Búginde kóptegen etnos ókilderin bir arnaǵa uıystyryp, tatýlyq pen birliktiń úlgisin kórsetip otyrǵan Jambyl óńiri qaı kezde de qazaqy dástúrdi berik ustanǵan, babalar amanatyna adal bolǵan ólkeniń biri. Al oblys ortalyǵynan Qazaq handyǵynyń 550 jyldyǵyna oraı boı kótergen «Dostyq úıi» bul kúnde júzi bólek bolsa da júregi bir, tili basqa bolsa da tilegi bir azamattardyń ortaq shańyraǵyna aınaldy. О́tken jyly qyrkúıek aıynda Jambyl oblysyna arnaıy jumys saparymen kelgen Elbasy Nursultan Nazarbaev Taraz qalasyndaǵy «Dostyq úıinde» bolyp, óńirdegi etnomádenı ortalyqtardyń jetekshileri jáne múshelerimen kezdesken bolatyn. Jambyldyq jurtshylyq úshin tarıhı oqıǵa bolǵan bul kezdesý shyn máninde dostyq pen yntymaqtyń naǵyz kórinisi edi. Kezdesý kezinde Áýlıeata jerinde turyp jatqan túrli etnos ókilderi Elbasynyń tatýlyq men yntymaqty qalyptastyrý turǵysyndaǵy taǵylymdy áńgimelerin tyńdap, Prezıdentke elimizdegi búgingi beıbit zaman úshin alǵystaryn bildirgen bolatyn. Bul oqıǵanyń árbir azamat úshin tarıhı mańyzynyń zor bolǵany anyq. Jambyl oblysy boıynsha «О́zbek ulttyq etnomádenı ortalyǵynyń» prezıdenti Bahrom Mýmınov bizben áńgimesinde Elbasymen kezdesken tarıhı sátteri týraly aıtyp berdi.
– Men Elbasymen alǵash ret 1997 jyly kezdestim. Jambyl oblystyq «О́zbek etnomádenı ortalyǵynyń» sol kezdegi prezıdenti Gafýr Kasymov ekeýmiz Prezıdentti áýejaıdan qarsy alǵandardyń ishinde boldyq. Odan keıin 2006 jyly Astana qalasyndaǵy Beıbitshilik jáne kelisim saraıynda ótken Qazaqstan halqy Assambleıasynyń jıynynda Elbasynyń aldynda sóz sóıledim. Men qazaq jerinde turamyn, sondyqtan da qazaq tilin bilýdi ózimniń azamattyq boryshym dep esepteımin. Sol jıynda qazaq tilinde sóılegenimdi kórgen Nursultan Nazarbaev «О́zbektiń balasy, jaraısyń!» dep rızashylyǵyn bildirdi. Elbasynyń osynaý joǵary baǵasy men úshin umytylmas estelik, – deıdi ol.
Osy oqıǵadan bir apta ótken soń Bahrom Mýmınov Birikken Ulttar Uıymynyń uıytqy bolýymen Amerıka Qurama Shtattarynyń Nıý-Iork qalasynda ótetin Elbasynyń táýelsizdik taǵylymyn baıandaǵan kitabynyń tusaýkeser rásiminiń delegaty bolyp shaqyrtylady. Sóıtip ol alyp memlekette ótken Elbasy kitabynyń tusaýkeser rásiminiń saltanatyna qatysady. Bahrom Mýmınov bul jaıdyń bári de kezdeısoq emes, Elbasynyń sarabdal saıasatynyń nátıjesinde elimizde qalyptasqan tatýlyq pen birliktiń kórinisi dep biledi. Sonymen qatar suhbat barysynda keıipkerimiz árdaıym qazaq eliniń órkendeýine úles qosýǵa daıyn ekenin ári muny óziniń azamattyq paryzy dep biletinin jetkizdi.
– Elbasymen árbir kezdesý men úshin maqtanysh. О́tken jyly qyrkúıek aıynda Prezıdent Jambyl óńirine jumys saparymen kelip, Taraz qalasyndaǵy «Dostyq úıi» ǵımaratynda óńirdegi etnomádenı ortalyqtardyń jetekshilerimen kezdesti. Onyń ishinde men de boldym. Sonda Elbasy halyqtyń birligi men tatýlyǵy jóninde taǵylymdy áńgime órbitti. Negizi biz ol kisiniń jadynyń beriktigin, bir kórgen adamyn ekinshi kórgende jazbaı tanıtynyn kóp estýshi edik. Osy joly ózimniń basymnan erekshe jaǵdaı ótti. Bárimizben jyly amandasyp, tatýlyq týrasyndaǵy tálimdi áńgimesinen soń Elbasy maǵan burylyp «Bahrom, sen sóıle» dedi jyly júzben. Sol sáttegi qýanyshymdy sózben aıtyp jetkize almaımyn. Ári ol kisiniń meni tanyp turǵanyna tańǵaldym. Men Elbasynyń álem aldyndaǵy bıik bedelin, memleketimizdiń álem memleketteri arasyndaǵy aıryqsha yntymaǵyn jáne qazaq elindegi tatýlyq pen birlikti qalyptastyrýdaǵy eleýli eńbegi úshin alǵysymdy aıttym. Prezıdent sonda kelesi jyly О́zbekstannyń Qazaqstanda jyly jarııalanatynyn aıtqan edi. Mine bıyl Qazaqstan men О́zbekstan memleketteri arasyndaǵy yntymaqtastyqtyń kórinisindeı bolyp, О́zbekstannyń Qazaqstandaǵy jyly jarııalandy. Elimizdiń abyroıy jyl sanap artyp keledi, – deıdi óz sózinde keıipkerimiz.
Bahrom Mýmınov shırek ǵasyr boıy Jambyl jerinde az qamtylǵan otbasylarǵa kómek kórsetip kele jatqan kásipker. Jyl saıyn áleýmettik jaǵdaıy tómen otbasylarǵa kómektesý onyń ustanymyna aınalǵan. Ári qazaq eliniń darhandyǵy men keńdigin, parasaty men paıymyn boıyna jınaǵan azamat úshin bul buljymas qaǵıda. О́tken jyly ol Qazaqstan halqy Assambleıasynyń «Qaıyrymdylyq kerýeni» jalpyulttyq aksııasy aıasynda tuńǵysh ret tapsyrylǵan «Jomart jan» Alǵys hatyn ıelengen. Sonymen qatar byltyr Memleket basshysynyń Jarlyǵymen «Qurmet» ordenimen marapattalǵan. Elbasynyń qatysýymen Astana qalasynda ótetin Qazaqstan halqy Assambleıasynyń otyrysyna Bahrom Mýmınov árdaıym Jambyl oblysynan delegat bolyp qatysady. «Elbasynyń jambyldyq delegattarǵa degen qurmeti bólek. Jyly shyraı tanytyp, árqaısymyzben amandasyp shyǵady. Qazaq halqynyń kisilik qasıeti, adamgershilik izgiligi Elbasynyń boıynan qashanda kórinip turady», deıdi ol. Árıne Jambyl óńirinde birlik pen yntymaqty qalyptastyrýda eńbek etip kele jatqan azamattar barshylyq. Bári de beıbit zamanda baıandy bolashaq úshin aıanbaı eńbek etýge nıetti.
Hamıt ESAMAN,
«Egemen Qazaqstan»
Jambyl oblysy
