Qatonqaraǵaı aýdanynyń Solonovka aýyldyq okrýgine qarasty egistikte barar qara jolda uzyndyǵy 2 shaqyrymǵa taıaý jyra paıda bolǵany jurtshylyqty tańǵaldyrýda. Sýretten qarǵyn sýdyń Kishi Narym aýyly men qyrdaǵy qystaýlardyń arasyn jalǵap jatqan joldy qaq aıyrǵanyn ańǵarýǵa bolady.
Jergilikti jýrnalıst Shamıl Bagaýtdınovtyń jazýynsha, jyranyń eni – 4-5, tereńdigi 5-6 metrdi quraıdy. Bir qýanyshtysy, bul jolmen adam óte sırek qatynaıtyndyqtan, adam ómirine qaýip tóndiretindeı jaǵdaı oryn almaǵan.
«Qar erip, egiske jaıylǵan qarǵyn sý qara joldyń boıymen ózen bolyp aqqan. Birneshe kún boıy toqtaýsyz aqqan sý joldy úlken jyraǵa aınaldyryp jibergen. Bul oqıǵany alǵash estigen kúni-aq tótenshe jaǵdaı mamandaryna habarlaǵanbyz. Adam ómirine qaýip tónetindeı eshteńe joq. Qazir egis basynda 2 býldozer júr. Jergilikti halyq bul mańdy Qaraózek dep ataıdy. Jer Anatolıı Matasov degen sharýanyń ıeligine kiredi. Qojalyq ıesimen jıi habarlasyp, jaǵdaıyn bilip otyrmyz. Jyranyń paıda bolýy egis naýqanyna eshqandaı kedergisin keltirmeýi tıis», deıdi Katonqaraǵaı aýdany ákiminiń orynbasary Janbolat Tynybekov.
Azamat QASYM,
«Egemen Qazaqstan»
Shyǵys Qazaqstan oblysy,
Katonqaraǵaı aýdany
Sýretterdi túsirgen Shamıl BAGAÝTDINOV
