Komıtet tóraǵasy Birǵanym Áıtimova «kınematograf adamgershilikke tárbıeleýdegi, qoǵamdaǵy ıdeologııalyq qundylyqtardy sińirýdegi, zerdelik jáne mádenı damýdy ilgeriletýdegi basty quraldardyń biri bolyp tabylady», dep atap ótti. B. Áıtimova sondaı-aq senatorlardyń otandyq kınematografııanyń qazirgi jaǵdaıy men ózekti máselelerin, keleshekte sapasy men ulttyq fılmderdiń básekege qabilettiligin arttyrýdy, turǵyndarǵa arnalǵan kıno kórsetý qyzmetterine qol jetkizýdi, kınoındýstrııasynyń ashyqtyǵy men tartymdylyǵyn, Qazaqstan kınosynyń shetelderdegi bedeli men tanylýyn zerdeleýge nıettenip otyrǵanyn jetkizdi.
Rejısserler, akterler men prodıýserler senatorlarǵa óz jumystarynyń erekshelikteri týraly aıtyp, kıno týraly arnaıy zań qabyldaý qajettigine qoldaý bildirdi. Atap aıtqanda, rejısser Rústem Ábdirashov ulttyq kınony qoldaý qoryn qurýdyń mańyzdylyǵyn atap ótti. Kıno prokat salasynyń mamany Baýyrjan Shókenov kınematografııa salasyn quqyqtyq retteý jáne qalalar men aýyldyq eldi mekenderde azamattardyń kıno kórsetý qyzmetine qol jetkizý múmkindikteri týraly aıtty. Rejısser-anımator Adaı Ábeldınov tárbıe quraly retinde anımasııalyq kınony damytý, al kınorejısser, «Dýblıaj» mekemesiniń basshysy Bolat Qalymbetov elimizdiń kınoteatrlaryna prokatqa keletin barlyq fılmderdi aýdarýdaǵy «Qazaqfılm» kınostýdııasynyń dýblıaj múmkindikteri týraly aıtty.
– Búgingi tańda «Qazaqfılm» kınostýdııasy – ulttyq brend ári otandyq kıno ónimderdi óndirýdegi negizgi mekeme. Biz kınematografısterdi, kıno óndirýshilerdi, prokatshylardy, dıstrıbıýtorlardy biriktire otyryp, kınoındýstrııany damytatyn ekonomıkalyq tetikterdi qalyptastyrýǵa múmkindik beretin, jaǵymdy ınvestısııalyq ahýal jasaıtyn tıisti zańdy burynnan kútip júrmiz, - dedi Sháken Aımanov atyndaǵy «Qazaqfılm» aksıonerlik qoǵamynyń prezıdenti Baqyt Qaıyrbekov.
Belgili akter ári rejısser Asanáli Áshimov «Qazaqfılm» kınostýdııasyna ulttyq kompanııanyń mártebesin berýdi usyndy. «Kınostýdııa elimizdiń kınematografısteri bas qosyp, kınony talqylaıtyn oryn bolyp tabylady. Sondyqtan kınostýdııa aýmaǵy tek memlekette ǵana bolýy kerek, jekeshelenbeýi tıis. Kınostýdııaǵa ulttyq kompanııa mártebesin qaıtarý kerek», - dedi A. Áshimov.
Pikirsaıysty senator B. Áıtimova qorytyndylady. Onyń aıtýynsha, aıtylǵan usynystar kınematografııa jáne mádenıet pen áleýmettik salany retteıtin zańdardy qaraý barysynda paıdalanylatyn bolady.
Depýtattar sapar aıasynda «Qazaqfılm» kınostýdııasyn kórip, túsirý alańdarynda boldy jáne tehnıkalyq jabdyqtarmen tanysty. Saıahat barysynda depýtattarǵa fılm túsirý úderisteriniń erekshelikteri jáne Qazaqstan óneriniń altyn qoryna engen fılmderdiń tarıhy týraly aqparat aıtyldy.
– Biz kınostýdııaǵa qazaq kınosynyń murajaıy kerektigine kýá boldyq, munda otandyq mádenıettiń jetistikteri saqtaýly tur. Biz bul týraly tıisti saýal joldaımyz, - dedi kezdesý sońynda depýtat Baqytjan Jumaǵulov.
Sol kúni Senat depýtattary Ǵabıt Músirepov atyndaǵy Qazaq memlekettik balalar jáne jasóspirimder akademııalyq teatrynyń artısterimen kezdesti. Sharaǵa Almaty qalasynyń aldyńǵy qatardaǵy teatr ujymdarynyń ókilderi qatysty.
13 sáýirde parlamentshiler Almaty qalasynyń Ortalyq memlekettik muraǵatynda bolady jáne onda zańnamaǵa muraǵat isi máseleleri boıynsha ózgerister men tolyqtyrýlar talqylanady. Sapar baǵdarlamasynda sondaı-aq Qazaq memlekettik sırkiniń, Ulttyq kitaphananyń, jáne sport nysandarynyń («Almaty Arena» kesheni men bıik taýdaǵy «Medeý» muz aıdyndary) jumystarymen tanysý bar.
