1925 jylǵa deıin qazaqtardy ımperııashyl Reseı «qyrǵyz-qaısaq» dep kemsitip kelgendigi belgili. Al qyrǵyzdarǵa «qara qyrǵyz» dep aıdar taqty.
Qazaq astanasyn qıyrdaǵy Orynbordan ortalyqqa kóshirgen Sultanbek Qojanov bastaǵan alash qaıratkerleri ımperııamen jaǵalasyp júrip qazaq degen ataýdy qaıtardy.
Baıtaq halqymyzdy basynǵysy kelgen kelimsekterge esiktegi ornyn kórsetti. Jańa astanaǵa «Qyzylorda» degen ataý berip, jańa úkimettiń úıin saldy. Biraq zamananyń uıytqyǵan jeli tarıhı nysandy buzyp tynǵan bolatyn. Jańa ortalyq salý týraly sheshim qabyldanǵanda ǵalymdardyń muraǵattan tapqan ǵımarattyń syzbasy negizge alynǵan. Kıiz týyldyryqty alashty óz aldyna egemen el qylamyz dep basyn báıgege tikken qazaqtyń asyl azamattarynyń ıisi sińgen kıeli jerge ulttyq jańǵyrýǵa negizdelgen keshen boı kóterdi. Qazaq Ortalyq Atqarý komıteti úlgisimen salynǵan bul ǵımarattyń bir jaǵynda «Rýhanı jańǵyrý» ortalyǵy, bir jaǵynda mýzeı ornalasady.
– Syrdarııa ózeniniń sol jaǵalaýy ıgerile bastaǵaly alǵash salynyp bitken ortalyq ǵımaraty boldy. Memlekettik komıssııa ǵımaratty qabyldap aldy. Qazaq Ortalyq Atqarý komıtetiniń ǵımaratynyń syzbasymen salynǵan nysan astana bolǵan Aqmeshitte halyqqa qyzmet etken Jalaý Myńbaev, Ahmet Baıtursynuly, Uzaqbaı Qulymbetov, Álıhan Bókeıhanov sekildi Alash qaıratkerleriniń ult aldyndaǵy eńbegine qurmet, – deıdi ortalyq dırektory Nurlybek Myńjasov.
Qurylys merdigeri, «PromStroıServıs» seriktestiginiń bas dırektory Manarbek Espembetov burynǵy ǵımarat qalanǵan Nıkolaı zamanyndaǵy kirpish tabylmaǵandyǵyn aıtady. Biraq sol negizdegi kirpishti Reseıdiń Belgorod qalasynan aldyrǵan.
Baqtııar TAIJAN,
«Egemen Qazaqstan»
Qyzylorda oblysy
