Is-sharany BUU О́rkenıetter alıansy men Qazaqstannyń Birikken Ulttar Uıymy janyndaǵy Turaqty ókildigi birlesip uıymdastyrdy.
BUU О́rkenıetter alıansynyń joǵary ókili Nasır Ábdel Ázız An-Naserdiń jáne Qazaqstannyń BUU janyndaǵy Turaqty ókili Qaırat Omarovtyń tóraǵalyq etýimen ótken forýmǵa BUU Qaýipsizdik Keńesine múshe memleketterdiń, úkimettik emes uıymdardyń ókilderi, «Dinder beıbitshilik úshin» dúnıejúzilik konferensııasynyń bas hatshysy Ýılıam Vendlı, BUU janyndaǵy Dinı úkimettik emes uıymdary komıtetiniń prezıdenti Svamı Parameshananda jáne basqalar qatysty.
Atalǵan otyrys BUU Bas hatshysy Antonıý Gýterrıshtiń atynan sóz sóılegen Nasır Ábdel Ázız An-Naserdiń quttyqtaý lebizimen ashyldy.
Qazaqstan Respýblıkasy Din isteri jáne azamattyq qoǵam vıse-mınıstri – Álemdik jáne dástúrli dinder kóshbasshylary seziniń maqsattary men mindetterin ilgeriletý jónindegi ýákili Berik Aryn Qazaqstan Parlamenti Senatynyń Tóraǵasy, Álemdik jáne dástúrli dinder kóshbasshylary sezi Hatshylyǵynyń basshysy Qasym-Jomart Toqaevtyń atynan prezentasııalyq baıandama jasady.
B.Aryn qatysýshylardy Qazaqstannyń etnosaralyq jáne konfessııaaralyq kelisimdi qamtamasyz etýdegi tájirıbesimen tanystyra otyryp, Prezıdent N.Á.Nazarbaevtyń BUU jáne basqa da halyqaralyq uıymdardyń mıssııasymen jáne basymdyqtarymen úndesken Álemdik jáne dástúrli dinder kóshbasshylarynyń sezin shaqyrý boıynsha jahandyq bastamasy týraly tolyq aıtyp berdi.
Atap aıtqanda, vıse-mınıstr búgingi jaǵdaıda halyqaralyq qatynastarǵa degen senimdiliktiń tapshylyǵy, jańa syn-tegeýrinder men qaýip-qaterlerdiń, jergilikti soǵystar men álemniń birneshe óńirlerindegi radıkaldy qozǵalystardyń jandanýy jáne álemdegi qaýipsizdik pen turaqtylyqty qamtamasyz etý jolynda dinı lıderler men álemdik saıasatkerlerdiń kúsh-jigerin biriktirý qajettigi boıynsha máseleler óte ózekti ekendigin jetkizdi. Sondaı-aq ol BUU-ǵa múshe memleketter jáne halyqaralyq uıymdarǵa jahandyq deńgeıde dinaralyq dıalogty ilgeriletý isine úlesin qosýǵa múmkindik beretin atalǵan forýmnyń jumysyna belsendi qatysýlary arqyly Qazaqstan Prezıdentiniń bastamasyn keńinen qoldaıtyndaryna úmit artatynyn bildirdi.
Jalpy, is-sharaǵa qatysýshylar Qazaqstannyń belsendi syrtqy saıasatyn joǵary baǵalap, kún tártibindegi jahandyq ózekti máselelerdi talqylady, onyń ishinde Álemdik jáne dástúrli dinder kóshbasshylarynyń aldaǵy VI seziniń mazmundyq bóligi boıynsha qundy keńester men usynystar berildi. Sondaı-aq qatysýshylar dinaralyq dıalogty ilgeriletý boıynsha óz elderiniń tájirıbesimen jáne dinı ekstremızm men terrorızm túıtkilderin sheshý, beıbit jáne turaqty qoǵam qurý jónindegi ózderiniń kózqarastarymen bólisti.
Sonymen qatar issapar sheńberinde vıse-mınıstr B.Arynnyń «Dinder beıbitshilik úshin» dúnıejúzilik konferensııasynyń bas hatshysy Ýılıam Vendlımen jáne BUU О́rkenıetter alıansynyń joǵary ókili Nasır Ábdel Ázız An-Nasermen ekijaqty kezdesýleri ótti.
Kezdesýlerde B.Aryn Sezd Hatshylyǵynyń basshysy, Qazaqstan Parlamenti Senatynyń Tóraǵasy Q.Toqaevtyń atynan VI Sezge qatysý úshin shaqyrý hattaryn tabystap, suhbattasýshylardy aldaǵy forýmnyń kún tártibimen tanystyrdy. Sondaı-aq Qazaqstannyń «Dinder beıbitshilik úshin» uıymymen jáne О́rkenıetter alıansymen yntymaqtastyǵyn damytý máselelerin talqylady. Ý.Vendlı jáne N.An-Naser shaqyrýdy rızashylyqpen qabyldap, sezd jumysyna ózderiniń qatysatyndyqtaryn jetkizdi.
Aıta keteıik, «Arrıı formýlasy» boıynsha otyrystar beıresmı túrde ótkiziledi. Olar BUU QK múshelerine ıkemdi rásimder negizin paıdalana otyryp, ashyq túrde pikir almasýǵa múmkindik beredi. Otyrystyń osyndaı formaty Venesýela elshisi Dıego Arrııdiń qurmetine atalǵan, ol bul tájirıbeni 1992 jyly BUU Qaýipsizdik Keńesinde Venesýela ókili retinde qoldanǵan bolatyn (1992-1993 jyldar).
Daıyndaǵan Joldybaı BAZAR,
«Egemen Qazaqstan»
