Prezıdent Nursultan Nazarbaevtyń «Bolashaqqa baǵdar: rýhanı jańǵyrý» maqalasynda aıtylǵan «Týǵan jer» baǵdarlamasyn oryndaýdan týyndaǵan ıgi bastama ádebı baıqaýlardyń ortaq maqsatyna aınaldy. Elbasy onda: «Árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri bar. Osynyń bárin jas urpaq bilip ósýge tıis» dep atap kórsetken edi. Prezıdenttiń bul sózi bir ǵana jyldyń enshisindegi másele emes. Bul únemi atqaryla beretin izgi borysh, sondyqtan bul músháıra memlekettik tildiń qoldanylý aıasyn keńeıtý, til mádenıetin kóterý, kórkem ádebıetti nasıhattaý maqsatynda ótkizilgen-di. Taqyryptary da ár álýan boldy. Negizinen, Temirbek Júrgenovtiń saıası kózqarasyn, oqý-aǵartý jáne mádenıet salasyndaǵy jumystaryn, ádebı, pýblısıstıkalyq murasyn óleń arqyly urpaqqa nasıhattaý, tá-
ýelsiz Qazaqstannyń «Máńgilik el» ulttyq ıdeıasynan týyndaıtyn qazaq tarıhynda qaldyrǵan eren eńbegin jyrlaý, Temirbek Júrgenovtiń eńbekterinde kezdesetin rýhanı ulttyq muramyz ben eldik-erlik qundylyqtarymyzdy ulyqtaý, onyń repressııa qurbany bolǵanyn óleńge qosý arqyly, qazaq halqynyń basyna náýbet bop tóngen jyldardy urpaq sanasynda jańǵyrtý aqyndar men jazýshylarǵa ortaq ıdeıa retinde usynyldy.
Alash qaıratkeri Temirbek Júrgenovtiń rýhyna arnalǵan jyr músháırasy men proza baǵytyndaǵy baıqaýǵa 14 aqynnan 23 óleń, al 8 jazýshydan 9 shyǵarma kelip túsken bolatyn. Belgili qalamgerler qazylyq jasaǵan ádebı báıgeniń qortyndysy keshe saıası qurbandardy eske alý kúninde jarııalanyp, jeńimpazdarǵa júlde tabystaldy.
Respýblıkalyq aqyndar músháırasynyń III orny jáne 100 myń teńge sertıfıkat úsh aqyndy: Ibragım Bekmahanov, Shaǵyr Qaıyrbek jáne Ashat Aımaǵambetovti qýantty. Árqaısysy 150 myń teńge syılyq pen II oryndy Asylaı Nııazbaeva men Jetkergen Ábdireuly bólisti. Al I oryndy 200 myń teńge syıaqymen Tolybaı Abylaev ıelendi. Respýblıkalyq aqyndar músháırasynyń bas júldesi Qajı Serikjanǵa 300 myń teńge syıaqymen qosa tabystaldy.
Respýblıkalyq prozaıkter baıqaýynyń II orny Bekbolat Bekmuratulyna (150 myń teńge), I oryn jáne 200 myń teńge syıaqy «Temirbekti atqan jendet» áńgimesiniń avtory Ertaı Aıǵalıulyna berildi. «Temirshe» atty áńgime jazyp bas júldeniń ıegeri atanǵan belgili jazýshy Aıgúl Kemelbaevaǵa «Temirbek Júrgenov» qoǵamdyq qorynyń tóraǵasy, qazylar alqasynyń tóraǵasy Sapen Ańsatov 300 myń teńge syıaqy tabystady.
Aıgúl AHANBAIQYZY,
«Egemen Qazaqstan»
ALMATY
