Atyraý oblysy Qazaqstan halqy Assambleıasy jáne «Qoǵamdyq kelisim» mekemesi uıymdastyrǵan sharada QHA ǵylymı-sarapshylyq tobynyń múshesi, tarıh ǵylymdarynyń kandıdaty Gúlfaırýz Qaıyrǵalıeva qazaq tiline aýdarylǵan 18 ǵylymı oqýlyqtyń mańyzdylyǵyn jan-jaqty túsindirdi.
Shetelderde qymbatqa baǵalanatyn oqýlyqtarǵa Memleket basshysynyń tapsyrmasymen qazaqstandyq stýdentter aldaǵy oqý jylynan bastap tegin qol jetkize alady. «Álemdik deńgeıdegi qundy qazynamen tanysý jastarǵa serpin syılary anyq, deıdi tarıh ǵylymdarynyń kandıdaty Gúlfaırýz Qaıyrǵalıeva. – Adamzattyń damý tarıhyn meńgerip, dúnıetanymyn keńeıtkisi keletin ár stýdent osy kitaptardy oqýy kerek».
Atyraýdaǵy Nazarbaev zııatkerlik mektebinde de shara ótip, Qazaqstan halqy Assambleıasynyń oblystaǵy hatshylyǵynyń basshysy Gúlmıra Shákirova baıandama jasady.
Balamasy joq bastamanyń mán-mańyzyn túsindirý baǵytynda aımaqta basqa da sharalar atqarylyp jatyr. Bul jańalyqqa stýdentter ǵana emes, mektep oqýshylary da qýanyshty. Solardyń biri – Qýanysh Jalǵasbaev. Ol álemge áıgili shyǵarmalardyń qazaq tiline túpnusqadan tikeleı aýdarylǵany mańyzdy ekenin aıtady. «Bilim alamyn degen jastarǵa kún saıyn jańa múmkindikter álemi ashylyp jatqanyn bilý jáne sol eldiń erteńi bolý mereı ári jaýapkershilik», deıdi oqýshy.
Baqytgúl BABASh,
«Egemen Qazaqstan»
ATYRAÝ
