Sonaý 1998 jyly irgesi qalanǵan joǵary oqý orny búginde elimizdegi bedeldi ýnıversıtetterdiń birine aınalyp úlgerdi. Qazirgi tańda ýnıversıtette óner salasynyń bolashaq maıtalmandary bilimin shyńdap júr. Bilim ordasy elordanyń ǵana emes, tutas eldiń óneri men mádenıetiniń damýyna eleýli úles qosýda. Alqaly jıynǵa qatysqan Memleket basshysy quttyqtaý lebizinde aýqymdy mádenıet oshaqtary elorda mártebesin asqaqtata túsetinin atap ótti.
«Shyǵarmashyl zııaly qaýym elordanyń mádenı ómirine eleýli úles qosyp keledi. Men Astanaǵa Almatydan jáne búkil Qazaqstannan mádenıet salasynyń úzdik ókilderin shaqyrdym. Álemde kóptegen ýnıversıtet bar, biraq О́ner ýnıversıteti tek Astanada ǵana boı kóterdi. Búginde elordada Opera jáne balet teatry, Horeografııa akademııasy, Ortalyq konsert zaly jáne basqa da mádenıet oshaqtary ashyldy. Osynyń bári elimizdiń bolashaǵy úshin, mádenıetimiz ben ónerimiz úshin jasalyp jatyr», dedi Nursultan Nazarbaev.
Budan keıin Elbasy joǵary oqý ornynyń mańyzyna toqtaldy. Álemdegi túrli salalardyń bári ónerge baryp tireletinin ári óner arqyly Qazaqstandy álemge áıgili etetinimizdi jetkizdi. Sonymen qatar Memleket basshysy О́ner ýnıversıtetiniń qalyptasyp, damýy úshin onyń basshylyǵy men professor-oqytýshylar qaýymynyń zor ról atqarǵanyn aıtty.
«Ýnıversıtet janynda kolledj, bakalavrıat, magıstratýra jáne doktorantýra bar. 3 myńǵa jýyq stýdent bilim alýda. 20 jyl ishinde ýnıversıtettiń 500-den astam túlegi halyqaralyq konkýrstar men baıqaýlardyń laýreaty atandy. Sizderge tabys tileımin, Otanymyz – Qazaqstan Respýblıkasynyń abyroıyn asqaqtatatyn ataqty mýzykanttardyń shyǵýyna jáne jańa esimderdiń tanylýyna nıettestik bildiremin!» dep túıindedi Elbasy.
Mereıtoılyq is-sharaǵa Parlament depýtattary, memlekettik organdarynyń ókilderi, dıplomatııalyq korpýs, shyǵarmashylyq jáne ǵylymı ıntellıgensııa ókilderi, jastar men buqaralyq aqparat quraldary ókilderi qatysty.
Merekelik konsertte kórermenge qazaq jáne shetel kompozıtorlarynyń túrli janrdaǵy tanymal týyndylary usynyldy. Olardyń qatarynda Keńes Dúısekeevtiń «О́ner ordasy» shyǵarmasy, Evgenıı Brýsılovskııdiń «Qyz Jibek» operasynan úzindi, Latıf Hamıdıdiń «Bulbul» áni, Leonard Berstaınnyń «Vestsaıd tarıhy» mıýzıklinen «Sımfonııalyq bıler» jáne basqa da kóptegen týyndylar oryndaldy.
Jalpy, Qazaq ulttyq óner ýnıversıteti el astanasy Arqa tósine kóshirilgen kezde quryldy. Halyq ártisi Aıman Musaqojaeva elimizdegi daryndardy jınap, mýzyka álemindegi alǵashqy qadamynan bastap kásibı sheberlikti tolyq meńgergenge deıin júıeli bilim berý týraly usynys aıtqan bolatyn. Bul ıdeıany Prezıdent N.Nazarbaev qoldap, oqý ornynyń ashylýyna tikeleı yqpal etti. Osynyń nátıjesinde Úkimettiń 1998 jylǵy 31 naýryzdaǵy qaýlysymen Qazaq ulttyq mýzyka akademııasy ashyldy. Oqý ornynyń rektory bolyp Qazaqstan Respýblıkasynyń Halyq ártisi, professor Aıman Musaqojaeva taǵaıyndaldy.
«N.Nazarbaev Akademııanyń 1998 jylǵy 2 shildede ótken saltanatty ashylýyna qatyssa, 2000 jyly qaıta jóndeýden ótken bas ǵımaratty aralaǵan edi. Elbasy tapsyrmasymen jańa oqý ǵımaraty salyndy. Al 2005 jyly Organ zaly ashyldy. Sodan beri onda turaqty túrde konsertter ótkizilip keledi. Búginde ýnıversıtet elorda men respýblıkanyń mádenı ortalyǵy mártebesine qol jetkizdi», dedi ýnıversıtet rektory A.Musaqojaeva.
Qazirgi tańda ýnıversıtet daryndy jastardyń talantyn ushtap, óner álemindegi bıikterdi baǵyndyrýyna jol salatyn bedeldi oqý ordasyna aınaldy. Oqý ornynda jan-jaqty bilim berý men óner sheberleriniń jańa býynyn tárbıeleý úshin barlyq jaǵdaı jasalǵan. Talaı talanttyń joly ashylyp, sheberligi shyńdala tústi. Búginde ýnıversıtet túlekteri álemdik deńgeıdegi óner saıystarynda júldeli oryndardan kórinip júr. Máselen, ánshi Dımash Qudaıbergen Qytaıdyń «I am a singer» baıqaýyna qatysyp, talantymen álemdi tańǵaldyrdy. Sonymen qatar ýnıversıtet stýdentteri bedeldi halyqaralyq konkýrstarda top jardy. Olardyń qatarynda P.Chaıkovskıı atyndaǵy jastar konkýrsynyń, «Shabyt» halyqaralyq konkýrsynyń, «Slavıan bazary» halyqaralyq án festıvali sekildi óner baıqaýynyń júldegerleri bar.
Abaı ASANKELDIULY,
«Egemen Qazaqstan»
