Federasııanyń resmı saıty taratqan málimet boıynsha, álem chempıonatyn Qazaqstan qabyldaıtyndyǵy týraly Kopengagende (Danııa) shaıbaly hokkeıdiń jyldyq halyqaralyq kongresinde belgili bolǵan. «2019 jyly álem birinshiliginde erler arasynda A tobynyń dıvızıonyn qabyldaýǵa Qazaqstan men Slovenııa usynys tastady. Daýys berýdiń nátıjesi boıynsha Qazaqstan jeńiske jetti! Qazaqstannyń hokkeı tarıhynda tuńǵysh ret álem birinshiligin qabyldaıdy», delingen federasııanyń resmı habarlamasynda.
Hokkeıden álem chempıonatynyń 2020 jylǵy elıtalyq dıvızıonynda oınaý úshin A tobynyń quramalary Astanadaǵy «Barys Arenada» 2019 jyldyń 29 sáýir men 5 mamyr aralyǵynda synǵa túsedi. Onda Qazaqstan, Belarýs, Ońtústik Koreıa, Vengrııa, Slovenııa jáne Lıtva quramalary qatysady.
Qazaqstan quramasy eki jyl qatarynan birinshi dıvızıonnan elıtalyq álem birinshiligine óte almaı keledi. Sońǵy ret otandastarymyz elıtalyq dıvızıonda 2015 jyl oınaǵan-dy.
Álı BITО́RE,
«Egemen Qazaqstan»
