Ysyq
Bozsalqyn balanyń qanynda jatqan óleńdeı,
Bozkúlgin betti arýdy ińkár qyp turǵan denemdeı,
Saýsaǵymnyń ushy kúp-kúlgin,
Kún munda shyǵady degendeı.
Kirlep tur ıegi, átteń, anaý bir maraldyń,
Áneý bir aqqý boıkúıezdenip ázer tarandy.
Jartastar áli úkishe tur ǵoı salpıyp,
Kesh jetkeni-aı tań degen sulý habardyń.
Anamdaı sergek oıanyp tańdy sıpalaı bastaımyn,
Shekeme qatyp bozqyraýlatty tastaı muń.
Qartaıdyq dedi búgin tań nege salbyrap,
Kúnniń qyzyl basyn endeshe balyqtyń aldyna tastaımyn.
Shortandar beter shýlady...
Qyzyl balyqtar basyn kep súıep tyńdady...
Kúnde dybys joq, tek ǵana ystyq júrek bar,
Táýligine turǵan bir qaǵyp....
Kókjıek
Eı, kókjıek,
Kózińdi móldir julqyǵan bulaq,
Kóz jasyń ketti jylqydaı qulap.
Qop-qońyr jas qoı, shirkin-aı, mynaý,
Qozǵalyp qaldy shyrpydaı suraq.
Qyp-qyzyl dala túlkideı qulap,
Jarq etti kókten kúrkireı shýaq.
Saýsaǵymdy sýǵa suqqylap qoıam,
Qara kóz kóldi kirpideı synap.
Qarala búrkit aqıyq pa edi,
Qalbalańdap júr tarıhqa enip.
Quzar shyńnyń ushyn mytady-aı kelip,
Borbas shyńdardy zaǵıyp kórip.
Túsinip munda qara kóz aspan,
Qushaǵynan kólge shaǵalany ashqan.
Keregege ilingen kóbelek qusap,
Tolqynǵa malynyp jaǵalaýda aspan.
Tolqynnyń ózin jarym ba deımin,
Shashalyp súıip aýyrdy-aý oıym.
Qara dóńder beıne ańyrǵan qoıym,
Dóń ústinde kókshil óleńge qarap
Qaqshıyp turar saǵynǵan moıyn.
Shabyt túni
Jıren ala jolbarys kisinegen,
Sol bir túni jylqyǵa aınalǵandaı.
Bul jolbarys bes-alty jas kishi menen,
Al, turqyna qaraǵaı oılanǵandaı.
Sol túni ol jylqysha buralańdap,
Quıryǵy da eppenen shashaqtaldy.
Kúmis jaldar moınynan syǵalańdap,
Paı, paı, qandaı rahat, jasap qaldy.
Sol túni onyń jonyna bala mindi,
Qarǵyp emes, ańqıyp mingen baıaý.
Qaıtsem deımin osy bir qaraǵymdy,
Ol bala emes, bir shýmaq óleń edi-aý júrgen jaıaý.
Al, jolbarys yshqynyp aıqaılaıdy,
Tarǵyl-tarǵyl denesi týlaqtanyp.
Ústindegi shoq bala tańǵalmaıdy,
Tek júgenin tartady yrǵap qalyp.
Sol bir túni jolbarys jińishkerip,
Jalǵyz tarmaq júndes bir óleń boldy.
Men de ózimdi sol túni tynysh kórip,
Bul tarmaqty júıkeme tereń kómdim.
Qabanbaıymnyń jupary
Baqbaqtaı jeti kún kelip ,
Dúrkirep turdy tolǵanyp.
Júregime basyn súıeı qalysyp birde bul,
Jarymnyń, tipti, sózderin sáýlege áketti ońǵaryp.
Daladan ıister tutanyp,
Jýsannyń túrli ájesi eńkeıip maǵan taratar.
Saýytymnyń barlyq betteri ıissiz qap qansha jutadym,
Rıza bolǵan qoldarym ıisterge altyn sadaqtyń aıshyqty oǵyn dál atar.
Iisterge atam jebemdi,
Rıza bolǵan kúıim bul!
Túrli-túrli jupardyń bárisine buram denemdi,
Juparlar, bárińe rıza bolyp oq atam,
sendermen uqsas kıindir.
Oq túsken saıyn juparlar,
Saýsaǵyńnyń ısin, minekeı, alyp qaldyq dep tolǵandy.
Jupardyń tipti balalaryn da jutarma,
Barlyq saýsaǵy ashylyp ketken ormannyń.
Saýytym, tipti, rıza,
up-uqsas ıiske toıynyp,
Jaýlardyń túrli oqtary ısime ketti qaqalyp.
Baqbaq daýysty aspannyń áni qoıylyp,
Atamyn oqpen kempirqosaqtyń byljyrap ketken maqalyn...
Saǵyndym ǵoı
Qulyptasym sekildi sýyq aspan,
Jon arqama tıgende,
Saǵyndym ǵoı!..
Jon arqama urylǵan qamshy jańbyr,
Jylaı salsa qaıtadan,
Saǵyndym ǵoı!..
Qara joldar qolyma domalap kep,
Seniń shashyńdy ıirse,
Saǵyndym ǵoı!..
Bólme ishinde esimiń qalyqtap kep,
Shyraq jaqqa umtylsa,
Saǵyndym ǵoı!..
Shańqan nurǵa kózimdi jypsıta ashyp,
Qabyrymnan oıanyp saǵyndym ǵoı!..
Dalalardyń bárin de talyqsytyp,
Saǵynysh bop shaıqalyp aýyrdym ǵoı!..
Saǵyndym ǵoı!..
Júregimdi unatpaı saǵyndym ǵoı!..
Bala mysyq
Aýylymda jaýǵan bala jańbyrdyń,
Súndetteldi-aý keseme kep tamshysy.
Syzdyqtatyp óte shyqsam,
Jol shetindegi aǵash ta,
maıda tilin qan-josa qyp shyǵardy.
Marhum anam jibıtindeı jańbyrǵa,
Qabiriniń ishin sıpaı bastady.
Týlaqtaı bop qatqan jasyń jańbyrda,
Dúr-dúr qaǵyp qaıta bastan týyldy.
Dúr-dúr qaqqan bulbuldar da shashyrap,
Sińbe atanǵan rýyna – Tamshynyń.
Men týǵanda qyzyl ókshem tas balǵadaı jańǵyryp,
Shekaranyń ura berdi-aý qazyǵyn.
Sen týǵanda aqqý qustar mamyq kóldi kımelep,
Qanatynan tarap súzip sý astyna dúnıeniń -
Symbatty bir jigit etip jiberipti jaryǵyn.
Tarǵyl qabat mysyqtaı bop keýdem aldyn qasynyp,
О́leńge erip joǵalǵan ǵoı núkte bop...
Tarǵyn sýlar shashyrasa betime,
Túkterinen esip alǵan óleńim -
Shala jansar jolbarys bop shirıdi.
Týlaqtaı kún kóktiń betin jubatyp,
Taǵy da sol jasyma kep silkindi.
Dala túgel aq qaraǵaı, shoshytyp...
Bala mysyq jańbyrdyń kóz jasyna úımelep –
túni boıy Álıhandy eske alǵanda,
Men sol túni uıyqtap shyǵyp ókindim!..
