«Bizdiń mınıstrlik áleýmettik-ekonomıkalyq saıasattyń úılestirýshisi retinde halyqtyń ál-aýqatyn jáne ómir sapasyn kóterý úshin ulttyq ekonomıkanyń tutastyǵy men tıimdiligin qamtamasyz etýde. О́tken jyly Mınıstrlik ekonomıkanyń turaqty ósýin qamtamasyz etýde «2050» Strategııasyn, 5 ınstıtýttyq reformany jáne Memleket basshysynyń tapsyrmalaryn iske asyrýdy jalǵastyrdy. Elimizdiń ekonomıkalyq damýy jańa jaǵdaıǵa beıimdelý kezeńinen ótti jáne ósýdiń ortasha álemdik qarqynyn anyqtap, 4 paıyzdy qurady», dedi mınıstr.
Ekonomıkadaǵy qurylymdyq ózgeristerge toqtalǵan T.Súleımenov ósýdiń 2/3 bóligi shıkizattyq emes salamen qamtamasyz etilgenin atady. «Inflıasııa deńgeıiniń 2015 jylǵy 13,6 paıyzdan 7,1 paıyzǵa deıingi báseńdeýine baılanysty qolaıly makroekonomıkalyq jaǵdaı ósýde negizgi ról atqardy. Sonymen qatar, strategııalyq qujattar men memlekettik baǵdarlamalardy iske asyrý oń áserin tıgizdi. Memlekettik baǵdarlamalarǵa jan-jaqty toqtalsaq, Indýstrııalandyrý kartasy boıynsha 2017 jyly 1,5 trln teńgege 120 joba iske qosyldy. Turaqty 10 myń jumys orny quryldy. «Nurly jol» sheńberinde 4 myń kılometrden astam avtomobıl joly rekonstrýksııalandy, tranzıttik konteınerlik tasymaldaýlar 30 paıyzǵa ulǵaıdy. Byltyrǵy jyly «Nurly jer» baǵdarlamasy bastaldy. Jalpy alǵanda, rekordtyq 11,2 mln sharshy metr turǵyn úı paıdalanýǵa berildi, 100 myńnan astam otbasy jańa turǵyn úı aldy», dep atap ótti Ulttyq ekonomıka mınıstri.
Baıandama barysynda Tımýr Súleımenov agroónerkásip keshenin damytýdyń memlekettik baǵdarlamasy boıynsha ótken jyly 851 kooperatıv qurylǵanyn jáne 132 myń tonnaǵa jýyq sút jáne 33 myń tonna jemis-kókónis ónimderi daıyndalǵanyn tilge tıek etti. «Bıznestiń jol kartasy sheńberinde 286 mlrd teńgege kredıtter arzandatylyp, kepildendirildi, 23 myń kásipker oqytyldy. Barlyǵy 192 myń nemese 2016 jylmen salystyrǵanda 10,3 paıyzǵa kóp bıznes sýbektisine qoldaý kórsetildi. Nátıjeli jumyspen qamtýdy jáne jappaı kásipkerlikti damytý baǵdarlamasynyń baǵyty boıynsha 500 myń azamatqa qoldaý kórsetildi, olardyń ishinde 315 myń adam turaqty jumys oryndaryna jumysqa turdy. 2017 jyly 50 mlrd teńgege 400 óndirýshi-eksporttaýshyny qoldaý sharalarymen qamtyǵan Ulttyq eksporttyq strategııa iske asyryla bastady. 2017 jyly halyqaralyq reıtıngtik agenttikterdiń Qazaqstannyń ınvestısııalyq senimdilik deńgeıin rastaýy jáne boljamnyń «Teristen» «Turaqtyǵa» jaqsarýy oń ózgeristerdiń kýási boldy», dedi vedomstvo basshysy.
Sonymen qatar ol 2018 jylǵy zertteý qorytyndylary boıynsha Álemdik básekege qabilettilik reıtınginde Qazaqstan 38-orynǵa ıe bolǵanyn, al Jahandyq básekege qabilettilik ındeksiniń reıtınginde 137 eldiń ishinde 57-orynǵa ornalasqanyn jetkizdi.
Ulttyq ekonomıka mınıstri esep berý kezdesýiniń sońynda mınıstrliktiń aldaǵy josparlaryna da toqtalyp, halyqtan kelip túsken suraqtarǵa jaýap berdi.
Raýan QAIDAR,
«Egemen Qazaqstan»
