Áskerı dronnyń tilin tapqan maman

30 ret

kórsetildi

3 mın

oqý úshin

Cońǵy jyldary áskerı salada ushqyshsyz ushý apparatyn (dron) basqarý mashyǵynyń mańyzy aıryqsha artyp keledi. Qashyqtan barlaý, aqparat jınaý, jaýyngerlerdiń qaýipsizdigi men taktıkalyq ıkemdilik turǵysynan drondardy basqarýdy úırený strategııalyq múmkindikterdi de keńeıtedi. Zamanaýı sheshimderdi sheber meńgerý men tájirıbe tolystyrý maqsatynda 19-20 aqpan kúnderi elordada áskerıler arasynda AITU KazRoboDrone 3.0 halyqaralyq dron-reısıng jáne avıamodeldeý jarysy uıymdastyryldy, dep jazady Egemen.kz.

Dana MYRZAQADIR

Foto: gov.kz

Astana IT University bazasynda ótken áskerıler básekesinde óńirler men shetelden jetken 120-dan astam qatysýshy bas qosyp, olardyń ishinde 20-sy dron dodasynda sheberlik baıqasty. Olar ózderi basqaratyn qurylǵyny trassadan ótý jyldamdyǵy, manevr jasaý dáldigi men ushý sheberligi talaptary boıynsha synap kórdi.

Halyqaralyq jarysta el namysyn qorǵaǵandar arasynda Ishki ister mınıstrligi Ulttyq ulannyń «Burkit Team» sport komandasynyń múshesi Bekzat ta bar. «SABR» laqap atyn ıelengen áskerı qyzmetshi bedeli bıik básekede el áskerı júıesinde FPV drondy basqarý dáldigi tereń ıgerilip jatqanyn dáleldep, júldeli úshinshi oryndy ıelendi. Júldeger bizge jarysqa qalaı daıyndalǵanyn aıtyp berdi.

«Bul jarysqa daıyndyq qysqa merzimde ótti. О́zim osy FPV drondaryn basqarý daǵdymdy ASHYQ ASPAN FOUNDATION ǵylymı qorynda basshylyqtyń qoldaýymen 2 aptalyq kýrsta shyńdaı tústim. Araǵa bir aı salyp alǵashqy jarysyma qatysyp, júldeli oryndy ıelendim. Asylynda, vıdeograftardyń dronyn basqarý ońaı. Al arnaıy maqsattaǵy drondar birshama eptilik pen izdenýdi qajet etedi. Jarys barysynda tizgindegen FPV drondaryn 1 jarym aı kóleminde yrqyma kóndirdim», deıdi «Burkit Team» sport komandasynyń múshesi.

Arnaıy jasaq jaýyngeri: Qazaqstan áskerı qurylymynyń daıyndyǵy joǵary deńgeıde ekenin dáleldedik

Saladaǵy jańashyldyqtarǵa tez daǵdylanǵan maman dron tilin tabý úshin eń aldymen, qyzyǵýshylyq pen talmaı izdený qajet ekenin tilge tıek etip, jarys barysyndaǵy táýekeldi tustardy da atap ótti.

«Jarys jolynda arnaıy ornatylǵan túrli kedergilerdiń dál ishinen jyldam, soqtyqpaı ótý kerek ári dron jyldamdyǵy ýaqyt kórsetkishi boıynsha tirkelip otyrady. Jarys barysynda túrli qıyndyqtar men kedergiler kezdesedi. Naqty aıtsam dron men kózildiriktiń baılanysy úzilip, beıne kórinbeı ketýi múmkin jáne kedergilerden ótý kezinde burylystardyń jaqyn bolýy da yńǵaısyzdyq týdyrdy. Dese de mundaı máselelerdi eńserip, júldegerler qatarynan tabylǵanyma qýanyshtymyn», dedi ol.