Zań jobasy qarjy-qarajat salasynda kórsetiletin qyzmetter boıynsha tutynýshylar quqyqtaryn qorǵaýdyń tıimdi tetikterin qalyptastyrýǵa, qor naryǵyn damytýǵa jaǵdaı jasaýǵa, qoldanystaǵy zańnamany jetildirýge jáne halyqaralyq tájirıbege sáıkes keltirýge baǵyttalǵan.
Onlaın saqtandyrýdy engizý eń mańyzdy jańalyqtardyń biri bolyp tabylady. Saqtandyrý salasyn sıfrlandyrý halyqtyń keńsege kelmeı-aq, saqtandyrý kompanııalarynyń ınternet-resýrstary arqyly elektrondy túrde shart jasasýǵa múmkindik beredi. Keleshekte deldaldardyń bolmaýy saqtandyrý qunyn tómendetýge ákeledi.
Shetelge shyǵatyn qazaqstandyq týrısterdi qorǵaý úshin olardyń saqtandyrý kesteleri ózgertiletin bolady. Týrısterdiń múlik jónindegi múddelerin mindetti saqtandyrýǵa kóshirý qarastyrylyp otyr. Týroperatorlar týrıstik qyzmetti mindetti saqtandyrý jóninde shart jasasýǵa mindetti, bul rette saqtandyrý uıymyn tańdaý quqyǵy eskeriletin bolady. Saqtandyrýǵa jatatyn oqıǵalar bolǵan jaǵdaıda saqtandyrylatyn jaǵdaılar men shyǵyndar kólemi anyqtalady.
Zań jobasynda saqtandyrýdyń jańa túrlerin – saqtandyrý júktemesin engizý qarastyrylǵan. Saqtandyrý ombýdsmeniniń ókilettikteri keńeıip keledi. Halyq pen bızneske arnalǵan saqtandyrý qyzmetteriniń qoljetimdiligi men qunyn tómendetýdi qamtamasyz etý úshin birqatar shekteý sharalary engizildi.
Qujatta Saqtandyrý tólemderine kepildik berý qoryna qosymsha kepildikter belgilendi. Avtokólik ıeleriniń azamattyq-quqyqtyq jaýapkershiligin mindetti saqtandyrýdyń aıasynda saqtandyrylǵan oqıǵalar sanyna qaramastan, saqtandyrý polısin bir jyl ishinde úzdiksiz qoldanýdy qamtamasyz etý qaǵıdasy etiledi. Sondaı-aq, jábirlenýshiniń ómiri men densaýlyǵyna keltirilgen zııan úshin saqtandyrýshynyń jaýapkershilik aýqymy ulǵaıtyldy. Odan basqa, jobada qor naryǵynyń ınfraqurylymyn jaqsartýǵa baǵyttalǵan erejeler de bar.
Zań jobasy Palatanyń qaraýyna jiberildi.
