– Búgin biz úshin aıtýly kún. Buǵan deıin kishkentaı naýqastarymyz barlyq pán boıynsha palatalarynda bilim alyp kelse, endi osy synypta bilimderin jalǵastyryp qana qoımaı, bos ýaqyttaryn mándi ótkize alady. Sýret salý, konstrýktor quraý, aǵylshyn tilin úırený, doıby, shahmat úıirmeleri jumysyn bastaıdy. Bul balalardyń tezirek jazylyp, saýyǵyp ketýine oń áserin tıgizedi dep senemiz, – dedi ınnovasııalyq synyptyń tusaýkeserinde ortalyq dırektory Rıza Boranbaeva.
Innovasııalyq oqý bólmesi onkologııalyq dertke shaldyqqan balalarǵa arnalǵan. Ortalyqta búgingi kúni júzden astam bala em qabyldap jatyr.
Ǵylymı ortalyqtyń mundaı ıgilikke qol jetkizýine Samsung Electronics Central Eurasia kompanııasy qoldaý kórsetti. Búginge deıin kompanııa elimizdiń mektepterinde osy ispetti 13 smart synyp ashqan.
– Biz osyndaı oqý synyptarynyń onkologııalyq aýrýlarǵa shaldyqqan balalarǵa oń áseri tıetinin Reseıdegi Rogachev atyndaǵy onkologııa jáne gematologııa ortalyǵynan bildik. Balalardyń saýyǵyp ketýine septigimizdi tıgizý úshin em alatyn balalarǵa syıǵa tartýdy jón kórdik, – dedi Samsung Electronics Central Eurasia kompanııa ókili Berik Omarov.
Osy arada bul kásiporyn ótken jyly Ana men bala ulttyq ǵylymı ortalyǵyna dál osyndaı smart synypty syıǵa tartqanyn aıta ketý kerek.
Zamanaýı quraldarmen jabdyqtalǵan oqý synybynda balalar matematıka, tarıh, aǵylshyn tili sııaqty jalpy pándermen qatar, shyǵarmashylyqpen de aınalysa alady. Sondaı-aq mýzyka men ertegilerdiń kómegimen terapııa seanstary ótkiziledi. Ortalyqqa kelip dáris beretin muǵalimder sabaqtardy tıimdi jáne qyzyqty etip onlaın rejimde de júrgize alady. Onlaın túrinde ótetin sabaqtarǵa endi tósekke tańylǵan balalar da qatysa alady. Synyp úlken ınteraktıvti taqtamen, ekologııalyq taza jıhazdarmen qamtamasyz etilgen. Ishi zaman talabyna saı árlenip, bezendirilgen. Ortalyqta emdelýshi balalar sabaqtardy jańa oqý jylynan jańa formatta oqıtyn bolady. Sýret salý, konstrýktor quraý, aǵylshyn tilin úırený, doıby, shahmat úıirmelerin «HelpToday» qoǵamdyq uıymynyń 10-ǵa jýyq erikti ókilderi tegin júrgizetin bolady.
Aınash ESALI,
«Egemen Qazaqstan»
ALMATY
