Baǵdarlamada aıtylǵandaı, qazaqstandyq qoǵamdy jańǵyrtýdyń birinshi talaby ulttyq kod pen óz mádenıetin saqtaý ekeni barshaǵa aıan. Tarıhı tájirıbe men eń ozyq ulttyq dástúrler jańǵyrý jolyndaǵy jetistikterdiń mańyzdy sharty bolyp sanalatyndyqtan, ol Qazaqstannyń zamanaýı mádenıeti aldynda da jaýapkershilikke ıe. Osyǵan oraı sharany uıymdastyrýshylar talaı jyl muraǵatta shań basyp jatsa da, keıin tynysy qaıta ashylyp, amerıkalyq jáne brıtandyq dokýmentalısterge erekshe áser etken, tamyry tereńnen syr tartatyn alǵashqy kınotýyndyny jaryqqa qaıta alyp shyǵyp, aǵylshyn kórermenderine jaqynyraq tanystyrýdy jón dep tapqan. Sebebi qazaq dalasynda túsirilgen týyndyǵa «álemde buryn-sońdy bolmaǵan biregeı derekti fılm» dep baǵa bergen de osy brıtandyq kıno ınstıtýtynyń mamandary bolatyn.
Fılmdi aǵylshyn kórermenderine tanystyrýdaǵy maqsat – Qazaqstannyń oń ımıdjin qalyptastyrýǵa áseri bar kıno men mýzyka salasyndaǵy otandyq avtorlardyń tańdaýly shyǵarmalarynyń mańyzyn arttyra túsý. Sol sebepti Eýropa tórindegi óner zalynda «Qazaqstan kameratasy» men «Túrkisib» fılmi qatar usynyldy. Toqsan jyl buryn Orta Azııa men Sibirdiń arasyn qosqan magıstraldyń salyný tarıhynan syr shertken «Túrkisib» fılmniń rejısseri Vıktor Týrın. Fılm tolyǵymen óńdelgennen keıin «Qazaqstan kameratasy» memlekettik kameralyq orkestri oryndaýshylarynyń súıemeldeýimen belgili kompozıtor Qýat Shildebaev oǵan arnap án jazdy. «Qazaqstan kameratasy» memlekettik kameralyq orkestriniń kórkemdik jetekshisi – Qazaqstannyń halyq ártisi Gaýhar Myrzabekova.
Londonda ótken sharaǵa Qazaqstan Respýblıkasynyń elshiligi, Ulybrıtanııadaǵy dıplomatııalyq korpýs, Brıtanııa kıno ınstıtýty, mýzyka qaıratkerleri, zııaly qaýym ókilderi, Londondaǵy qazaq dıasporasy, sarapshylar men BAQ ókilderi qatysty.
Aıgúl AHANBAIQYZY,
«Egemen Qazaqstan»
ALMATY
