Ata-analar jınalysynyń kózdegen basty maqsaty – ár otbasynyń bala tárbıesine belsene qatysýynyń mańyzyn arttyrý, balanyń jaqsy ádetterdi boıyna sińirip ósý joldaryn ata-analarmen birlese qarastyrý, sondaı-aq bilim berý mazmunyn jańartý boıynsha júrgizilip jatqan memlekettik saıasatty talqylaýǵa ata-analar qaýymyn kiristirý. Negizinde mekteptegi tárbıe jumysy nátıjeliliginiń bir ushy ata-analar men mekteptiń birlesken áreketinde ekeni belgili.
Elbasy Nursultan Nazarbaev zaman talabyna saı, jan-jaqty jetilgen, boıynda ulttyq sana men ulttyq psıhologııa qalyptasqan, ımandylyq ádebi, parasaty bar urpaq tárbıeleý, ósirý, bilim berý búgingi otbasynyń, balabaqshanyń, mekteptiń, barsha eldiń mindeti ekendigin aıtady. Shynymen de, tárbıe jumysynyń tabysty bolýynyń basty kepili mektep pen ata-analar arasyndaǵy yntymaqtastyqta. О́ıtkeni balanyń basty ustazy – ata-ana. Oı-sanasy damyǵan, mádenıetti tulǵany jan-jaqty qalyptastyrýdy kózdegen tárbıe máseleleri mektepti de, ata-anany da árqashan tolǵandyryp keledi. Búgingi tańda balalardyń sapaly bilip alyp, básekege qabiletti, bolashaqtary jarqyn bolýlary úshin jańartylǵan mazmun engizilip, elimizdiń muǵalimderi arasynda pedagogtardyń biliktilikterin arttyrý baǵdarlamasy sheńberinde jappaı oqytý júrgizilip jatyr.
Bıylǵy ata-analar jınalystarynda ár mektepte jumys isteıtin qamqorshylyq keńesteriniń mindetteri, qaǵıdasy men qyzmet tetikteri talqylanady dep josparlanýda. Mektep ómirimen tyǵyz baılanysty qamqorshylyq keńesteriniń basty maqsaty – bilim berý sapasyn arttyrýda birigip jumys isteý, múmkindigi zor ári shyǵarmashyl áleýeti joǵary bilim berý ortasyn qalyptastyrý ekendigin biri bilse, biri bilmeıdi. Osy rette qamqorshylyq keńesteriniń qatysýshylary retinde ata-analar, jergilikti atqarýshy organdardyń ókilderi, qoǵam qaıratkerleri belgilenip otyrǵandyǵyn aıta ketken jón.
Ata-analardyń jalpyulttyq jınalysy bıyl Halyqaralyq otbasy kúnimen sáıkes kelip otyr. Qoǵamda otbasy rýhanı jáne mádenı dástúrlerdiń saqtaýshysy, túrli býyndar arasyn jalǵastyrýshy jáne solaı bolyp qala bermek. Sondyqtan shańyraqtan alǵan tárbıe barsha halqymyzdyń baqýatty da baıandy bolashaǵynyń aıqyn kepili. Osy rette ata-analar qaýymy mamyrdyń 15 juldyzynda ótetin jalpyulttyq jınalysqa belsendi qatysady degen senimdemin. О́ıtkeni ata-analar jalpyulttyq jınalysta mazalap júrgen saýaldaryna mardymdy jaýap alý múmkindigine ıe bolady. Sonymen qatar jınalystyń oqý jylynyń sońyna oraı uıymdastyrylýy qýantady. О́ıtkeni ata-analar úshin óz búldirshinderiniń oqý jetistikterimen jyldyq qorytyndy baǵa shyqpaı turyp tanysýyna múmkindik beredi.
Búgingi tańda álem ózgerýine baılanysty balalar men ata-analardyń kózqarastary da ózgerdi. Sondyqtan mektep aldyna qoıylatyn talaptar da ózgertilýi tıis. Burynǵydaı muǵalimniń monologine qurylǵan jınalystan góri, toptyq jumys arqyly ata-analardyń birlese áreket etip, problemany talqylaǵany áldeqaıda tıimdi. Balanyń alǵashqy tárbıeshisi ata-anasy ekeni anyq. Otbasy qandaı bolsa, ósip kele jatqan urpaq ta sondaı bolady, bala áke-sheshesiniń úlgisinde tárbıelenedi. Endeshe óskeleń urpaq el tizginin ustaıtyndaı azamat bolsyn desek ata-analarmen júrgiziletin jumystardyń jańasha baǵyttaryn qarastyryp, keleshekte jas urpaq bolashaq elimizdiń tutqasy bolýyna mektep, ata-ana, ustaz bolyp yqpal ete bilý mańyzdy.
Otbasy – tárbıe kózi, mektep ony shyńdaýshy. «Tárbıesiz berilgen bilim – tul» dep uly ǵulama Ál-Farabı atap kórsetkendeı, bilimdi urpaq tárbıeleýdiń ata-ana men mekteptiń tyǵyz baılanysynda ótýi bıik nátıjege jetkizedi.
Sandýǵash BAIMIShEVA,
Ata-analar qaýymdastyǵynyń múshesi
Soltústik Qazaqstan oblysy
