Igi zańǵa izgi lebizder

Ybrash ESTAEV,
«I.Estaev» sharýa qojalyǵynyń jetekshisi:

– Elbasy qol qoıǵan «Qazaqstan Res­pýblıkasynyń keıbir zańnamalyq aktilerine kásipkerlik qyzmetti retteýdi jetildirý máseleleri boıynsha ózgerister men tolyqtyrýlar engizý týraly» zań bıznestiń damýyna kepil bolatyn tarıhı qujat der edim. Tolyp jatqan tekserýler, salyq tóleýdiń, nesıe alýdyń kúrdeliligi kásipkerlerdi aıaǵynan tozdyratyn, bıznestiń tusaýyndaı bolatyn.  Endi, mine,  sonyń barlyǵy yqshamdaldy, jeńildetildi. Sonymen qatar bul zań bıznestiń damýyna kese-kóldeneń turatyn sybaılas jemqorlyqqa da tusaý bolady. Mysaly, buryn jer alý úshin konkýrs habarlandyrýy aýdandyq, ne qalalyq gazetke shyqsa jaraı beretin.  Endi habarlandyrýlar oblystyq gazetterge shyǵady. Demek, konkýrsqa kóp kisi qatysady, básekelestik artady, jerdi alýda ashyqtyq, móldirlik bolady degen sóz.  Bul aýyl sharýashylyǵy salasynyń damýyna, adamdardyń ózin jumyspen qamtamasyz etýine jaqsy yqpal jasaıdy. 

Oleg SOI,
«Allıýr grýpp» kompanııalar tobynyń prezıdenti:

– Zań der ýaqytynda shyǵyp otyr. Bul qazaqstandyq bıznesti damytý úshin tereń zerttelgen, mol eńbektiń nátıjesi dep bilemin.  Munyń bıznesti kóptegen kedergilerden aryltaryna senemin. Mysaly, biz  kompanııada kóptegen, tipti keıbir jaǵdaılarda ózin ózi qaıtalaıtyn esep berýlerdi daıyndaý, kóshirý úshin  arnaıy qyzmet ornyn, maman ustaıtynbyz. Eger osyndaı  qaǵazbastylyqty kóbeıtetin 1600 esepti birinshi deńgeıde 600-ge qysqartsa, bizdiń de altyn ýaqytymyz mánsiz ketpeıdi, materıaldyq shyǵyn da, qarjy da únemdeletin bolady. 

Oleg DANILENKO,
«Agrofırma Dıevskaıa» JShS dırektory:

– Prezıdent jarııa túrde qol qoıyp otyrǵan zań elimizde jalpy bıznestiń da­mýy­na yqpal etedi. Ásirese aýyl sharýa­shy­ly­ǵyndaǵy kásipkerlikke mol jol ashary­na senimim mol. Aýyldaǵy eńbek adamy zańdy bile bermeıtini ras. Keıde bolma­shyǵa aıyppul tóleıdi, ol kásipti basta­ǵan­dardyń meselin qaıtaryp tastaıdy, óıtkeni júrgen-turǵannyń, ortalyqqa qatynaǵannyń barlyǵy da aýyldaǵylarǵa aqshalaı shyǵyn emes pe? 14 kodekske jáne 109 zańǵa 1000-ǵa jýyq túzetýler  engizý bul elimizdegi bıznes ahýaldy jaqsartý úshin jasalǵan iri reforma ekeni anyq. Shaǵyn jáne orta bıznestiń damýyna taǵy da ıgi qadam jasalyp otyr.