«Bala daýysy Astana júreginde» merekelik baǵdarlamasynda elimizdiń túkpir-túkpirinen kelgen kishkentaı daryn ıeleri qazaq estradasynyń jaryq juldyzdary – Roza Rymbaeva, Maıra Muhamedqyzy, Marjan Arapbaeva, Jeńis Seıdollauly jáne «Alaý» tobymen birge óner kórsetti. Kórermender halyq ánderin, álemdik hıtterdi jáne avtorlyq shyǵarmalardy tyńdap, jańa horeografııalyq qoıylymdar men umytylmas keshtiń kýágeri boldy. Elordanyń sahnasynda shetelderdiń tanymal ártisteri óner kórsetti. Olardyń ishinde álemdik shoý baǵdarlamalaryn baǵyndyryp júrgen qyrǵyzstandyq «Tumar» bı toby, merekege arnap jańa án jazǵan, tanymal barabanshy Gagash, О́zbekstannyń kishkentaı juldyzy, YouTube jelisinde mıllıondaǵan kórermen jınap, talantymen tamsandyrǵan Jýrabek Jýraev bar.
«Bala daýysy-2018» baıqaýy tuńǵysh ret elordada ótip, saltanatty sharaǵa baıqaýdyń ıdeıa avtory Álııa Nursultanqyzy Nazarbaeva keldi. Al oqý jáne sport salasynda jetistikterge jetip júrgen astanalyq mektepterdiń 2 600 oqýshysy men muǵalimderi keremet keshtiń syıly qonaqtary boldy.
Saltanatty ashylý konsertinen keıin ónerpazdardy irikteý týry bastaldy.
Bul atalmysh baıqaýdyń úshinshi týry. Bıyl naýryzdyń 15-i men sáýirdiń 15-si aralyǵynda ótken qabyldaýda «Bala daýysy» uıymdastyrý komıtetine 8-12 jas aralyǵyndaǵy balalardan 3765 ótinim kelip túsip, baıqaý bastalǵaly bergi rekordtyq kórsetkishti kórsetipti. Aldyn ala qorytyndy boıynsha, irikteý týrdyń fınalyna 14 oblystan, Almaty jáne Astana qalalarynan 81 qatysýshy shaqyrylǵan. Olar Maıra Muhamedqyzy, Jeńis Seıdollauly jáne Áset Arystanbek syndy kásibı qazylardyń aldynda vokaldyq ónerlerin ǵana emes, bı jáne ártistik qabiletterin kórsetti. Sóıtip «Bala daýysy» juldyzdar úıine 81 baladan 19 jas talant shaqyrtý aldy. Endigi jerde olardy osy jyldyń qyrkúıek aıynda daıyndyǵy bastalatyn sýper-fınal kútýde. Balalar vokal, akterlik sheberlik, horeografııa, sóz óneri, sahna ónerinen sheberlik sabaqtaryn alady.
27 qazannan bastap 27 jeltoqsanǵa deıin telekórermender kishkentaı ártisterdiń ónerin tamashalap, óz súıiktilerine daýys beretin bolady. Sóıtip 2 aı ishinde telekórermender «Halyq súıiktisin» anyqtaıdy. Al 8 jeltoqsan kúni Astanadaǵy «Qazaqstan» Ortalyq konsert zalynda aýqymdy sýper-fınal ótedi. Tikeleı efırde qazylar «Bala daýysynyń» bıylǵy jeńimpazyn anyqtaıdy.
Ularbek NURǴALYMULY,
«Egemen Qazaqstan»
