Bilim berý uıymdarynda úshtildilikti engizý máseleleri boıynsha syndarly máselelerdi talqylaý jáne tájirıbe almasý maqsatynda uıymdastyrylǵan is-sharaǵa jalpy orta bilim berý uıymdarynyń basshylary, pán muǵalimderi, «О́rleý» BAUO» AQ fılıaldarynyń dırektorlary, PQ BAI kafedralarynyń oqytýshylary, Almaty qalasy Bilim basqarmasynyń ókilderi qatysty.
«О́rleý» BAUO» AQ fılıaly Almaty qalasy boıynsha PQ BAI dırektory, p.ǵ.d. R.A.Sadvakasova úsh tilde bilim berý jobasynda muǵalimniń kásibı quzyrettiligin jetildirýdiń mańyzdylyǵyna toqtaldy. «О́rleý» BAUO» AQ fılıaly Almaty qalasy boıynsha PQ BAI «Bilim berý úderisin psıhologııalyq-pedagogıkalyq jetekshilik etý» kafedrasynyń aǵa oqytýshysy, f.ǵ.k. A.Qonyrova osy baǵytta fılıal tarapynan júrgizilgen jumystarǵa keńinen toqtaldy.
Almaty qalasy bilim Basqarmasynyń jalpy orta bilim berý bóliminiń bas mamany Q.Abdımanapova Almaty qalasynyń 2015-2020 jj. jol kartasy aıasynda Almaty qalasynda úsh tildi bilim berýdi engizý úderisi týraly aıtyp ótti. Ol Almatyda 8-synyp oqýshylarynyń aǵylshyn tilinde jaratylystaný-matematıkalyq pánderdi ıgerýi boıynsha 27 pılottyq mektep jumys isteýdi bastap ketkenine erekshe toqtaldy.
Kóp tildi bilim berýge kóshý kezeńinde pedagogıkalyq ujymdy basqarý prosesi jóninde A. Rozybakıev atyndaǵy № 153 mektep-gımnazııasynyń dırektory Sh.Ýmarov, O. Jandosov atyndaǵy № 105 gımnazııa dırektory Á.Sandyqbaeva, № 34 gımnazııa dırektory Z.Beısembaeva úshtildi bilim berýdi engizý jaǵdaıynda semınarlar, koýchıngter arqyly muǵalimniń kásibı quzyrettiligin jetildirýdiń qyr-syryna toqtaldy.
«О́rleýdiń» Qaraǵandy oblysy boıynsha pedagogıkalyq qyzmetkerlerdiń biliktiligin arttyrý ınstıtýty dırektorynyń orynbasary M.Jetpısbaeva «CLIL baǵalaýdyń keıbir máseleleri» taqyrybyna baıandama jasady.
O. Jandosov atyndaǵy № 105 gımnazııanyń muǵalimi Iý.Paısov, «Mamandandyrylǵan «Bilim ınnovasııa» lıseı-ınternaty KMM bıologııa pániniń oqytýshysy J.Almaǵambetov, «Bilim ınnovasııa» lıseıi dırektorynyń orynbasary, magıstr Baıram Týrel, túrik tili pániniń oqytýshysy Ener Ýnal óz jumys tájirıbelerin usyndy.
Dóńgelek ústel otyz jeti baılanys jelisi boıynsha onlaın rejımde ótkizilip, muǵalimderdiń taqyrypqa qatysty pikirlerdi tyńdaýyna múmkindik jasaldy. Is-shara sońynda arnaıy sertıfıkattar tapsyryldy.
Elvıra SERIKQYZY,
«Egemen Qazaqstan»
ALMATY
