Astana qalasynda «Bolashaq energııasy» uranymen ótken EKSPO-2017 halyqaralyq mamandandyrylǵan kórmesi Mańǵystaýda ınvestısııa tartý, tehnologııalyq jańarý jáne qolda bar múmkindikterdi paıdalanýǵa serpin berdi. Turaqty qýat kózderin jurtshylyq nazaryna usyný maqsatyndaǵy bastama Mańǵystaýdyń tabıǵı múmkindigimen saı kelip, óńirde «jasyl ekonomıka» baǵdarlamasy boıynsha birneshe jobany júzege asyrý josparlandy. Túpqaraǵan aýdanynyń Aqshuqyr aýylynan qýattylyǵy 5MVt jel elektr stansasyn jáne qýattylyǵy 42MVt jel elektr stansasyn salý, Qaraqııa aýdanyndaǵy táýligine 50 000 tekshe metr sý tazalaıtyn tuzsyzdandyrý zaýyty qurylysy, «MAEK-QazAtomprom» JShS aýmaǵynan syıymdylyǵy 250 MVt qurama sıkldaǵy zaýyt salý syndy mańyzdy jobalar saralandy. Solardyń biri Mańǵystaý aýdanynyń ortalyǵy Shetpe aýylynan jáne Munaıly aýdanynyń Batyr aýylynan kún elektr stansasyn salý bolatyn. Mamyrdaǵy dostyq, birlik merekesi aıasynda Batyr aýylyndaǵy jobanyń tusaýy kesildi. Kún sáýlesinen 2 Mvt elektr qýatyn alatyn stansanyń jalpy aýdany – 36,05 ga bolsa, joba quny – 1,2 mlrd teńge. «Bıznestiń jol kartasy-2020» bıznesti qoldaý jáne damytý baǵdarlamasy arqyly qarjylandyrylǵan joba otandyq óndiristegi kún batareıalarynda jumys isteıtin tuńǵysh elektr stansasy bolýymen de mańyzdy. Elektr stansasyn paıdalaný úshin ornatylǵan 8580 kún panelderi Qazaqstanda jáne otandyq kremnııden óndirilgen, ıaǵnı otandyq ónim. Jańa qondyrǵy arqyly 300-ge jýyq úı taza elektrmen qamtamasyz etiletin bolady.
Mereke aıasynda Mańǵystaýda taǵy bir mańyzdy jobanyń irgetasy qalanyp, qurylys jumystaryna bastama berildi. Bul – Quryq aýylyndaǵy teńiz sýyn tushytatyn zaýyt qurylysy. Quny 39 mlrd teńge dep eseptelgen jáne táýligine 50 000 tekshe metr sý óńdeý qýattylyǵymen jumys jasaıdy dep mejelengen zaýyt jeke ınvestorlardyń qarajatymen salynady. 2020 jyly qurylys jumystary aıaqtalyp, iske qosylady dep josparlanǵan zaýyt qurylysyna 300 adam jumysqa tartylsa, paıdalanýǵa berilgen soń 150 adam jumyspen qamtylady.
– Quryq aýylynda teńiz sýyn tushytý zaýytynyń jobalaý-izdestirý jáne qurylys jumysy bastalýy oblys úshin mańyzdy oqıǵa. Bul arqyly biz Aqtaý, Jańaózen, Jetibaı, Munaıshy, Quryq, Shetpe eldi mekenderin aýyz sýmen qamtamasyz etý jáne aýyl sharýashylyǵy salasyn damytý máselesin tolyqtaı sheshýge qol jetkizetin bolamyz, – dedi aımaq basshysy Eraly Toǵjanov.
Gúlaıym ShYNTEMIRQYZY,
«Egemen Qazqstan»
Mańǵystaý oblysy
