Al maýsym aıynda teatr ártisteri mektepterdiń bastaýysh synyp oqýshylary men balabaqsha tárbıelenýshilerin «Otpen oınama!» atty jańa ertegini kórýge shaqyrdy. Orys balalar jazýshysy E.Permıakovtyń balalarǵa arnalǵan shyǵarmasy negizinde qoıylǵan «Otpen oınama!» ertegisiniń taqyryby qaı ýaqytta bolsyn ózekti.
Teatr rejısseri Ádilet Aqanovtyń aıtýynsha, balalarǵa arnalǵan ár qoıylym erekshe. Qazaq ertegileriniń jelisi boıynsha qoıylǵan qoıylymdar balalardyń ulttyq-tanymdyq erekshelikterine, ana tilderinde jaqsy sóıleýlerine de áser eteri sózsiz. Osy joly tańdap alynǵan «Otpen oınama» ertegisiniń taqyryby – qaýipsizdik, tosyn qaýip-qaterdiń aldyn alý jaılaryna arnaldy. Maqsat – ot pen sýdyń qanshalyqty qaýipti ekenin sahnadan kórsetip, kishkentaılarǵa oı salý.
Ertegi bastalmas buryn balalar teatr foıesindegi oblystyq tótenshe jaǵdaılar jónindegi departamenti arnaıy daıyndaǵan kórmemen tanysady. Kórmede órt sóndirý tehnıkalary, qural-jabdyqtary men kıimderi qoıylǵan. Mamandar ár balany kórmege qoıylǵan zattarmen tanystyryp, olarǵa órtten saqtanýdyń erejeleri jazylǵan paraqshalardy úlestiredi.
– Jalpy, jaz mezgilinde órt qaýpi jıi kezdesedi. Osyǵan oraı biz oblystyq J.Aımaýytov, A.Chehov atyndaǵy drama teatrlarymen birlesip, balalarǵa arnalǵan ertegilerdi qoıýdy qolǵa aldyq. Maqsat – órt qaýipinen saq bolýǵa, sirińke tárizdi ot tutandyratyn zattarǵa jolamaýǵa, ata-analardy balalaryn jalǵyz qaldyrmaýǵa shaqyrý. Bıyl óńirde balalardyń qatysýymen órtke qatysty 3 oqıǵa tirkeldi, – deıdi órt qaýipsizdigin baqylaý jáne aldyn alý basqarmasy bastyǵynyń orynbasary Qaıyrgeldi Álimhan.
«Otpen oınama!» qoıylymyndaǵy rólderdi Erkejan Tóleýbek, Qobylandy Bolat, Nurserik Keńesbaev, Áıgerim Súleımenova syndy ártisteri somdaıdy. Ertegi maýsym aıynda da jalǵasady.
Farıda BYQAI,
«Egemen Qazaqstan»
PAVLODAR
