Oblys ákimi jarty jyl buryn ulttyq deńgeıdegi mundaı aýqymdy jobanyń mánin qazaqstandyqtardyń bári birdeı túsine bermegenin, alaıda az ýaqyttyń ishinde ol keń qoldaýǵa ıe bolǵanyn alǵa tartty.
«Búgingi kúni Qaraǵandy oblysynda baǵdarlamada bekitilgen barlyq alty arnaıy joba boıynsha belsendi jumys júrgizilip jatyr. Máselen, óńirde ártúrli 456 joba jasalǵan, olardyń jartysy qazirgi ýaqytta iske asyrylyp ta qoıǵan. Málimdelgen jobalardyń jalpy quny 13 mıllıard teńgenden astam somany quraıdy, onyń ishinde shamamen 5 mlrd teńge demeýshiler men mesenattar esebinen. Baǵdarlama sheńberinde Qaraǵandy oblysynda Azamattyq bastamalar kúni uıymdastyryldy, ol óńirimizdiń kez kelgen turǵynyna ómirdiń belgili bir salasyn qalaı jaqsartýǵa bolatyny týraly naqty usynystarmen kelýge múmkindik beredi. Bul aksııa qaraǵandylyqtardyń úlken qyzyǵýshylyǵyna ıe bolǵanyn aıta ketken jón. Oǵan qosa, taǵy bir qyzyqty joba ázirlenip jatyr. Ol: ıgi ister korporasııasy mobıldi qosymshasy, onyń kómegimen kez kelgen adam qalaýy boıynsha telefonnan naqty qaıyrymdylyq jobalaryna azdaǵan soma jibere alady», dedi ol.
Erlan Qoshanov óńir turǵyndary Prezıdenttiń «Týǵan jer» bastamasyn da nyq senimmen qabyldaǵanyn aıtty.
«Eń birinshi «Týǵan jer» baǵdarlamasyna toqtalǵym keledi. Árıne kimge bolsa da týǵan jer ol qasıetti de ardaqty uǵym. Sondyqtan týǵan jerdi kórkeıtý men damytýǵa qoldan kelgenshe laıyqty úles qosý árbir azamattyń paryzy dep túsinemin. Bizdiń halqymyzda «Týǵan jerge týyńdy tik» degen qanatty sóz bar. Qazaqstandyq patrıotızm, otanshyldyq degenniń ózi osy týǵan jerdi súıýden bastalady. Bizdiń óńirden shyqqan belgili kásipkerler men mesenattar týǵan jerin damytýǵa ózderiniń úlken qoldaýyn kórsetip kele jatyr. Olardyń qatysýymen qalalarda, aýdan ortalyqtarynda jáne aýyldarda tek bir jyldyń ishinde 76 áleýmettik nysan salynyp, jóndeýden ótti», dedi oblys ákimi.
Aımaq basshysynyń aıtýynsha, búgingi tańda Ulytaýdaǵy sakraldy nysandarǵa kirme joldar salý jumysy júrip jatyr.
«Ulytaý – bul ulylar joly, handar joly, ol bizdiń taǵdyr jolymyz. Elbasy biraz jyl buryn Ulytaý baýraıynda bergen suhbatynda «Ulytaý qazaq eliniń kóne zamannan beri tarıhı saıası kindigi» dep atap ótken bolatyn. Biz Ulytaýdy elimizge ǵana emes, álemge de tanytýdy josparlap otyrmyz. Sebebi Ulytaý álemdik deńgeıde óziniń bıik ornyn alýǵa laıyqty qazaqtyń injý-marjany. Ony tek qaraǵandylyqtarǵa ǵana emes, barsha qazaqstandyqtarmen álemge tanytýymyz qajet. О́ıtkeni Ulytaý bárine kórsetýge laıyqty tarıhı muralar óte kóp óńir. Ol úshin ne qajet? Eń birinshi óńirge damyǵan ınfraqurylym kerek. Sebebi Ulytaýdyń basty máselesi – Ulytaýdaǵy joldyń qashyqtyǵy jáne sol baratyn joldyń qıyndyǵy. Sondyqtan biz áýeli avtojoldardy jóndeýden bastadyq. Osy maqsatpen 5 mlrd teńgege jýyq qarjyǵa byltyr bastalǵan Qaraǵandy – Jezqazǵan avtojolyn jóndeýdi bıyl tolyq aıaqtaımyz. Eger byltyrlary bul jolmen júrip ótýdiń ýaqyty 7-8 saǵatty qurasa, qazir 4-5 saǵatta júrip ótýge bolady. Sol sııaqty bıyl Alasha han, Joshy han keseneleri men «Han ordasy», «Altyn shoqy» sııaqty tarıhı oryndarǵa aparatyn jalpy uzyndyǵy 100 shaqyrym joldardy jóndeý jumysy bastaldy. Oǵan bólingen qarjynyń kólemi 2,7 mlrd teńgeni quraıdy», dedi E.Qoshanov.
Raýan QAIDAR,
«Egemen Qazaqstan»
