Qos komanda da sońǵy kezde naǵyz babynda edi. «Astana» syrt alańda «Ertisti» 6:1 esebimen jeńip, aıqyn basymdyq kórsetti. Al «Qaırat» Oraldyń «Aqjaıyǵyn» iri eseppen utty – 3:0. Sýperkýbok oıynynda elordalyqtar almatylyq qonaqtardy 3:0 esebimen jeńgen edi. Araǵa aı salyp qos ujym qaıta kezdesip, terezesi teń oıyn kórsetti. Qazaqstan premer-lıgasynda het-trık jasaǵan eń jas oıynshy Bahtıer Zaınýtdınov bul joly da kózge tústi. Marın Tomasovtyń pasyn baspen qaqpaǵa dál baǵyttaǵan jartylaı qorǵaýshy esep ashty. Alaıda 20 mınýttan soń Baýyrjan Islamhannyń ornyna alańǵa almasyp kirgen Andreı Arshavın kire sala tarazy basyn teńestirdi. Odan keıin de birli-jarym gol soǵatyn múmkindikter bolǵanymen, fýtbolshylar qaqpadan qıys ketip jatty. Qos lıderdiń teń tarqasqany «Ordabasy» úshin jaqsy jańalyq edi. Biraq shymkenttikter «Aqjaıyqtan» jeńilip qaldy.
«Aqjaıyq» alǵashqy shabýyldarynyń birinde esep ashyp, qarsylasynyń qateligin utymdy paıdalanyp ketti – Ivan Antıpov komdasyn alǵa shyǵardy. Qazaqstan jastar quramasynyń oıynshysyn Abdýllaı Dıakate shalyp jyǵyp, óz qaqpasyna penaltı alyp keldi. Aıyp dobyn Erkebulan Nurǵalıev dál oryndap, esepti eseleı tústi. «Jaý jaǵadan alǵanda, bóri etekten tartady» demekshi, bas tóreshi qaqtyǵystardyń birinde «Ordabasy» oıynshysy Spahııany alańnan qýdy. 10 oıynshymen qalǵan shymkenttikter bir gol soqqanymen, alań ıeleri taǵy 2 gol salyp, qorytyndy nátıje 4:1 esebin tirkedi.
«Astana» men «Qaırat» upaı bólisip, «Ordabasy» jeńilip qalǵan sátten paıda shyǵarǵan jalǵyz klýb bar. Ol – Qostanaıdyń «Tobyly». Syrt alańda «Aqtóbeni» 1:0 esebimen jeńip ketken Vladımır Nıkıtenko shákirtteri 12 upaımen týrnır kestesiniń 2-satysyna kóterildi. О́tken týrda «Atyraý» qaqpasyna 2 gol soqqan Anton Shınder birinshiliktegi kezekti golyna qol jetkizdi. Ýkraınalyq qorǵaýshy qazir mergender qatarynda júr.
Premer-lıgaǵa araǵa 9 jyl salyp qaıta oralǵan Petropavl qalasynyń «Qyzyljar» komandasy alǵashqy jeńisine qol jetkizdi. Olar óz alańynda «Jetisýdy» Bratıslav Pýnoshevastyń soqqan jalǵyz golynyń arqasynda jeńip ketti. Serbııalyq shabýylshy da bıyl 3 gol soǵyp úlgerdi.
Chempıonat bastalǵaly beri jeńis degenniń ne ekenin bilmeı kele jatqan «Qaısar» bul joly da «Ertispen» teń oınady. Sonymen qatar «Atyraý» men «Shahter» arasyndaǵy oıynda da gol soǵylǵan joq.
Ermuhamed MÁÝLEN,
«Egemen Qazaqstan»
