Bapker Desham babynda
Sol jyldary quramanyń úzdigi jáne kapıtany bolǵan Dıde Desham qazirgi tańda Fransııa quramasynyń bas jattyqtyrýshy qyzmetinde eldiń bas komandasyn álem chempıonatyna bastap barady. Maqsat – 1998 jylǵy jetistikti qaıtalaý. Jalpy, Fransııa 2006 jyly Germanııada ótken dop dodasynda bas júldeni jeńip alýǵa bir taban jaqyn qaldy. Alaıda Zıdan bastaǵan quramaǵa fınalda sáttilik jetispedi. Fınaldaǵy Fransııa – Italııa matchy áli kúnge deıin jankúıerlerdiń esinde shyǵar. Dramaǵa toly kezdesýde Fransııa oıyn sońyndaǵy penaltı serııasynda ǵana jeńilip qalǵan edi. Sonymen qatar bul matchta Fransııa quramasynyń úzdigi Zınedın Zıdannyń qyzyl qaǵaz alyp, oıynnan qýylǵanyn jankúıerler áli umyta qoımaǵan bolýy kerek.
Fransııa quramasy álem chempıonatyndaǵy tuńǵysh júldesine 1958 jyly Shvesııada ótken ala dop alamanynda qol jetkizdi. Araǵa 28 jyl salyp, 1986 jyly Meksıkada ótken fýtbol toıynda úzdik úshtiktiń qatarynan kórindi. Bul álem chempıonatyna fransýzdar Eýropa chempıony retinde attanǵan bolatyn. Biraq jartylaı fınalda GFR quramasynan jeńilip, úshinshi oryn úshin ótken matchta Belgııa quramasynan basym túsken-di.
Jalpy, Fransııa álem chempıonatyna 1930 jyldan beri qatysyp keledi. Rettik san boıynsha bıyl 15-shi ret jahandyq dodaǵa qatysqaly tur. Sońǵy álem chempıonatynda fransýzdar shırek fınalǵa deıin jetip, jetinshi oryndy ıelendi.
Reseıge salynǵan dańǵyl jol
Fransııa quramasy 2018 jylǵy álem chempıonatyna irikteý kezeńinde esh qıyndyqsyz, artyq kúsh jumsamaı birinshiliktiń fınaldyq kezeńine joldama aldy. «Úsh jolaqty» eldiń qarsylastary Nıderland, Shvesııa, Belarýs, Lıýksembýrg jáne Bolgarııa quramalary bolǵan edi. Eýropalyq kózqaras boıynsha, óte laıyqty jáne mańyzdy top sanalǵan-tyn. Dese de Bolgarııa men Nıderland quramalarynda qazir býyn almasý dáýiri júrip jatqan soń, nátıjeleri de kóńil kónshiterlik emes. Sondyqtan irikteý kezeńinde fransýzdardyń negizgi qarsylastary Shvesııa quramasy boldy. Jáne de irikteý matchtarynda Zlatan Ibragımovıchsiz qalǵan Shvesııa quramasynan syrt alańdaǵy kezdesýde jeńilip qaldy.
Jalpy, irikteý básekesinde «A» tobynda synǵa túsken Fransııa 10 matchtyń jeteýinde jeńiske jetip, ekeýinde teń oınady. Bul nátıje fransýzdardy álem chempıonatyna barý úshin tolyq qanaǵattandyratyn edi. Olıve Jırý men Antýan Grızmann komandanyń úzdik shabýylshylary atandy. Ekeýi tórt goldan saldy. Fransııa quramasy az gol soqqanyn eskersek (17 gol), qalǵan kúshti álem chempıonatyna saqtap qalǵan sııaqty.
Toptyq kezeńdegi tartys
Fransııa quramasy álem chempıonatynyń toptyq kezeńinde Danııa, Perý jáne Aýstralııa quramalarymen synǵa túsedi. Fýtbol mamandarynyń boljaýynsha, Deshamnyń shákirtteri qarsylastaryn esh qıyndyqsyz jeńip, topta birinshi oryn ıelenedi. Al pleı-off kezeńinde fransýzdarǵa ońaıǵa soqpaıyn dep tur. Fransııa jartylaı fınalǵa shyǵar bolsa, olar Neımar bastaǵan álemniń bes dúrkin chempıondary Brazılııa quramasymen kezdesýi yqtımal. Eger Fransııa quramasy brazılııalyq fýtbolshylardy jeńetin bolsa, araǵa 20 jyl salyp qaıta chempıondyq kýbokty ıelenýi ábden múmkin.
Fransııa quramasynyń tizimi
• qaqpashylar: Ýgo Lorıs («Tottenhem», Anglııa), Stıv Mandanda («Marsel»), Alfons Areola (PSJ).
• qorǵaýshylar: Rafael Varan («Real», Ispanııa), Adıl Ramı («Marsel»), Samıýel Ýmtıtı («Barselona», Ispanııa), Presnel Kımpembe (PSJ), Djıbrıl Sıdıbe («Monako»), Benjamen Pavar («Shtýtgart», Germanııa), Benjamen Mendı («Manchester Sıtı», Anglııa), Lıýka Ernandes («Atletıko», Ispanııa),
• jartylaı qorǵaýshylar: Pol Pogba («MIý», Anglııa), N’Golo Kante («Chelsı», Anglııa), Blez Matıýıdı («Iýventýs», Italııa), Korenten Tolısso («Bavarııa», Germanııa), Stıven N’Zonzı («Sevılıa», Ispanııa), Ýsman Dembele («Barselona», Ispanııa), Florıan Toven («Marsel»), Toma Lemar («Monako»), Nabıl Fekır («Lıon»).
• shabýylshylar: Antýan Grızmann («Atletıko», Ispanııa), Olıve Jırý («Chelsı», Anglııa), Kılıan Mbappe (PSJ).
Álı BITО́RE,
«Egemen Qazaqstan»
