Aýyldyq mektep ǵımaratynyń birinshi qabatynan oryn tepken ortalyqty jergilikti «Spasskoe-Agro» JShS basshysy Magomed Abýev óz qarajaty esebinen kúrdeli jóndeýden ótkizipti. Jergilikti turǵyndar úshin bul úlken syı boldy. Mekteptiń birinshi qabatynda júrgizilgen kúrdeli jóndeýden keıin oıyn alańy, ashana, kirý jýý orny jáne balalardyń demalatyn bólmesi paıda boldy. Burynǵy esik, terezeleri túgelimen jańasyna aýystyryldy. Edenge lınoleým tóselip, tóbesi ádemi jabyndymen tolyq jabyldy. Sóıtip balalar úshin barynsha yńǵaıly orta jasaldy. Endi bul ortalyqta jıyrmaǵa tarta bala tárbıelenetin bolsa, aldyńǵy lektegiler mektepke daıyndyqty bastap ta ketti. Statıstıka derekterine qaraǵanda, mektepke deıingi mekemelerge baryp júrgen balalar óz qatarlastaryna qaraǵanda áldeqaıda ıntellektýaldyq jaǵynan damyǵandyǵyn tanytady.
Balalaryna osyndaı yńǵaıly jaǵdaıdyń jasalǵandyǵyna ásirese ata-analar dán rıza. Aıta ketý kerek, atalǵan shaǵyn ortalyqta balalardy oqytýǵa ketetin shyǵynnyń bir bóligin JShS óz moınyna alyp otyr. Al jetispegen qarjysyn ata-analar óz qaltalarynan shyǵarady. Sonymen qatar barlyq kerek-jaraq: jıhaz, jamylǵylar, oıynshyqtar aýdan bıýdjeti qarajatyna satyp alyndy.
Asqar TURAPBAIULY,
«Egemen Qazaqstan»
Aqmola oblysy
