«Bıylǵy jyldyń 2 sáýirinde «Astana-1» aqparattyq júıesi men «e-lısenzııalaý memlekettik derekter qoryn» yqpaldastyrý júzege asyryldy. Osy jumys aıasynda eksport jáne ımport salasyndaǵy lısenzııa men ruqsat qujattary boıynsha 42 málimet beriledi. Bul joba iske qosylǵannan keıin azyn-aýlaq qateler kezdesti. Alaıda, qazir bul qateler «e-lısenzııalaý memlekettik derekter qorynan» jáne «Astana-1» aqparattyq júıesi tarapynan tolyq joıyldy», - dep málimdedi D.Abaev Úkimettiń búgingi otyrysynda.
Mınıstr memleket aýmaǵyna radıoelektrondyq jáne joǵary jıiliktegi quraldardy ákelýge qorytyndy jáne ımportqa lısenzııa berýge yńǵaıly etý maqsatynda jol kartasy bekitilgenin atap ótti. Jol kartasy qyzmet kórsetý merzimin 26 jumys kúninen 8 jumys kúnine deıin qysqartýǵa, talap etilgen qujattar sanyn azaıtýǵa jáne atqarylatyn jumysty tolyq avtomattandyrýǵa múmkindik beredi.
Sondaı-aq, mınıstr 2017 jyldyń sońynda Memlekettik kirister komıtetiniń «Astana-1» aqparattyq júıesiniń elektrondyq qyzmetin tolyq engizýge baılanysty arnaıy suranys joldaǵanyn eske saldy. Onda baılanys arnalarynyń ishki jáne syrtqy pýnkttarynyń ótkizý qabiletin ulǵaıtý týraly aıtylǵan.
«Osylaısha, «Astana-1» aqparattyq júıesiniń jumys isteýi úshin 119 nysanǵa IP VPN baılanys kanaldary qoldanylady. Olardyń 48-in ákimshilik, 71-in keden beketteri paıdalanady. Iаǵnı, 63 keden beketi jerdegi baılanys kanaly arqyly, 8 keden beketi - spýtnıktik baılanys arqyly qosylǵan», - dedi mınıstr.
Qazirgi ýaqytta mınıstrlik «Ulttyq aqparattyq tehnologııalar» AQ jáne baılanys operatorlarymen birlesip, keden beketterine baılanys kanaldaryn ótkizý qabiletterin ulǵaıtý boıynsha jumystardy júrgizip jatyr. 2018 jyldyń alǵashqy jartysynda 12 keden beketindegi baılanys jyldamdyǵy ulǵaıǵan.
«Al osy jyldyń ekinshi toqsanynda 52 bekettegi baılanys jyldamdyǵyn arttyrý josparlanǵan. Qosymsha 7 beket boıynsha tehnıkalyq múmkindikter qarastyrylyp jatyr. Atalǵan 7 keden beketine qatysty baılanys operatorlaryna qoljetimdilik jyldamdyǵyn arttyrý týraly suranys joldandy. Biraq, operatorlardyń bergen aqparaty boıynsha, qazirgi ýaqytta tehnıkalyq múmkindikter joq. Degenmen, ShQO Maıqapshaǵaı keden beketin keń jolaqty ınternetpen qamtamasyz etý úshin «KaR-Tel» baılanys operatorymen talshyqty-optıkalyq jelilerdi salý josparlanyp otyr», - dedi D. Abaev.
Aıta keteıik, Qarjy mınıstri Baqyt Sultanov QR Premer-Mınıstri Baqytjan Saǵyntaevqa Qazaqstandaǵy keden beketterinde jyldamdyǵy joǵary baılanys arnalarynyń joqtyǵyn jáne vırtýaldy qýat resýrstarynyń jaqynda sarqylatynyn aıtyp, osy máseleni tezdetip qaraýdy surady.
