Alvares jekpe-jekten nege bas tartty?

Daýdyń basy – «ýlanǵan» et

Alvaresti qorǵaýshylardyń resmı nusqasy boıynsha, tyıym salynǵan dári boksshynyń aǵzasyna etpen taraǵan. Buǵan komıssııa músheleri sene me, sengen kúnniń ózinde boksshyny keshire me? Kóktemniń eń negizgi jekpe-jegi dál osy «ýlanǵan» ettiń sebebinen ótpeıtin boldy. Tarıhqa kóz júgirtsek, klenbýterolmen ustalǵan boksshylardyń aqtalyp shyqqandary da bar. Máselen, 2016 jyly mek­sı­ka­lyq álem chempıony Fran­sısko Vargastyń Orlando Sa­lı­do­men jekpe-jegi aldynda klenbý­terolǵa tapsyrǵan testi oń ná­tıje kórsetken. Ol kezde de sport­shynyń qorǵaýshylary «ýlan­ǵan» etti alǵa tartyp, bul is­te jeńiske jetken. Aıqas belgi­lengen kúni ótip, teń nátıjemen aıaqtalǵan edi.

Golovkınniń komandasy Al­varestiń etke qatysty aqtalý­laryna asa sene bermeıdi. Ol qarsylasyn ótirikti anyq­taı­tyn detektorda tekserip kó­rýdi usyndy. «Olar bárine meksıkalyq et kináli dep otyr ma? Munyń bári syltaý ǵana. Alvares pen onyń promoýteri Oskar De La Hoııa buzaqylar. Olar dopıng qoldanyp, eshteńe bolmaǵandaı kúıde otyr. О́tken jekpe-jek aldynda onyń bul­shyq etteriniń úlkeıgeni kórinip turdy. Denesinde ınek­sııanyń izderi boldy. Kez kelgen dári­gerden surap kórińiz, munyń qan­daı bulshyq etter ekenin solar tú­sindirip bersin. Eń durysy – Saýldi ótirikti anyqtaıtyn detektorda tekserip kórý kerek. Sol kezde et týraly da, jemister týraly da, shokoladqa qatysty da barlyq suraqqa jaýap tabamyz», dedi Golovkın.

Al NVO kommentatory Maks Kellermannyń paıymdaýynsha, Alvarestiń isine qatysty sheshim onyń aǵzasynan tabylǵan klenbýteroldyń mólsherine tikeleı qatysty bolmaq. «Kóbisi Kanelony kinásiz dep esepteıdi. Olardyń pikirinshe, klenbýterol adamdy kúshti nemese tózimdi etetindeı áseri joq. Osy oraıda mynadaı suraq týyndaıdy: Alvares klenbýteroldy ne úshin paıdalandy? Menińshe, barlyǵy dárilik zattardyń deńgeıine baılanysty. Eger Alvarestiń aǵza­synda klenbýterol kóp mól­sherde bolsa, onda ol alaıaq retin­de aıyptalýy múmkin. Al dárilik zattyń deńgeıi tómen bolsa, Fransısko Vargastyń oqıǵasy qaıtalanýy múmkin», deıdi Maks.

Sarapshylar tarapynan Al­vareske qarata qanshama aıyptaý men syn taǵylyp jatsa da, ol áli qoǵam aldyna shyǵyp eshbir málimdeme jasaǵan joq. 18 sáýir kúni daýly oqıǵaǵa baılanys­ty sot ótedi. Saýl barlyq má­selege sol sotta núkte qoıýy kerek.

«Golovkındi aldaý operasııasy»

Meksıkalyq boksshynyń ko­man­dasy ózderine jala ja­byl­­ǵa­nyn aıtyp, istiń sotqa deıin bar­ǵanyna narazy bolyp, 5 mamyr kúni ótetin jekpe-jekten bas tartty. Sondaı-aq Alvares 18 sáýirge (sot otyrysy ótetin kún) deıin sporttan shettetilgenin alǵa tartyp, psıhologııalyq qysym­nyń áserinen jekpe-jekke tolyq­qandy daıyndala almaıtynyn aıtqan.

«5 mamyrǵa josparlanǵan ekinshi kezdesýden bas tarttyq. 18 sáýir kúni komıssııa tyńdalymy ótip, resmı sheshim shyǵady. О́kinishke qaraı, odan keıin 5 mamyrǵa deıin jekpe-jekti keń kólemde jarnamalaýǵa ýaqyt az. Aıqastyń ótpeıtinine negizgi sebep – meksıkalyq boksshynyń dopıng daýyna ilikkeni bolyp tur», dedi Golden Boy Promotions promoýterlik kompanııasynyń prezıdenti Erık Gomes.

Alvarestiń ózi kinásiz ekenin aıtyp, uıymdastyrýshylar men jankúıerlerden keshirim surady. «Dopıng daýy meni qatty tańǵaldyrdy. Maǵan esh­kim­niń kúmán keltirmegenin qalaı­myn. Men buǵan deıin de, budan keıin de «taza» sport­shy bolyp qala beremin. Men sportty qurmetteımin. О́z jan­kúıerlerimdi jerge qaratpaýǵa ýáde beremin dep aıtqym keledi», deıdi Alvares.

Al Abel Sanches máseleniń ette bolýy múmkin ekendigine senedi, biraq óz otandasyn aqtaýǵa tyryspaıdy. «Olar bar másele ette dep otyr. Álemde neshe el bar, al olardyń Meksıkadan basqa elden tapsyryspen et aldyrýǵa qarjylary jetpeı qalǵan ba? Meksıkada ýlanǵan et máselesi rasymen bar. Eger Alvares ony shyn máninde jegen bolsa, oǵan qarsy eshqandaı sanksııa qoldanbaýy kerek. Bul onyń jaı ǵana aqymaq ekendigin kórsetip tur. Al eger másele tek qana ette bolmasa, komıssııa músheleri jaza qoldanýlary tıis. Jattyqtyrýshylardy da jazalaý kerek», dedi Sanches.

Sanchestiń sóziniń jany bar. Alvarestiń komandasy sanaly túrde Meksıkanyń «ýlanǵan etin» jep, dopıng qoldandy degen aıyppen jekpe-jekti keıinge qaldyrý úshin ádeıi jasaǵan bolýy múmkin. Sebebi Alvares Golovkınniń soqqysy joıqyn ekenin, biraq ýaqyt ót­ken saıyn otandasymyzdyń kúshi sarqylyp bara jatqanyn da bi­ledi. Sondyqtan mamyrdaǵy kezdesýden bas tartyp, jekpe-jekti kúzge deıin shegere turýdy jón sanaǵan. Joǵaryda «ýlanǵan etti» jep ustalǵan boksshylardyń 90 paıyzy aqtalyp shyqqan dep aıtyp qaldyq qoı. Alvarestiń komandasy da osy jaıtqa basa nazar aýdarǵan sııaqty. 18 sáýir kúni meksıkalyq boksshy aqtalyp jatsa, oǵan tańǵalýǵa bolmaıdy. Al Saýldiń dopıng qoldanǵany anyqtalatyn bolsa, alty aıdan bir jylǵa deıin boks­tan shettetilýi múmkin.

Degenmen, Gennadıı Golov­kınniń promoýteri Tom Lef­­flerdiń aıtýynsha, Alvareske qarsy kezdesý ótpese de Go­lov­kın 5 mamyr kúni jekpe-jek uıymdastyrýdy kózdep otyr. Áýelgi jospar boıynsha Golov­kın 5 mamyr kúni Las-Vegas­ta jekpe-jek ótkizetinin, jan­kúıerlerdiń barlyǵy Sınko de Maıo merekesi qarsańynda ózi­niń judyryqtasýyn kórý úshin bılet alyp, josparlary­na engizip qoıǵanyn aıtqan bola­tyn. Alaıda Los Angeles Times basylymynyń jýrnalısi Lans Pagmaıer kezdesýdiń Los-Andjeles qalasyndaǵy 27 myń jankúıer syıatyn StubHub Center fýtbol alańynda ótetin boldy dep aqparat taratty.

Qazir Golovkınniń komandasy kezdesý orny emes, tezirek qarsylas taýyp, jekpe-jek uıymdastyrý mańyzdy bolyp tur. О́ıtkeni 5 mamyrǵa deıin 20 kún ýaqyt qaldy. Bul ýaqyt aralyǵynda daıyn qarsylasty taýyp, onyń kóńilinen shyǵatyn kelisimshart usyna qoıý ekitalaı. Qazir «Alvarestiń ornyn men aýystyramyn» degenderdiń bári arzan pıar úshin aýyz jybyrlatyp, BAQ betine bir shyǵyp qalý maqsatynda júrgen boksshylar.

Al Golovkınnen naqty usynys túskender «Jekpe-jekke az ýaqyt qaldy, daıyndalyp, bılet satyp úlgermeımiz, gonorar tym az» dep syltaýrata bas­tady. Negizi muny syltaý dep te aıta almaımyz. О́ıtkeni úsh aptanyń ishinde rasymen bılet satyp, jekpe-jekti jarnamalap úlgermeıdi. Jalpy, kásipqoı boksshylardyń kózdegeni abyroı emes, aqsha ekeni eshkimge jasyryn emes. Sondyqtan Go­lovkınniń komandasy Gen­na­dıımen judyryqtasýǵa nıetti boksshynyń suraǵan aqshasyn berip, kóńilinen shyǵatyn keli­sim­shart usynbasa, laıyqty qar­sylas tabýy óte qıyn.

Qoryta aıtqanda, kásipqoı boksta aqsha kimde kóp bolsa, basymdyq ta, yqpaldy adam­dardyń yrqy da sol jaqta bolady ǵoı. Sondyqtan bokstyń iri bıznesmeni sanalǵan Alvares Gennadııdiń kóktemde jekpe-jek ótkizbeýi úshin bar kúshin, aılasyn salǵan bolýy múmkin. Sondaı-aq muny Golden Boy kom­panııasynyń aldyn ala jos­par­lanǵan «Golovkındi aldaý operasııasy» dep qaraýǵa da bolatyn sııaqty.

Álı BITО́RE,

«Egemen Qazaqstan»