«Napolı» óz múmkindigin ózi qurtyp «Fıorentınaǵa» jeńilgen soń, chempıon atanýǵa tek qana matematıkalyq múmkindigi qalyp edi. Syrt alańda «Sampdorııany» jeńgenimen, «Iýventýs» «Romamen» teń túsip, ózine qajetti 1 upaıdy qorjynǵa saldy. Massımılıano Allegrı shákirtteri jetinshi jyl qatarynan Italııa chempıony bolyp, rekord ornatty. Onysymen qoımaı 120 jyldyq tarıhynda 34-ret eldiń úzdik komandasy atanyp otyr. Aıtpaqshy, Allegrı qazir Arsen Vengerdiń ornyna «Arsenal» bapkeri bolýy múmkin birden-bir úmitker.
Salah – jyl úzdigi
Aǵylshyn premer-lıgasynda da birqatar rekord oryn aldy. Mysaly, «Manchester Sıtı» komandasy 89-mınýtta Gabrıel Jezýstyń soqqan golynan keıin «Saýtgemptondy» utty.
Sońǵy týrda alǵan 3 upaıdyń arqasynda «Manchester Sıtı» Aǵylshyn premer-lıgasynda buryn-sońdy eshkim jınaı almaǵan upaıǵa qol jetkizdi. Hosep Gvardıola jigitteri artyq-kemi joq týra 100 upaı enshiledi. Munymen de shektelmeı bir maýsymda 106 gol soǵyp, qatarynan 18 oıyndy jeńispen aıaqtady.
Sonymen qatar birinshiliktiń qola júldesine ıe bolǵan «Lıverpýl» shabýylshysy Muhamed Salah 32 golmen úzdik surmergen atandy. Mysyrlyq fýtbolshy bıyldyń ózinde 34 marapat alyp, dúıim jurtty tańǵaldyrdy. Onyń eń bastysy – «Afrıka qurlyǵynyń úzdik oıynshysy» men «Aǵylshyn premer-lıgasynyń úzdik oıynshysy» degen ataqtary.
«Barselonanyń» ókinishi
Búkil maýsym boıy ártúrli matchtardy bastan ótkerip, jeńilis degendi bilmegen «Barselona» 37-týrda utylyp qaldy.
Talaı oıyndy sońǵy mınýttarda jeńip ketip, «Realmen» bolǵan matchta 10 fýtbolshymen júrip teń oınaǵan katalonııalyqtar birinshilikte 15-orynda turǵan «Levantege» shamasy jetpeıdi dep kim oılaǵan?! Bul oıynda «Levante» shabýylshysy Emanýel Boateng
3 gol soqty. Sonaý 2005 jyly Dıego Forlan «Barselona» qaqpasyna het-trık jasaǵan eken. Sodan beri bul komandaǵa bir oıynda La-lıganyń eshbir shabýylshysy úsh gol soqpaǵan.
Bir aıta keterligi «Levante» naýryz aıynda bapker aýystyryp, 4-lıgada qyzmet etip júrgen Pakony jumysqa aldy. Mine, fýtbolǵa degen kózqarasy erekshe maman kelgeli beri «Levante» oıyny jandana tústi. Tipti, bir qyzyǵy sońǵy eki aıda múmkin bolǵan 30 upaıdyń 25-in jınap, «Levante» La-lıganyń sońǵy aılardaǵy úzdik komandasy atandy.
«Barselona» úshin bir jaǵymdysy Leonel Messı 34 gol soǵyp, Eýropa birinshilikterindegi eń kóp gol salǵan fýtbolshy retinde «Altyn býtsyny» alatyn boldy. Bul jerde eskere ketetin bir jaıt bar. Ispan La-lıgasynyń jeke koeffısıenti 2-ge teń bolǵandyqtan Messıdiń upaıy 68 bolady. Al negizi «Benfıka» shabýylshysy Jonas bıyl Portýgalııa chempıonatynda 35 gol soǵyp tastaǵan edi.
Daıyndaǵan
Ermuhamed MÁÝLEN,
«Egemen Qazaqstan»
