Qazaqstandaǵy medısına mekemelerine Koreıanyń densaýlyq saqtaý júıesin transfertteý arqyly Qazaqstan densaýlyq saqtaý júıesiniń básekege qabilettiligin kóterýge arnalǵan basqosýǵa kelgen BUU-nyń segizinshi bas hatshysy Pan Gı Mýndy ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov qarsy aldy.
Jalpy, Koreıa Respýblıkasymen aradaǵy strategııalyq áriptestik bilim, densaýlyq, ǵylymı-ınnovasııalyq jáne qaıyrymdylyq qyzmeti baǵytynda keńinen damyp keledi. «Severance-kz» qorymen birge elimizde medısına qyzmetkerlerine arnalǵan sheberlik sabaqtary men biliktilik kóterý kýrstary uıymdastyrylyp, maman daıarlaýdyń halyqaralyq baǵdarlamasy engizildi. Ásirese Shyǵys Qazaqstan men Aqtóbe oblystarynda nátıjeli jumys júrgizgen ońtústikkoreıalyq mamandar tájirıbesin qazir ózge de óńirlerge taratý kózdelip otyr. Osy oraıda elimizdiń densaýlyq saqtaý júıesin sıfrlandyrýǵa ınnovasııalyq tehnologııalardy engizý maqsatynda birlesken ǵylymı-zertteý jumystary júrgizilip keledi.
Kezdesýde ál-Farabı atyndaǵy Qazaq ulttyq ýnıversıtetiniń negizinde Pan Gı Mýn atyndaǵy turaqty damý ınstıtýtyn ashý týraly memorandýmǵa qol qoıyldy.
– Osy memorandým arqyly Qazaqstannyń densaýlyq saqtaý deńgeıin arttyrýǵa kúsh jumsaıtyn bolamyz. Ál-Farabı atyndaǵy QazUÝ-da meniń esimimmen turaqty damý ortalyǵynyń ashylýy zor qurmet dep bilemin. Turaqty damý bastamasy alǵash ret BUU-da kóterilgen bolatyn. Negizgi maqsat – álemde beıbitshilikti saqtaý. Bul maqsatqa 2030 jyly jetýdi kózdep otyrmyz. Men Nursultan Nazarbaevtyń jetekshiligimen BUU-nyń barlyq bastamalary belsendilikpen júzege asyrylatynyna senemin. Atalǵan bastamalardy alǵa jyljytýda ál-Farabı atyndaǵy QazUÝ mańyzdy ról atqarady», dedi Pan Gı Mýn.
Ýnıversıtet rektory Ǵ.Mutanov halyqaralyq akademııalyq qoǵamǵa atalǵan ınstıtýttyń baǵyty men tujyrymdamasyn túsindirdi. Onyń aıtýynsha, adamzat órkenıeti úshin turaqty damý taqyryby óte ózekti. Onymen adam is-qımylynyń barlyq túri baılanysty. Máselen, azyq-túlik qaýipsizdigi, áskerı qaýipsizdik, tabıǵı resýrstardyń, jerdegi jáne sý astyndaǵy ómirdiń saqtalýy sııaqty máselelerdi jatqyzýǵa bolady.
«Qazir osy máselelerdiń sheshimi izdestirilýde. О́ıtkeni azyq-túliktiń, resýrstardyń jetispeýshiligin ótkerýdemiz, ekologııa buzyldy, naýqas adamdardyń sany artyp keledi. Osy qarqynmen kete bersek, ony retteı almaı qalamyz. Adamzat órkenıetiniń ári qaraı damýy belgili bir ýaqytpen shekteledi. Atalǵan máselemen barlyq jahandyq ınstıtýttar, tanymal ǵalymdar aınalysýda. Tipti 10, 20 nemese 100 jyldan keıingi adamzattyń tirshiligin anyqtaıtyn Rım klýby bar. Munyń bárin basqarýsyz jiberýge bolmaıdy», dedi Ǵ.Mutanov.
Sondyqtan bul ınstıtýt halyqaralyq deńgeıde jumys isteıdi. Ony Pan Gı Mýnnyń tóraǵalyǵyndaǵy keńes basqarady. Instıtýt qyzmetine tanymal ǵalymdar qatysatyn bolady. Alaıda negizgi salmaq ýnıversıtet qyzmetkerleri men magıstranttaryna túspek. Olar sheteldik áriptesterimen birge naqty jobalardy júzege asyrady.
Dýman ANASh,
«Egemen Qazaqstan»
