Teńgeniń álsireýine qatysty ótken aptanyń sońynda Ulttyq bank tóraǵasy Danııar Aqyshevtiń túsinikteme bergenin aıta keteıik. Onyń aıtýynsha, halyqtyń shetelge demalysqa barý maýsymy suranystyń kóterilýine yqpal etken faktorlardyń biri deýge bolady. Qolma-qol aqshany teńgeden AQSh dollaryna aıyrbastaý osy mezgilde kóbeıedi. Teńgeniń baǵamyna keri áser etken basqa da sebepter bar.
– Damýshy naryqtardyń valıýtalaryna qatysty AQSh dollarynyń nyǵaıýy jáne AQSh-tyń Federaldyq Rezerviniń paıyzdyq mólsherlemeleriniń ulǵaıýy teńgeniń AQSh dollaryna baǵamynyń yqpal etken faktorlardyń biri bolyp tabylady, – dep túsindirdi D. Aqyshev.
Ol Qazaqstannyń negizgi saýda áriptesi – Reseıge salynǵan sanksııalar kapıtaldyń Reseıden áketilýin kúsheıtkendigin atap ótti. AQSh-tyń sanksııalary rýbl baǵamynyń álsireýine ákelip soqtyrdy, al bul teńge baǵamyn qalyptastyrý faktorlarynyń biri.
«Astana» HQO: Qytaı bankimen baılanys kúsheıdi
Taıaýda AHQO Basqarýshysy Qaırat Kelimbetov pen Qytaı Bankiniń atqarýshy vıse-prezıdenti Jen Desı Strategııalyq seriktestik týraly memorandýmǵa qol qoıdy.
Osy memorandým aıasynda taraptar joǵary sapaly servısti qamtamasyz etý jáne jańa bank ónimderin ázirleý úshin transshekaralyq bıznesti odan ári damytýdyń múmkindikterin birlesip zerdeleýge nıetti.
– Qytaı banki – álemdegi eń jetekshi qarjy ınstıtýttarynyń biri, sondyqtan onyń tájirıbesi AHQO-ny qarjy qyzmetteriniń óńirlik haby retinde qalyptastyrý úshin óte mańyzdy. Bank seriktesteriniń jahandyq jelisi AHQO-ǵa ozyq qarjy tehnologııalaryn tartýǵa kómektesedi, – dedi Q.Kelimbetov.
Jaqynda «Astana» HQO alańynda Qytaı memlekettik damý bankiniń (QMDB) resmı ókildiginiń ashylǵanyn aıta keteıik. Bul QMDB-nyń Ortalyq Azııadaǵy birinshi, al álemdegi jetinshi ókildigi ekenin aıta keteıik. Atalǵan banktiń ókildikteri bar London, Máskeý, Rıo-de-Janeıro syndy shaharlardyń sanatyna endi Astana da qosylyp otyr.
«Qara altyn» quny quldyraı bastady
Munaı baǵasy sońǵy alty aptanyń ishindegi eń tómengi deńgeıge quldyrap, Brent markaly 1 barrel – 74,1 $-ǵa teńesti.
Sarapshylardyń paıymdaýynsha, «qara altyn» qunynyń tómendeýine yqpal etken basty sebepterdiń biri – AQSh pen Qytaı arasyndaǵy saýda teketiresteriniń tolastamaýy. Investorlar OPEK-ke múshe- memleketter mınıstrleriniń otyrysynan qandaı nátıje kútip otyrǵany da baǵa saıasatyna áser etýde. Munaı eksporttaýshy memleketterdiń mınıstrleri osy otyrysta kómirsýtegin óndirý kólemine qatysty sheshim qabyldaýǵa tıis.
Daıyndaǵan
Arnur ASQAR,
«Egemen Qazaqstan»
