Osy oraıda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Taraz qalasynda oblystyq zaǵıp jáne kózi nashar kóretin azamattar kitaphanasynyń uıymdastyrýymen «Klassık-kompozıtor Yqylas Dúkenuly» atty basqosý ótti. Atalǵan kitaphana dırektory Aıgúl Orazqulova rýhanı jıyndy sóz sóılep ashyp, Yqylas muralarynyń mańyzdylyǵyna toqtala kele, qobyzshynyń jeti atasynan beri qaraı óner daryǵanyn aıtty.
Yqylas Dúkenuly qazaq tarıhynda qaıtalanbas qobyzshy retinde qalǵan tulǵa. Sonymen qatar Qorqyt baba jolyn jalǵastyrýshy kúıshiniń «Aqqý», «Jezkıik», «Qambar-Nazym», «Qasqyr», «Kertolǵaý» syndy kúıleri halyq arasyna keń taraǵan. Basqosýǵa jınalǵan kópshilik Yqylas murasyna erekshe yqylas tanytyp, qobyzshynyń kúıleri jóninde áńgime órbitti. Yqylastyń Dúısebaı, Túsipbaı jáne Aqynbaı atty uldarynyń bári de qobyzshy bolǵany týraly derek te qamtyldy. Al ataqty kúıshiniń qobyzy Aqynbaıdyń urpaqtarynda osy kúnge deıin saqtalyp, búginde oblystyq tarıhı-ólketaný mýzeıinde baǵa jetpes jádigerlerdiń qatarynda tur.
Basqosý barysynda oblystyq fılarmonııanyń ánshisi Raýan Ábilqasym Yqylas Dúkenulynyń «Erden» jáne «Aqqý» kúılerin tartsa, Janar О́ztemirova Nurǵısa Tilendıevtiń «Álqıssa» kúıin naqyshyna keltire oryndap berdi.
Hamıt ESAMAN,
«Egemen Qazaqstan»
Jambyl oblysy
