Oblystyq Bilim basqarmasynyń basshysy Bátıma Daýymovanyń aıtýynsha, qazir lagerler balalardy qabyldaýǵa shuǵyl daıyndyq ústinde. Lagerlerdi syrlaý, tazalaý, aýyz sýyn, tamaq daıyndaý keshenin tekserý sekildi jumystar atqarylyp jatyr. Qostanaıdaǵy «Mereı», Arqalyqtaǵy «Stroıtel» jeke menshik lagerleri men ınternat uıymdary bazasyndaǵy lagerler balalardy qabyldaýǵa daıyn tur. Sala basshysy sonymen qatar Jitiqara jáne Lısakov qalalary men Qarabalyq, Áýlıekól aýdandaryndaǵy tórt demalys lagerine kúrdeli jóndeý jumystary kerektigin aıtty. Jitiqara men Lısakovtaǵy lagerlerdiń jobalyq-smetalyq qujattary daıyn ekendigi de aıtyldy.
Alaıda, qaıta jóndeýge ketetin qarjy kólemi oblys ákimi Arhımed Muhambetovti qanaǵattandyrmady. Lısakov qalasy demalys lagerin jóndeýge 377 mıllıon teńge bıýdjet qarjysyn bólmek.
«Mundaı qarjyǵa 200 oryndyq bala baqsha salýǵa bolady. Ol jyl on eki aı jumys isteıdi, al aınaldyrǵan 3 aıǵa jeter-jetpes ýaqyt jumys isteıtin lager úshin osynsha qarjyny shyǵyn etýge bola ma? Qurylysty barynsha arzandatyńdar. Smetalyq-jobalyq qujat qaıta qaralsyn», dedi Arhımed Begejanuly.
Lagerdi jóndeýge bólingen qarjynyń 50 paıyzy onyń fasadyn jasaýǵa eseptelgen. Sýburqaq salý josparlanǵan. Biraq óńir basshysy munyń barlyǵyn da arzandatýǵa bolatynyn qaıtalap eskertti. Qujat qaıta qaralatyn boldy.
Názıra JÁRIMBET,
«Egemen Qazaqstan»
Qostanaı
