Eske sala ketsek, EFE – Halyqaralyq ekonomıka, qarjy jáne energııa kongresi 2014 jyly bastalǵan bolatyn. 2016 jyly kúlli álemniń bilimdi de bilikti sarapshylary Qazaqstanǵa jınalyp, ǵalamdyq ekonomıkanyń túıtkildi máselelerin talqyǵa salǵan-tyn. Aıtýly jıynda Eýrazııa álemindegi eleýli máseleler ortaǵa tastalyp, osy saladaǵy belgili ǵalymdar onyń sheshimin tarqatqan edi. Eki jylda bir ret ótetin kongrestiń bıylǵy taqyryby «Naqty jáne qarjy sektoryndaǵy geosaıası ózgeristerdi túsiný» dep atalady. Kongrestiń maqsaty – álemniń túkpir-túkpirinen kelgen ǵalymdar men sarapshylardy Eýrazııa aýmaǵyndaǵy damýshy elderdiń naqty jáne qarjy sektorlaryndaǵy geosaıası ózgerister jáne onyń qarjy sektoryna áserin zerttep, oı-pikir almasýǵa shaqyrý. Sebebi kásibı sarapshylar men ǵalymdar óz tájirıbesin, kózqarastaryn bólisý jáne ortaq mámilege kelý úshin arnaıy alań qurýdy kózdeıdi.
Kongreske jınalǵan ǵalymdar energetıkalyq saıasat jáne jahandyq damý, Eýrazııadaǵy energetıkalyq saıasat, damýshy elderdiń naryq ekonomıkasy, qarjy naryqtaryndaǵy básekelestik pen retteý, damýshy elderdiń ekonomıkalyq jáne qarjylyq kemshilikteri, ortalyq bankterdegi jáne aqsha-nesıe saıasatyndaǵy qıyndyqtar, geosaıası ózgerister men damýshy naryqtardyń yqpaly sekildi mańyzdy máselelerdi sektorlyq keńester arqyly talqylamaq.
Aıgúl AHANBAIQYZY,
«Egemen Qazaqstan»
