China Daily-diń habarlaýynsha, kezdesýde Sı Szınpın Qazaqstanmen qarym-qatynasty nyǵaıtýdyń mańyzdylyǵyna erekshe nazar aýdarǵan. Sondaı-aq Prezıdentter «Bir jol – bir beldeý» jobasynyń tıimdiligin atap ótti.
О́z sózinde Sı Szınpın ekonomıka, saýda, energetıka jáne qarjy sekildi salalarda áriptestikti nyǵaıtyp, damý strategııasyn keńeıtýdiń qajettigine toqtalǵan. Qytaı eliniń basshysy bes jyl buryn Qazaqstanǵa memlekettik sapary kezinde Jibek joly ekonomıkalyq beldeýin qurý týraly usynys aıtqanyn eske salyp, jobanyń tabysty bolǵanyn jetkizdi.
Sonymen qatar China Daily-diń málimetine saı, Qytaı Prezıdenti Qytaı men Qazaqstan yntymaqtastyǵy búkil salalarda órkendep kele jatqanyn tilge tıek etip, kezdesýde eki el prezıdentteri birqatar mańyzdy qujattarǵa qol qoıǵan. Olardyń qatarynda qarjy, elektrondy saýda, keden máseleleri bar.
Elbasy Nursultan Nazarbaevtyń Qytaıǵa memlekettik saparyna oraı The Global Times gazeti «Bir jol – bir beldeý» bastamasyndaǵy Qazaqstannyń róline toqtalypty.
«Qytaımen 1700 kılometrden astam shekarany bólisip jatqan Qazaqstan ejelgi Jibek joly men zamanaýı «Bir jol – bir beldeý» baǵytynda erekshe mańyzǵa ıe», deıdi basylym.
The Global Times bastamanyń basym bóligi Qazaqstan aýmaǵynan ótetin bolǵandyqtan, elimizge ınvestısııa kóptep tartylatynyna toqtalǵan. Ásirese, munaı, tústi metall, ınfraqurylym, aýyl sharýashylyǵy sekildi salalarǵa aıtarlyqtaı kóńil bólinbek.
Basylymǵa suhbat bergen Qytaıdyń Áleýmettik ǵalymdar akademııasynyń zertteýshisi Iаang Sın eki el arasyndaǵy qarym-qatynastyń beriktigi Jibek joly ekonomıkalyq beldeýiniń turaqtylyǵyna kepil bolatynyn aıtady. Onyń paıymdaýynsha, Elbasynyń «Nurly jol» bastamasy eldegi ekonomıkany jańa satyǵa kóterip, «Bir jol – bir beldeý» jobasymen tıimdi ushtasady. Áıtse de, Iаang Sın Qazaqstan men Qytaıdyń áli de damyta túsetin salalary bar ekenin aıtyp otyr. Máselen, erkin saýda aımaǵyn qurý sekildi bastamalar aldaǵy ýaqytta kóterilýi tıis dep sanaıdy zertteýshi.
AKI press agenttigi Elbasy Nursultan Nazarbaevtyń Qytaıǵa memlekettik sapary barysynda birqatar mańyzdy máseleler talqylanǵanyn habarlady.
Qytaı Prezıdenti Sı Szınpınmen kezdesý barysynda Qazaqstan Prezıdenti ekijaqty qarym-qatynas joǵary deńgeıde damyp kele jatqanyn, 2012 jylǵy kezdesýden keıin 18 márte joǵary deńgeıli otyrystar ótkenin atap ótti.
«Biz osy ýaqyt aralyǵynda quny 67 mıllıard dollarlyq 127 ekijaqty qujatqa qol qoıdyq. Baılanysty odan ári damyta túsýimiz qajet. Ekijaqty saýda aınalymy 11 mıllıard dollarǵa jetip, 30 paıyzǵa deıin ósti. Qarym-qatynasymyzdy odan ári nyǵaıtýdyń múmkindikteri mol», dedi N.Nazarbaev.
AKI press agenttiginiń málimetine qaraǵanda, Sı Szınpın ortaq jobalardyń mańyzyna toqtalyp, Qazaqstanmen áriptestiktiń órkendep kele jatqanyn atap ótken.
«Qazaqstanmen birge adamzat úshin jarqyn bolashaq jasaýǵa talpynysymyzdy jalǵastyra beremiz. Qazaq-Qytaı dostyǵynyń órkendeýine úles qosýǵa ázirmin», dedi Sı Szınpın.
Kezdesý barysynda Qytaı tarapy Qazaqstannan tabıǵı aýyl sharýashylyǵy ónimderin ımporttaýǵa qyzyǵýshylyq tanytyp, munaı-gaz ındýstrııasy, zamanaýı tehnologııa men sıfrlandyrý, energetıka salalarynda ekijaqty áriptestikti tereńdetýge yqylasty ekenin jetkizdi.
Sholýdy daıyndaǵan
Abaı ASANKELDIULY,
«Egemen Qazaqstan»
