Arqa ajary – «Astana» festıvali

Aıtýly sharaǵa oraı Mádenıet jáne sport mınıstrliginiń baspasóz orta­lyǵynda Qazaqstannyń eńbek si­ńir­gen qaıratkeri, «Qazaqkonsert» mem­le­kettik konserttik uıymynyń dırektory Jeńis Seıdollauly, Qazaqstan teatrlary assosıasııasynyń vıse-prezıdenti, M.Áýezov atyndaǵy Qazaq memlekettik akademııalyq drama teatry­nyń dırektory Ashat Maemırov, belgili 

teatr rejısseri Ionas Vaıtkýs (Lıtva) jáne «Piccolo di Milano» teatrynyń kór­kemdik jetekshisi Stefano De Lýka­nyń (Italııa) qatysýymen bas­pa­sóz máslıhaty ótip, festıval baǵ­dar­­l­amasy «Astana Musical» mem­le­ket­tik teatry repertýaryndaǵy Ǵ.Músi­re­povtiń áıgili «Qyz Jibek» etno-folklorlyq mıýzıklimen (rejısseri Ashat Maemırov) ashyldy.

– II Dúnıejúzilik «Astana» teatr festıvaliniń basty ereksheligi – Eýropa men Azııanyń teatr keńistigin biriktirý. Túrkitildes elderdiń ózderine tán festıvaldary bar. Sol sekildi taza eýropalyq teatr baıqaýlaryna da jıi qatynasyp júrmiz. Qytaı jaqta da Azııa elderiniń aıtýly festıvaldary uıym­dastyrylady. Elordamyzdyń 20 jyldyǵy qarsańynda osynaý álem­dik teatr mádenıeti keńistigin bir orta­lyq­ta toǵystyrǵymyz keldi. О́ziniń 20 jyldyq tarıhynda Astana tek saıası-ekonomıkalyq jaǵynan ǵana emes, sonymen birge mádenı turǵydan da álemdik deńgeıdegi úlken rýhanı or­ta­­lyqqa aınalyp kele jatyr. Onyń aı­qyn dáleli – elorda mádenıetiniń shyn mánindegi biregeı oqıǵasy osy II Dú­nıe­júzilik «Astana» teatr festıvali. Aı­týly óner dýmany teatr áleminiń myq­ty-myqty sahna maıtalmandaryn jınap otyr. Munyń ózin elimizdegi eń úlken óner oqıǵasy dep bilemin, – dedi baspasóz máslıhatynyń spıkeri, Qazaqstan teatrlary assosıasııasynyń vıse-prezıdenti Ashat Maemırov. 

Maýsym aıynyń 16-sy men 28-i aralyǵynda Qazaqstan teatrlarynan bólek, taǵy 12 memleket­ten kelgen álemdik teatr ujym­da­ry­nyń qatysýymen barlyǵy 18 qoıy­lym festıval aıasynda kórermen na­za­ryna usynylady. Atap aıtar bol­saq, olar: «Piccolo di Milano» teatry (Italııa), «1927» teatry (Ulyb­rı­tanııa), «Meno Fortas» (Lıtva), «Warszawa» (Polsha), Táýelsiz ınterna­sıonaldy «11» teatry (Germanııa), Sh.Rýstavelı atyndaǵy memlekettik akademııalyq teatry (Grýzııa), «Beıjiń halyqtyq kórkem teatry» (Qytaı), О́zbek ulttyq akademııalyq drama teatry (О́zbekstan), Lensovet atyndaǵy Sankt-Peterbýrg akademııalyq teatry, Máskeý gýbernııalyq teatry (Reseı), Sh.Termıchıkov atyndaǵy Shý oblystyq teatry, T.Abdýmomýnov atyndaǵy akademııalyq drama teatry (Qyrǵyzstan). Sondaı-aq otandyq teatrlardan: M.Áýezov atyndaǵy Qazaq memlekettik akademııalyq drama teatry, Q.Qýanyshbaev atyndaǵy Memlekettik akademııalyq qazaq mýzykalyq drama teatry, Ǵ.Músirepov atyndaǵy Qazaq memlekettik akademııalyq balalar men jasóspirimder teatry jáne «Astana Musical» teatry óner kórsetedi. Áıgili qoıylymdar «Qazaqstan» ortalyq konsert zalynda, Holl Energııa, Beıbitshilik jáne kelisim saraıynda, Q.Qýanyshbaev atyndaǵy memlekettik akademııalyq qazaq mýzykalyq drama teatrynda jáne M.Gorkıı atyndaǵy memlekettik akademııalyq orys drama teatrynda sahnalanady. Festıvalǵa KSRO Halyq ártisi, Qazaqstannyń Eńbek Eri Asanáli Áshimov (Qazaqstan), Ionas Vaıtkýs (Lıtva), Davıd Asatıanı (Fransııa), Beatrıs Pıkon-Vallen (Fransııa), Davıd Papava (Ulybrıtanııa) bastaǵan Eýropa men Azııanyń belgili teatr qaıratkerleri, teatrtanýshylar, teatr synshylary sarapshylyq etedi. Atalǵan is-sharanyń basty qonaǵy – Oskar syılyǵynyń ıegeri, dúnıe júzine belgili kıno jáne teatr aktrısasy Jıýlet Bınosh. 

Mádenıet jáne sport mınıs­tr­li­giniń qoldaýymen ótip jatqan aıtý­ly teatr merekesiniń negizgi uıym­das­­tyrýshylary «Qazaqkonsert» mem­­­le­­kettik konserttik uıymy jáne Qazaq­stan teatrlary assosıasııasy. Elor­danyń 20 jyldyq mereıtoıyna tartý retinde kórermenin serpiltken bas qalanyń basty óner oqıǵasy  

II Dúnıejúzilik «Astana» teatr festıvali eki apta boıy teatr jankúıerlerin esten ketpes rýhanı qýanyshqa keneltetini sózsiz. 

Nazerke JUMABAI, 
«Egemen Qazaqstan»