Oblys ortalyǵyndaǵy áskerı bólimniń komandıri, podpolkovnık Murat Arapbaev О́skemen garnızony Elbasy – Qarýly Kúshterdiń Joǵarǵy Bas qolbasshysy qoıǵan mindetterdi abyroımen atqaryp kele jatqanyn aıtady. «27943 áskerı bóliminiń jaýyngerleri qysqa merzim ishinde úlken jetistikterge qol jetkizdi. Brıgada bólimsheleri Qarýly Kúshterdegi iri oqý-jattyǵýlaryna qatysyp, ózderiniń joǵary kásibı daıarlyqtaryn pash etip keledi. Qazirgi ýaqytta bizdiń garnızon «Shyǵys» óńirlik qolbasshylyǵyna qarasty áskerı bólimder arasynda 1-orynda, respýblıka boıynsha alǵashqy úshtikte», deıdi ol.
Áskerı bólim sarbazdary 2008 jyly «Shubarkól» polıgonynda Reseı Federasııasynyń Qarýly kúshterimen birlese ótken «О́zara árekettesý-2008», 2009 jyly Semeıdegi «Shyǵys» polıgonyndaǵy «О́zara árekettesý-2009», 2015-2016 jyldary Almaty men Semeı qalalaryndaǵy «Aıbalta-2015», «Aıbalta-2016» oqý jattyǵýlaryna qatysypty. Áskerı bólimniń 1 motoatqyshtar batalonynyń jaýyngerlik urys mashınasynyń ekıpajy 2016 jyly halyqaralyq «Armııa-2016» oıyndarynda «Sývorov tegeýrini» nomınasııasy boıynsha 3-oryndy jeńip alypty. Prezıdent Jarlyǵymen brıgada jaýyngerleri – aǵa leıtenant M.Abdýllın III dárejeli «Aıbyn» ordenimen, podpolkovnık Á.Salıhov, kelisimshart boıynsha áskerı qyzmetshi, 3-synypty serjant L.Kotova, 3-synypty serjant T.Múshelbaev «Jaýyngerlik erligi úshin» medaldarymen marapattalypty. Sankt-Peterbýrg qalasy, «Krasnoe» aýylynda ótken «Áskerı-medısınalyq estafeta» baıqaýynda qazaqstandyq komanda quramynyń mehanık júrgizýshisi, 3-synypty serjant Nurjan Maıhanov JSÁK (jeńil saýytty ámbebap kólik) kedergiler jolaǵynan, atys shebinen ótýde kásibı sheberliginiń joǵary deńgeıde ekendigin kórsetipti.
Bıyl О́skemendegi 27943 áskerı bóliminiń qurylǵanyna 25 jyl tolyp otyr. Áskerı bólim Qorǵanys mınıstrliginiń 1993 jylǵy 26 sáýirdegi derektıvasy negizinde Úkimettiń sheshimimen memlekettik shekarany qorǵaýdy qamtamasyz etý maqsatynda motoatqyshtar polki retinde Jarma aýdanynyń Qalbataý qalashyǵynda jumysyn bastaǵany belgili. 1998 jyly 1 jeltoqsannan bastap motoatqyshtar polki jeke motoatqyshtar brıgadasy bolyp qaıta qurylyp, 2004 jyly jeke motoatqyshtar brıgadasy mehanıkalandyrylǵan brıgada bolyp aýystyrylyp, О́skemenge, Ahmer kentine kóship kelgen-di.
Jaqynda О́skemende bólimniń 25 jyldyǵyna oraı saltanatty jıyn ótip, bólimniń qurylýyna, qalyptasýyna eńbek sińirgen keshegi qylshyldaǵan sarbazdar – búgingi aǵa býyn ardagerler bas qosyp, ótken kúnderdi tebirene eske alyp, estelikterimen bólisti. «27943 áskerı bólimi elimiz óz Táýelsizdigin alǵan eleń-alań shaqta, ıaǵnı 1993 jyly Qazaqstannyń tuńǵysh Qorǵanys mınıstri Saǵadat Nurmaǵambetovtiń buıryǵymen qurylǵan edi. Men sol jyldyń 18 qazanynda Qalbataýǵa keldim. Eldiń eńsesi ezilgen qıyn kez. Bárin basynan bastaýǵa týra keldi. Soldattar men serjanttardy, ofıserlerdi áskerı bólimderden jınadyq. Áýelde bólimde bar bolǵany 312 sarbaz, 16-17 ofıser ǵana boldy. Akademııalyq bilimi bar jalǵyz adam men bolsam, áskerı ýchılıshelerdi bitirgender sany 5-6-dan aspady. Qalǵandary zootehnık, mehanık, ıaǵnı zapastaǵy ofıserler boldy. Jumysty tozyp ketken kazarmalar men shtabtan bastadyq. «Qaraýyldy 200 gramm dızel otynymen 18 shaqyrym jerdegi kezekke qalaı aparamyn?» dep bas qatqan kezderdi de ótkerdik. Sol shaqtarda meniń janymda bolǵan, kún-tún demeı bólimniń jaýyngerlik qabiletin ushtaǵan, shyńdaǵan barlyq ardagerlerge alǵysymdy bildiremin», deıdi bólimniń tuńǵysh komandıri, Aýǵan soǵysynyń ardageri, general-maıor Álimjan Ernııazov.
Budan keıingi jyldarda bólimge Tımýr Ábishev, Baýyrjan Qabatov, Vıtalıı Dobrınskıı, Asqan Tasbolatov, Nurlan Qashaǵanov, Danııar Qonaqbaev, Rýslan Aqmolın, Talǵat Saparbaev, Erjan Ibraev syndy azamattar jetekshilik jasady. «Serjanttyq qozǵalys elimizdiń Qarýly Kúshterine 2003 jyldan bastap engizildi. Áýelde qıynshylyqtar, túsinbeýshilikter boldy. Alaıda, bir adamdaı jumylyp, serjanttar qozǵalysyn jaqsy jolǵa qoıa bildik. Sol kezde meniń qol astymda jumys istegen batalon serjanttarynyń kóbi qazir Qorǵanys mınıstrliginde, basqa okrýgterde, áskerı brıgadalarda adal qyzmet atqaryp júr», deıdi bólimniń eń alǵashqy serjant brıgadasy bolǵan, artıllerııalyq qondyrǵynyń tehnıgi, vzvod komandıri qyzmetterin atqarǵan Qaırat Júnisov.
Iá, búginde О́skemendegi 27943 áskerı bóliminiń sarbazdary eldiń shebin abyroımen qorǵap, jaýyngerlik sertterine adaldyq tanytyp keledi. Muny bólimniń 25 jyldyǵyna arnalǵan saltanatty jıynda «Shyǵys» óńirlik qolbasshylyǵy áskerler qolbasshysynyń orynbasary, polkovnık Aleksandr Áshirov erekshe atap ótti. «Áskerı bólim árdaıym aldyńǵy saptan kórinip júr. Ekinshi motoatqyshtar batalony bıyl Qazaqstan Respýblıkasy Qarýly Kúshteri Qurlyq áskerleriniń áskerı bólimderi men qurylymdarynyń batalondary arasyndaǵy «Mergender batalony» saıysynda 1-oryn aldy. Jaqynda Qurlyq áskerleri qaraýyl qyzmeti boıynsha tekserý júrgizgende bólim joǵary ball ıelendi. Munyń ózi brıgadanyń tutastyǵy men uıymshyldyǵyn ańǵartsa kerek», deıdi qolbasshy orynbasary.
Azamat QASYM,
«Egemen Qazaqstan»
О́SKEMEN
