Aǵymdaǵy jyly UBT aldyn ala belgilengen 167 orynda ótedi. Onyń ishinde 48-i joǵary oqý ornynda, 3-eýi kolledjderde, 116-sy mektep bazasynda uıymdastyrylmaq. R.Álimqulovtyń aıtýynsha, bıylǵy UBT formatynda ózgeris joq. Iаǵnı byltyr qabyldanǵan jańa format negizinde ótedi. 2017 jyldyń 1 qańtaryndaǵy «Bilim týraly» zańyna engizilgen ózgeristerge sáıkes, mektep bitirýshilerge arnalǵan emtıhandar eki kezeńnen turady. Onyń biri qorytyndy attestattaý bolsa, ekinshisi – UBT.
– Bıyl UBT synaǵy on besinshi márte ótpek. 2004 jyldan beri UBT-ǵa 1 mln 600 myń adam qatysty. Jyl ótken saıyn testileý tehnologııasy jetildirilip keledi. Sońǵy eki jylda apellıasııaǵa berýshiler sany eki esege tómendedi. Aǵymdaǵy jyly suraqtardy jetildirý boıynsha birqatar jumys atqaryldy. Ásirese fýnksııalyq saýattylyq boıynsha test tapsyrmalary áldeqaıda jetildirile tústi, – dep atap ótti vıse-mınıstr A.Aımaǵambetov.
Bul tarapta R.Álimqulovtyń aıtýynsha, test suraqtarynyń 50 paıyzy jańartylǵan. Máselen, byltyr 40 myń suraq bolsa, bıyl 119 myń suraq bar. Onyń ishinde 3 myńdaı suraq aǵylshyn tilinde. Osy 119 myń suraqtyń 11 paıyzy fýnksııalyq saýattylyq boıynsha, al 37 paıyzy bir nemese birneshe durys jaýaptarǵa qurylǵan suraqtar bolyp keledi.
UBT-ǵa qatysýǵa ótinimderdi qabyldaý aǵymdaǵy jyldyń 10 naýryzynan 10 mamyryna deıin júrgiziledi. Al testileý ýaqyty bıylǵy 20 maýsymnan 1 shildege deıin ótkizilmek. Bıyl mektepti 146 myń túlek bitirse, olardyń basym bóligi UBT-ny qazaq tilinde tapsyrýǵa ótinim bergeni qýantady. UBT 5 pán boıynsha, atap aıtqanda 3 mindetti jáne tańdaǵan mamandyǵyna sáıkes 2 beıindi pán boıynsha ótedi.
Aıta keterligi, UBT baıqaýynda «Altyn belgi» ıeleriniń jınaǵan baly ózgelermen teń bolǵan jaǵdaıda ǵana basymdyqqa ıe bolady. Bıyl 7 myńǵa jýyq «Altyn belgi» ıeleri UBT-da baǵyn synamaq. Sondaı-aq UBT-ny aǵylshyn tilinde tapsyrýǵa bolady.
Byltyr aýdıtorııalardan tikeleı onlaın translıasııa júıesi engizilgeni belgili. Bul UBT-nyń ashyq, ádil ótýin qamtamasyz etedi. Byltyr onlaın kórsetilim 35 paıyzǵa qoldanylsa, bıyl sıfrlandyrý baǵdarlamasy aıasynda bul kórsetkish arta túspek. Ulttyq testileý ortalyǵynyń basshysy testileý kezinde «Memlekettik qupııa týraly» zańǵa sáıkes eshbir jaýap aldyn ala berilmeıtindikten ata-analar men talapkerlerdiń «testileý jaýaptary» retinde aldyn ala satatyn alaıaqtarǵa aldanbaýyn, tek óz bilimine senýi, berilgen ýaqytty tıimdi paıdalanýy kerektigin ótindi.
Sondaı-aq bıyl Elbasynyń bes áleýmettik bastamasy aıasynda qosymsha 20 myń grant bólindi. Onyń 11 myńy tehnıkalyq mamandyqtarǵa arnalǵandyqtan talapkerlerdiń basym bóligi fızıka men matematıka pánin tańdaýǵa qulshynys tanytyp otyr.
Dýman ANASh,
«Egemen Qazaqstan»
