpardyń
Mújilip bitken taǵadan.
Sol sózdi ana – aspannan uqtym taǵy men,
Juldyzy synyq, kúni ólgen.
Sol sózdi ana – bulttardan uqtym taǵy men
Shashtaryn jaıyp jibergen.
Áýendi aýlap jol shektim azap ishinde,
Qalǵany múldem joq este.
Sol sózdi –
Meniń beıýaqta kórgen túsimde
Shyryldap aıtty nárestem...
Tún
Kúndi súıdim,
Súıdim men tań alaýyn,
Jaıdym soǵan janymnyń bar alabyn.
...kún batady-aý kózushy kókjıekte
bulǵap, bulǵap qan qyzyl oramalyn.
Syńsyta bir basady ánine Kesh,
Terezemdi qaǵady taǵy da eles.
Túpsiz kókten myń juldyz oıanady,
Oıanady...
Dertime dárý emes.
Qaıǵy qoly qaınatqan ýdy ishýdi,
kim buıyrdy,
Kesesin kimge usyndy?!
Qońyr úzik ińirdiń irgesinen
Kele jatyr aqyq kóz tún mysyǵy.
Tynyshtyǵyn alǵandaı tún urlatyp,
Túregeldi kóp kúdik qyryn jatyp.
Tún mysyǵy jaramdy tyrnaıdy endi,
Balapanyn janymnyń shyryldatyp.
Nege bulaı?
Ne úshin?
(suraq bular)
Áı, shamasy, óltirip biraq tynar...
Qara jaýlyq jamylǵan jalǵyzdyǵym,
Bosaǵama súıenip jylap turar.
Qanatym – tún.
Men qaıda baram ushyp?!
Oısyz tobyr júr toılap sharap iship.
Jalǵyzdyǵym moınynda – ǵalam muńy,
Al ǵalamnyń qoınynda – qara mysyq...
