IIM basshysy atap ótkendeı, jyl saıyn tabıǵı órt deńgeıi aıtarlyqtaı artyp keledi. Sonymen qatar, búginde óńirlerde orman jáne dala órtteriniń aldyn-alý sharalary bastaldy.
«Mamyr aıynyń sońyna deıin Tótenshe jaǵdaılar komıtetiniń órt sóndirý ınspeksııasy Aýyl sharýashylyǵy mınıstrligi men ákimdikterge qaraıtyn ulttyq parkterdi, tabıǵı qoryqtardy tekserýdi aıaqtaıdy. Balalar lagerlerin tekserýge de erekshe nazar aýdaryp otyrmyz», — dedi Q. Qasymov.
Orman-dala alqaptary men demalys oryndaryn kún saıyn patrýldeý qolǵa alynǵan. Osy maqsatta memlekettik órt baqylaý, orman sharýashylyǵy mekemeleri men jergilikti polısııa qyzmetkerlerinen turatyn mobıldi toptar qurylýda.
Qazirgi tańda shekaralas aımaqtarda birlese áreket etý máseleleri qaralyp jatyr. Osyǵan oraı, Reseı Federasııasynyń Tótenshe jaǵdaılar mınıstrliginiń kórshiles jatqan bes bólinisterimen taktıkalyq oqý-jattyǵýlar ótkizý josparlanǵan.
Ishki ister mınıstri, sondaı-aq, qosymsha pysyqtaýdy talap etetin birqatar máselelerdi atap ótti. Olardyń qatarynda — óńirlerdiń avtosısternalarmen az qamtylýy, tehnıkanyń eskirýi, memlekettik órtke qarsy qyzmet bólimsheleri joq eldi mekenderdiń bolýy.
Budan ózge, Q. Qasymov «Semeı ormany» rezervatyndaǵy keshegi órttiń saldaryn joıý barysy týraly habarlady. IIM basshysynyń aıtýynsha, Semeı mańyndaǵy qaraǵaı ormanynda 21 mamyrda saǵat 14.30-da órt shyqqan. О́rtti sóndirý kezinde 8 birlik tehnıka jáne tabıǵı rezervattan 79 adam tartylǵan. Sonymen qatar, qosymsha 244 adam men 55 birlik tehnıka tartylǵan. О́skemennen MI-8 tikushaǵy keldi. Saǵat 21:00-de jalpy kúshterdiń kómegimen órt tolyq sóndirildi.
«100 gektar orman órtke orandy, qazirgi kezde órt sóndirilgen, órttiń taralý qaýpi joq, tergeý toby órttiń paıda bolý sebepterin anyqtaý jumystaryn júrgizip jatyr», — dedi Q. Qasymov.
Sonymen qatar, Q. Qasymovtyń aıtýynsha, órttiń negizgi sebebi — adam faktory, belgilengen erejeler men sharalardy saqtamaý.
Shyǵys Qazaqstan oblysynyń ákimi D. Ahmetov, Aqtóbe oblysynyń ákimi B. Saparbaev, Jambyl oblysynyń ákimi A. Myrzahmetov, Soltústik Qazaqstan oblysynyń ákimi Q. Aqsaqalov, Pavlodar oblysy ákiminiń orynbasary U. Jazylbek óńirlerdegi orman jáne dala órtteriniń aldyn alý jáne olardy joıýǵa daıarlyq máseleleri jóninde baıandady.
Osy jyldyń órt qaýpi bar maýsymynda memlekettik orman ıelenýshilerdiń orman órtterin joıýǵa daıyndyǵy týraly aýyl sharýashylyǵy birinshi vıse-mınıstri A. Evnıev baıandady.
Elimizdiń memlekettik orman qorynyń (MOQ) jalpy kólemi 29,8 mln gektardy quraıdy. О́rt taralýynyń negizgi sebebi — orman mekemeleriniń álsiz materıaldyq-tehnıkalyq bazasy, sondaı-aq órt baqylaý munaralarynyń joqtyǵy.
2018 jyldyń órt qaýpi bar maýsymyna daıyndyq kezinde AShM ázirlik is-sharalarynyń keshenin ótkizdi.
QR aýmaǵynda orman jáne dala órtteriniń aldyn alý jáne joıý jónindegi is-sharalar jospary bekitildi, sondaı-aq oblystar ákimdikteriniń orman sharýashylyǵy qurylymdyq bólimsheleriniń, AShM tabıǵat qorǵaý mekemeleriniń jáne QR IIM Tótenshe jaǵdaılar komıtetiniń vedomstvolyq baǵynysty uıymdarynyń orman órtterimen kúres boıynsha ózara is-qımyl josparlary kelisildi.
A. Evnıevtiń aıtýynsha, 244 dana órt sóndirý avtomashınasy jóndelip, daıyndyq jaǵdaıyna keltirildi, sondaı-aq 460 dana dóńgelekti traktorlar paıdalanýǵa daıyn.
«Ǵarysh sapary» AQ–men birlesip orman órtteri men orman qory alqaptaryna ǵaryshtyq monıtorıng júrgizý máselesi pysyqtaldy.
«Orman órtterin ýaqytyly anyqtaý jáne joıý maqsatynda aǵymdaǵy jyly «Qazavıaormanqorǵaý» RMQK kúshimen respýblıkanyń segiz oblysynda 8,869 mln gektar alqapta nemese respýblıkanyń memlekettik orman qory aýmaǵynyń 30%-ynda avıasııamen qaraýyldaý júzege asyrylatyn bolady», — dedi A. Evnıev.
Ishki ister jáne aýyl sharýashylyǵy mınıstrlikteriniń esepterin qaraǵannan keıin, QR Premer-Mınıstri Baqytjan Saǵyntaev, bıyl Qazgıdromet boljamyna sáıkes respýblıkanyń keıbir óńirlerinde jaz mezgilinde aýa temperatýrasy normadan joǵary bolatynyn atap ótti. Bul jaǵdaılar elimizdiń orman jáne dala aımaqtarynda órt qaýipsizdigin qamtamasyz etý máselelerine kóbirek nazar aýdarýdy talap etedi.
Aýyl sharýashylyǵy mınıstrligine, Investısııalar jáne damý mınıstrligine oblystarynyń, Astana jáne Almaty qalalarynyń ákimdikterimen birlese otyryp, tabıǵatty qorǵaý jáne orman mekemeleriniń órtke qarsy tehnıkamen qamtamasyz etilý deńgeıin arttyrý sharalaryn qabyldaý tapsyryldy.
Ákimdikter men Ishki ister mınıstrligine balalar saýyqtyrý lagerleriniń, sanatorııler men demalys oryndarynyń órtke qarsy qaýipsizdik sharalaryna erekshe nazar aýdarý tapsyryldy.
Ishki ister mınıstrligi múddeli memlekettik jáne jergilikti atqarýshy organdarmen birlesip, orman jáne dala órtteriniń aldyn alý jáne olardy joıý jónindegi vedomstvoaralyq is-qımyl josparynyń sapaly oryndalýyn qamtamasyz etýi qajet.
Atalǵan másele boıynsha úılestirý jumystary Premer-Mınıstrdiń orynbasary – aýyl sharýashylyǵy mınıstri О́. Shókeevke tapsyryldy.
