Alǵashqy taımda gol soǵylmasa da oıyn taǵdyryna áser etýi ábden yqtımal jaǵdaı oryn aldy. Birinshi taımnyń orta tusynan asqanda «Lıverpýl» komandasynyń shabýylshysy, APL-diń bıylǵy úzdik surmergeni atanǵan mysyrlyq Mohamed Salah jaraqat alyp, oıyndy erte aıaqtaýǵa májbúr boldy. Arada jeti mınýt ótkende «koroldik klýbtyń» qorǵaýshysy Danıel Karvahal da jaraqat alyp, oıyndy alań syrtynan tamashalady. Sheteldik BAQ ókilderiniń jazýynsha, Salahqa qaraǵanda Karvahaldyń jaraqaty tym aýyr. Ispanııalyq fýtbolshy Reseıde ótetin álem birinshiligine bara almaýy múmkin. «Salahtyń jaraqaty jeńil, eki aptadan soń qaıta óz qalpyna keledi», dep málimdedi Mysyr sport mınıstri Holıd Abdýlazız.
Ekinshi taım Madrıd ujymynyń dopqa ıelik etýimen bastaldy. Jyl saıyn Eýrododalardyń fınalynda oınap júrgen «Real» komandasynyń fýtbolshylary óz tájirıbelerin kórsetti. Oıynnyń 51-mınýtynda Benzema «Lıverpýl» klýbynyń germanııalyq qaqpashysy Lorıs Karıýstyń qateligin tıimdi paıdalanyp, oıyndaǵy esepti ashty. Jankúıerler ekinshi goldy kóp kútken joq. Aǵylshyn komandasy qaqpasyna ótkizip alǵan goldan 4 mınýttan keıin esepti teńestirip ketti. Buryshtamadan áýelete kótergen dopqa birinshi bolyp jetken Mane Navas qorǵaǵan qaqpadan sańylaý tapty.
Esep teńesken sol «Realdyń» bas jattyqtyrýshysy Zıdan mańyzdy qadam jasady. Matchtyń 61-shi mınýtynda Iskonyń ornyna Garet Beıldi shyǵaryp, óziniń kóregendigin taǵy bir márte dáleldedi. Alańǵa shyǵa salysymen alǵa qaraı lap qoıǵan Ýels quramasynyń shabýylshysy 64-mınýtta «Lıverpýl» qaqpasyna sheber oryndalǵan ádemi gol soǵyp, komandasyn esepte taǵy alǵa shyǵardy. Beıldiń qaıshylaı soqqan golyn búkil álem jankúıerleri osy maýsymnyń úzdik goly dep baǵa berip jatyr.
Beıl munymen toqtaǵan joq. Únemi shabýylǵa aralasyp, qaqpa mańynda qaýip tóndirgen ýelstik fýtbolshynyń gol soǵatyn birneshe múmkindigi boldy. Matchtyń 83-mınýtynda Beıl oıyndaǵy úshinshi, óziniń ekinshi golyn salyp, «Realǵa» mańyzdy jeńis syılady. Sonymen qatar ol Chempıondar lıgasynyń fınalynda qosalqy quramnan alańǵa shyǵyp, dýbl jasaǵan tarıhtaǵy tuńǵysh fýtbolshy atandy. Osylaısha, Chempıondar lıgasynyń fınaly Beıldiń benefısine aınaldy.
«Real» Chempıondar lıgasynda 13 márte jeńimpaz atandy. Bul rekord biraz ýaqytqa deıin buzyla qoımaıtyny anyq. Ekinshi orynda 7 kýbokpen «Mılan» komandasy keledi. Al «Barselona», «Bavarııa» jáne «Lıverpýl» klýbtary bes retten jeńimpaz atanǵan.
