Bıyl altynshy ret uıymdastyrylǵan Prezıdent kýbogy jarysy tartysty jekpe-jekter men sensasııaly jaǵdaılarǵa toly boldy. Sport keshenine jınalǵan boks jankúıerlerine de keregi osyndaı kezdesýler edi. Mysaly, Rıo Olımpıadasynyń 49 kılo salmaqtaǵy chempıony ári Vel Barker kýbogynyń ıegeri ózbekstandyq Hasonbaı Dýsmatov kópshilikke beımálim bolǵan úndistandyq jas boksshy Lalbıakkıma Nýtlaıden kútpegen jerden shırek fınalda jeńilip qaldy. Sóıtip Olımpıada chempıony eline júldesiz qaıtty.
Sonymen qatar qyzdar arasyndaǵy básekede álemniń eki dúrkin chempıony Nazym Qyzaıbaı jartylaı fınaldyq kezdesýde 19 jastaǵy japon qyzy Namıkı Sýkımıden jeńilip, úshinshi oryndy qanaǵat tutty. Al Rıo Olımpıadasynda kúmis júlde ıelengen otandasymyz Vasılıı Levıt jartylaı fınalda reseılik Sadam Magomedovten jeńildi. Osylaısha, týrnır basynda úzdik sanalǵan boksshylar fınalǵa jetpeı súrindi. Bul nátıjeler jarystyń joǵary deńgeıde ótkeni men kez kelgen salmaqta básekelestiktiń artyp turǵanyn bildirse kerek.
Fınaldyq kezdesýlerde erler arasyndaǵy 10 salmaqtyń toǵyzynda qazaq boksshylary baq synady. Tek 60 kıloda ǵana otandastarymyz altyn medal úshin ótetin básekege shyǵa almasa, 49 jáne 75 kılo salmaqta óz boksshylarymyz judyryqtasty. Negizi «qazaqtyń salmaǵy» sanalyp ketken 69 kıloda Abylaıhan Júsipov pen Aslanbek Shymbergenov ekeýi bas júldeni sarapqa salý kerek bolǵan. Alaıda Júsipov jaraqatyna baılanysty fınaldyq kezdesýge shyǵýdan bas tartyp, Shymbergenov jekpe-jek ótkizbeı-aq chempıon atandy. Bálkim, Júsipov Azııa oıyndary aldynda jaraqatyn asqyndyryp almaýdy oılaǵan bolsa kerek.
49 kılo salmaqta únemi Qazaqstan chempıonatynyń fınalynda jolyǵatyn aqmolalyq Temirtas Júsipov pen shymkenttik Jomart Erjannyń joly Prezıdent kýbogynda taǵy túıisti. Bul joly da alǵashqysynyń mereıi ústem boldy. Bul joly da dep jazǵanymyzdyń sebebi, el chempıonatynyń fınalynda únemi Júsipov jeńiske jetip júretin. 52 kıloda «arlandar» sapynda júrgen Ánýar Muzapparov fılıppındik Ladon Rogendi jeńse, 56 kılo salmaqtaǵy álem chempıony Qaırat Erálıev AQSh boksshysy Dıýk Rogannan kúshti ekenin kezekti ret dáleldedi. Erálıev byltyr Gambýrgte ótken álem chempıonatynyń fınalynda dál osy boksshyny jeńip, chempıon atanǵan-dy. 60 kıloda reseılik boksshy Gabıl Mamedov top jardy. Ol fınalda ózbek Shýnkor Abdýrasýlovtan basym tústi. Al 64 kıloda el chempıony Bekdáýlet Ibragımov jeńimpaz atansa, 75 kılo salmaqtaǵy Erik Áljanov pen Ábilhan Amanqul jekpe-jeginde sońǵysy jeńiske laıyqty ekenin kórsetti. 81 kıloda otandasymyz Bek Nurmaǵambet ózbek Bektemır Melıkýzıevpen kezdesip, tóreshiler sheshimi boıynsha jeńildi. Melıkýzıev osymen úshinshi qazaq boksshysyn jeńdi. 91 kıloda otandasymyz Abzal Quttybekov Levıtti jeńgen Sadam Magomedovten basym túsip, jerlesimizdiń esesin qaıtardy. Asa aýyr salmaqta el chempıony Qamshybek Qońqabaevqa bul týrnırde de teń keler qarsylas tabylmady.
Qyzdar arasyndaǵy básekede japonııalyq Namıkı Sýkımı (51 kg), qandasymyz Sánııa Sultanqyzy (57 kg) men Rımma Volosenko (60 kg) jáne shvesııalyq Lav Holgersson (75 kg) Prezıdent kýbogynyń jeńimpazdary atandy.
Jalpykomandalyq esep boıynsha, Qazaqstan quramasy 10 altyn, 6 kúmis jáne 12 qola medalǵa qol jetkizip, birinshi oryn ıelendi. 1 altyn, 2 kúmis, 4 qola medal enshilegen О́zbekstan ekinshi, 1 altyn, 2 kúmis, 2 qola júlde alǵan Reseı boksshylary úshinshi oryndarǵa taban tiredi.
Álı BITО́RE,
«Egemen Qazaqstan»
