Keńestiń «Nur Otan» partııasynyń oblystyq fılıalynda ótken alǵashqy jıynynda Qaraǵandy oblysynyń ákimi Erlan Qoshanov jańadan qurylǵan uıymnyń maqsatyna toqtalyp, onyń aldynda turǵan mindetter jaıyn sóz etti.
– Osy jyldyń eń mańyzdy sharalarynyń biri «Prezıdenttiń bes áleýmettik bastamasy» atty halyqqa Úndeýi boldy. Ár bastama – bizdiń azamattardyń jaǵdaıyn jaqsartýǵa jasalatyn qadam, – dedi óńir basshysy. – Bul qujat shyqqan sátten bastap Elbasy «Nur Otan» partııasyna osy áleýmettik bastamalardyń oryndalý barysyn baqylaýdy tapsyrdy. Qazaqstan halqy Assambleıasynyń sessııasynda Prezıdent «Nur Otan» partııasy Assambleıanyń qatysýymen áleýmettik bastamalardyń júzege asyrylýyna qoǵamdyq baqylaý jasaıtynyn atap aıtty.
Búginde Qaraǵandy aımaqtyq keńesi jumysqa kirisken. Onyń tóraǵasy retinde oblystyq máslıhattyń depýtaty Serǵazy Ádekenov taǵaıyndaldy, hatshysy – «Nur Otan» partııasynyń oblystyq fılıaly saıası jumys bóliminiń meńgerýshisi Baǵyjan Sádirbekova. Keleshekte naqty baǵyttarmen aınalysatyn jumys toptary qurylatyn bolady.
Oblysta qazirdiń ózinde árbir áleýmettik bastamalardy júzege asyrý boıynsha daıyndyq jumystary júrgizilip jatyr. Shaǵyn nesıeleýge 2018 jyly aımaqta 5,7 mlrd teńge qarastyrylǵan. Stýdentter qaýymy arasynda jataqhanaǵa muqtajdardyń qajettilikteri anyqtalǵan – olardyń sany 2700 orynnan asady. Bıylǵy jyly kolledjderdiń jataqhanalaryna arnalyp úsh ǵımarat qaıta qalypqa keltiriledi. 2019 jyly 4 stýdenttik jataqhana salý josparlanyp otyr.
Qoǵamdyq keńes músheleri «Saryarqa» gaz qubyry magıstraliniń jobasyn da nazarǵa alǵan. Sebebi gaz qubyrynyń basym bóligi Qaraǵandy oblysy arqyly ótedi.
Gaz salasynyń ardageri Gennadıı Ovcharov «QaraǵandyOblGaz» mamandandyrylǵan kásipornyn qurýdy usyndy. Qaraǵandy oblysy kásipkerler qaýymdastyǵynyń prezıdenti Nıkolaı Abt gaz salasyna qajetti qurylǵylardy jasap shyǵara alatyn jergilikti zaýyttardyń múddelerin alǵa tartýǵa keńes berdi.
– Biz sózden iske kóship, jumysqa bilek sybana kirisýdi bastadyq dep aıtýǵa bolady. Bizdi aldymyzda qyrýar jumys kútip tur. Búgin de kóptegen jaqsy paıdaly usynystar jasaldy. Olardy júzege asyra bastaımyz. Qoǵamdyq keńes tek Elbasy bastamalarynyń oryndalýyn ǵana baqylap qoımaıdy. Eń bastysy – barlyq kúshterdi biriktirý jáne ár baǵyttaǵy jumystardyń oryndalýyna jaýapty qurylymdarǵa naqty kómek kórsetý, – dep qorytyndylady jıyndy oblys ákimi Erlan Qoshanov.
Qaırat ÁBILDA,
«Egemen Qazaqstan»
QARAǴANDY
