Qazaq mýzyka óneriniń has juldyzy Roza Rymbaevanyń «Batyrhan óz ónerimen álemge qazaq halqyn tanytty. Ol bizdiń shetelderdegi tólqujatymyz edi» degeni kóp jaıdy ańǵartsa kerek.
Qyzylordada Batyrhan Shókenov atyndaǵy «Otan-Ana» II respýblıkalyq ánshiler konkýrsynyń aldynda ótken baspasóz konferensııasynda ataqty ánshi jaıynda biraz máseleler aıtyldy.
Saǵynaı Abdýllın «Araı» ansambline Batyrhannyń qalaı qabyldaǵany jaıynda estelik aıtty.
– Ol tek talantty ánshi, kompozıtor, kásibı saksafonshy ǵana emes jany sulý, adamdarǵa nuryn shashyp júretin azamat bolatyn. Ondaı kisiler bizdiń ortada óte sırek. Batyrdy biz ǵana emes, TMD elderi, shetel jaqsy kóredi. Ánderin súıip oryndaıdy.
Osyndaı birtýar azamatqa Qyzylorda oblysynyń ákimdigi qoldaý kórsetip eskertkish qoıǵanyna keremetteı qýanyp otyrmyz.
B.Shókenov atyndaǵy qordyń dırektory, mýzykant Oljas Baıqanov Batyrhannyń jańa albomyn qurastyrý baǵytynda jumys jasap jatqandyqtaryn aıtty. Budan buryn esh jerde oryndalmaǵan 11 jańa áni enipti. Máskeýde jınaqtalǵan án toptamasyna tek Qazaqstan ǵana emes, kóptegen elderdiń mamandary eńbek sińiripti. Batyr rýhyna qurmet úshin.
Batyrhan Shókenovpen tyǵyz jumys jasaǵan kompozıtor Rınat Ǵaısın de ánshiniń biraz ánderin óńdep jatqandyǵyn jetkizdi.
– Biz uzaq ýaqyt birlesip jumys istedik. Men Batyrǵa arnap birneshe án shyǵardym. Osy konkýrsta oǵan arnap jazǵan «Astana» áni oryndaldy. Endigi josparym – Pragaǵa baryp, stýdııa arhıvinde saqtaýly Batyrdyń birneshe ánin jańartyp, qaıtadan óńdeımin. Qandaı án ekenin ázirge aıtpaımyn, qupııa bolyp qala bersin, – dedi ol.
Al Batyrhan Shókenov atyndaǵy «Otan-Ana» II respýblıkalyq ánshiler konkýrsyna elimizdiń barlyq óńirleri men О́zbekstannan kelgen ánshini qosqanda úmitkerlerdiń uzyn sany 25-ke jetken. Konkýrs talaby boıynsha eki án aıtýǵa tıis bolǵan ánshiler birinshisin óz talǵamyna salsa, ekinshisinde Batyrhannyń repertýaryndaǵy shyǵarmalardy oryndady. Talapkerler estradalyq sımfonııalyq orkestrmen bend, djaz-bend stılindegi ánderdi jandy daýysta shyrqady.
Talaı konkýrstardy baıqap júrmiz ǵoı. Búginde álemdi ánimen terbep turǵan Dımash Qudaıbergen sııaqty has talanttarǵa eldegi baıqaýda «men osy áıel daýysty erkekterden qorqamyn» dep baǵa berip súrindirgen, qulaǵyn aıý basyp ketken kezdeısoq qazylar bul konkýrsta bolǵan joq.
Qazaqstanǵa eńbegi sińgen qaıratker Erjan Ábdirahmanov tóraǵa bolǵan qazylar quramynda elimizge belgili Saǵynaı Abdýllın, Dılnaz Ahmadıeva, Rınat Ǵaısın, Rústem Nurjigit, Oljas Baıqanov syndy óner qaıratkerleri endi.
Olar árbir ánshiniń tembri, daýys kúshi men artıstik qabiletin saralap ortaq sheshimge keldi.
– Bizdegi negizgi maqsat – Batyrhannyń ánderin jańartyp, shyqpaǵan ánderin óńdep, jastarǵa tyńdatý, – dedi kompozıtor, qazylar alqasynyń múshesi Rınat Ǵaısın. – Búgingi baıqaý – kásibı baıqaý. Tek qana ánderdi oryndaý emes, jalpy Batyrhan ánderiniń tarıhyn bilý, halyqqa jetkizý. Ol degen úlken eńbek. Batyrhan qaldyrǵan iz – óshpes iz. Qyzylordalyqtar bizdi qatty qýantty. О́ıtkeni marqumnyń týǵan ólkesinde mundaı baıqaý ótkizý shynymen myqtylyq, talanttyń baǵasyn bilý, asylymyzdy ardaqtaý.
Sonymen jıyrma bes júrekti qobaljytqan baıqaý da aıaqtaldy. Qazylar bas júldege ońtústikqazaqstandyq Erik Tólepovti laıyq dep tanydy. Al birinshi oryn qaraǵandylyq Gúlnar Kóshenovaǵa buıyrsa, ekinshi orynǵa Batys Qazaqstannan kelgen Aıymbek Sartyqov ıe boldy. Eki úshinshi oryndy qyzylordalyq Indıra Baıyrbaeva men astanalyq Kúlaıym Qaıyrbaeva bólisti.
Shókenovter otbasy daıyndaǵan arnaıy júlde almatylyq Syrymtaı Eńsenovke berildi.
– Batyr aǵamyz men úshin álemdik deńgeıdegi oryndaýshy, kompozıtordyń biri bolatyn. Ol kisini naǵyz mýzykanttar baǵalady, túsine aldy. Biraq kózi tirisinde kóptegen eńbekteri baǵalanbady. Qazaqstandaǵy mýzykanttar, jalpy ónerdi oqyp, biletin adamdardyń barlyǵy ol kisige taǵzym jasaıtyn. Ol kisini syılamaý, jaqsy kórmeý, ánderin súımeý múmkin emes. Batyrhan aǵanyń rýhyna men basymdy ıemin, – dedi baıqaý jeńimpazy Erik Tólenov.
Sol kúni konkýrs laýreattary men qazylar alqasyndaǵy ánshiler ortalyq alańdaǵy gala-konsertte óner kórsetti.
Kelesi kúni qala jurtshylyǵy men qonaqtar Batyrhan Shókenov atyndaǵy saıabaqta ornatylǵan ánshi eskertkishiniń ashylý saltanatyna qatysty.
Buǵan Batyrhan Shókenovtiń týǵan-týysy, dostary men jerlesterimen qatar ónerdegi jaqyn dosy Baıǵalı Serkebaev arnaıy keldi.
Eskertkishke Batyrhan Shókenovtiń «Otan-Ana» klıpindegi qolynda saksofon ustap turǵan beınesi alynǵan. Eskertkishtiń jalpy bıiktigi 3,6 metr, músinniń bıiktigi – 2,2 metr, materıaly – qola; tuǵyrdyń bıiktigi 1,6 metr.
– Baıqaýdy uıymdastyryp, eskertkishti ornatýǵa atsalysqan barlyq azamattarǵa úlken rahmet. Oblys ákimi Qyrymbek Kósherbaevqa analyq júregimnen alǵys aıtamyn. Batyrdyń ónerin baǵalap, onyń qurmetine saıabaqtyń atyn bergenderińizge de óte qýanyshtymyn, – dedi Batyrhan Shókenovtiń anasy Dılıara Shókenova, eskertkishtiń ashylý saltanatynda:
– Batyrhan Shókenovtiń ár áni – naǵyz hıt. Bir ǵana «Otan-Anasyn» alaıyq. Alǵashqy notasy oınalǵan sátten-aq, Altaı men Atyraý arasyndaǵy ulan-ǵaıyr dalany eriksiz kóz aldyńa ákeletin ánniń áseri erekshe emes pe? Elbasynyń ózi bir kezdesýde ánshige «Otan-Ana» – elimizdiń ekinshi Ánurany» degen eken. Mine, osyndaı talantty perzentine Syr eli máńgilik eskertkish ornatyp, iltıpatyn bildirip jatyr. Bul eskertkish onyń týǵan qalasynyń tórinde jarqyrap, kórkine kórik qosary sózsiz. Onyń ústine osy saıabaq Batyrhannyń esimimen atalyp, keleshekte jastardyń, ánshini qurmetteıtin turǵyndardyń jaqsy bir demalys ornyna aınalar dep senemiz. Syr boıynyń talantty uly, óner tarlany Batyrhan Shókenovtiń esimi qazaqstandyqtardyń júreginde máńgi saqtalady, – dedi oblys ákiminiń orynbasary Rýslan Rústemov.
Baspasóz konferensııasynda biz qazylar alqasynyń tóraǵasy, oblys ákiminiń keńesshisi Erjan Ábdirahmanovtan Batyrhannyń Amerıkadaǵy uly jaıly suraǵanbyz.
– Keledi, mindetti túrde keledi, – dedi ol. – Qazir ol oqýda. Ákesiniń týǵan topyraǵynan alys qaıda ketsin. Batyrdyń aǵaıyndarymen baılanysyp turady. Oblys basshysy Qyrymbek Eleýuly da bul jaıttan jaqsy habardar. «Elge kelgende týǵan jerin túgel aralatyńdar. Baıqońyr ǵarysh aılaǵyn kórsin. О́ziniń qazaq, myqty azamattyń uly ekendigin jadynan shyǵarmasyn» dep tapsyrma berdi.
Biz de bul habarǵa súısindik. Án ónerinde álemge tanylǵan Batyrdyń jalǵyz tuıaǵynyń tabany týǵan jerinen ajyramaýy kerek qoı.
Baqtııar TAIJAN,
«Egemen Qazaqstan»
Qyzylorda oblysy
