US Open týrnıriniń tártibi ózgerdi
Tennısten AQSh Ashyq chempıonatynyń (US Open) tártibine ózgerister engizildi. Bıyldan bastap negizgi settegi matchtyń aıaqtalýy men dopty oıynǵa qaıta qosýǵa 25 sekýnd ýaqyt beredi. Ol ýaqyttan asyp ketse tennısshige shara qoldanylady.
Jalpy, tennıste bul ereje burynnan bar dúnıe. Al US Open týrnıri muny bıyldan bastap alǵash ret qoldanbaq. Tártibi mynadaı: erejeni birinshi ret buzǵan oıynshyǵa eskertý beriledi, ekinshisinde upaı sany, ary qaraı geım qysqartylady. Buǵan deıin ataqty tennısshiler uzaq ýaqyt demalyp, úzilis kezinde ýaqyt sozyp kortqa shyqpaı qoıatyn. Al tóreshiler ýaqytty sozǵanyna mán bermeı, sırek jazalaıtyn. Endi tártip bárine birdeı bolmaq.
Sonymen qatar oıynshynyń kortqa shyqqan kezi men matchtyń bastalý ýaqyty qatań qadaǵalanady. The New York Times basylymynyń jazýynsha, tennısshilerdiń ýaqytty sozǵany úshin 20 000 dollarǵa deıin aıyppul salynýy da múmkin.
Jartylaı fınaldaǵy qarsylastar anyqtaldy
Juma kúni Shveısarııanyń Non qalasynda ornalasqan ÝEFA-nyń shtab-páterinde fýtboldan Chempıondar lıgasy men Eýropa lıgasynyń jartylaı fınaldyq kezdesýleriniń jerebe tartý rásimi ótti.
Erejege saı birinshi Eýropa lıgasynyń jerebesi tartyldy. Bul synda «Arsenal» komandasy «Atletıko Madrıd» klýbymen kúsh synassa, ekinshi jartylaı fınalda «Marsel» ujymy «Red Býll Zalsbýrg» komandasymen fınalǵa shyǵý úshin oınaıtyn bolady. Komandalar arasynda alǵashqy oıyn 26 sáýirde, qarymta kezdesý 3 mamyrda ótedi.
Al Chempıondar lıgasynda «Lıverpýl» – «Roma» bir-birine qarsylas atansa, ekinshi jartylaı fınaldyq matchta «Bavarııa» men «Real Madrıd» komandalary ózara myqtyny anyqtaıtyn bolady. Alǵashqy matchtar 24 jáne 25 sáýir, ekinshi oıyn 1, 2 mamyr kúnderi ótedi.
Taıson rıngke qaıta oralady
Asa aýyr salmaqtaǵy álemniń eks-chempıony Taıson Fıýrı úsh jylǵa jýyq úzilisten soń 9 maýsym kúni Brıtanııanyń Manchester qalasynda jekpe-jek ótkizetinin málimdedi.
Fıýrıdiń qarsylasy ázirge belgisiz. Promoýter Frenk Ýorrenniń aıtýynsha, ony chempıondyq beldikke jol ashatyn kezdesý kútip tur. «Biz bul boks keshin uzaq kúttik. Taısonnyń aldaǵy qarsylasy óte qarymdy boksshylardyń biri bolmaq. О́ıtkeni bizge chempıondyq beldikke jol ashatyn aıqas kerek», deıdi ol. Aıta keteıik, Taıson Fıýrı sońǵy ret 2015 jyldyń qarasha aıynda Vladımır Klıchkoǵa qarsy jekpe-jek ótkizgen bolatyn.
Daıyndaǵan Álı BITО́RE,
«Egemen Qazaqstan»
