Budan keıin Astana qalasynyń ákimi Áset Isekeshev pen Qaraǵandy oblysynyń ákimi Erlan Qoshanov kenshiler astanasynda ótken «О́ńiraralyq yntymaqtastyq: Astana qalasy – Qaraǵandy oblysy» atty bıznes-forýmǵa qatysty.
Aımaqaralyq yntymaqtastyqty damytý máseleleri jan-jaqty sóz bolǵan jıynnyń saltanatty ashylýynda Qaraǵandy oblysynyń ákimi Erlan Qoshanov qonaqtardy Astananyń alda kele jatqan mereıtoıymen quttyqtady.
– Astananyń qurylysyna Qaraǵandy oblysy belsene qatysty. Búginde bizdiń kóptegen jerlesterimiz elordada jumys isteıdi. Jalpy, Astana men Qaraǵandy oblysynyń seriktestigi sátti bolyp otyr. Qaraǵandy oblysynyń ornalasqan jeri men ınfraqurylymy óte qolaıly. Bıyl Astana – Qaraǵandy avtobanynyń qurylysy aıaqtalady, bul bizdiń qalalarymyzdy odan ári jaqyndata túsedi, – dep atap ótti óńir basshysy.
Jalpy, alqaly jıynda «Smart-sıtı» qanatqaqty jobasy, densaýlyq saqtaý salasyndaǵy sıfrlandyrý, memleket-jekemenshik áriptestigi mehanızmin iske asyrý tájirıbesi, kooperasııa júıesi boıynsha óndiristik ónimderdi óndirý jáne jetkizý, elordanyń azyq-túlik beldeýiniń múmkindigin arttyrý jáne óńirdiń basqa da damý basymdyqtary negizgi áńgimege arqaý boldy. Qaraǵandy oblysynyń ákimi Erlan Qoshanov Smart City jobasyn iske asyrýda birlese jumys isteýdi usyndy. Onyń pikirinshe, aımaqaralyq yntymaqtastyqty týrızm, kásipkerlik jáne sandyq tehnologııalar salalarynda damytý kerek.
Qazirgi tańda Qaraǵandy oblysynyń aýyl sharýashylyǵy taýarlaryn óndirýshi eki myńnan astam kásiporyn elorda naryǵymen tyǵyz qarym-qatynas ornatqan. Byltyr olar Astana qalasyna 25 mıllıard teńgeniń ónimin jetkizgen eken. Al kelesi jyly bul kórsetkishtiń kólemin 40 paıyzǵa arttyrý josparlanypty.
Jıynda Astananyń ákimi elordanyń búgingi tynys-tirshiliginen mol maǵlumat berdi. Qazirgi tańda elimizdiń bas qalasynda shaǵyn jáne orta bıznestiń 100 myńnan astam sýbektileri jumys isteıdi eken. Olardyń ekonomıkalyq qurylymdaǵy úlesi 58%-dy quraıdy. Ýrbanızasııa men kóshi-qon úderisin bastan keship jatqan elordada halyq sany artyp, qurylys belsendi túrde júrgizilip jatyr. Jıyrma jyldyń ishinde Astanaǵa 8 trıllıon teńge ınvestısııa salynǵan. Ákimniń aıtýynsha, bıýdjetten bólingen 3 trıllıon teńge qarjy eki esege jýyq ótelgen. «Megapolıstiń qarqyndy damýy eńbek resýrsyn qajet etedi, kadrlarǵa degen suranys artady. Birqatar mamandyq ıeleriniń jetispeýshiligi seziledi. Mysaly, búginde avtobýs júrgizýshileri kerek. Aldaǵy bes jylda Astanada 150 myń jańa jumys ornyn ashý kózdelgen», – dedi Áset Isekeshev.
Forým aıasynda tórt birdeı memorandýmǵa qol qoıyldy. Atap aıtqanda, Astana qalasynyń ákimdigi men Qaraǵandy oblysynyń ákimdigi, «Astana Konvenshn Bıýrosy» JShS men Qaraǵandy oblysynyń kásipkerlik basqarmasy, «Astana Innovations» AQ pen Qaraǵandy oblysynyń aqparattandyrý, memlekettik qyzmetter kórsetý jáne muraǵattar basqarmasy, «Astana» ÁKK» UK» AQ pen «Saryarqa» ÁKK» UK» AQ arasynda ózara yntymaqtastyq týraly kelisimderge qol jetkizildi.
* * *
«Astana qalasynyń kúnderi» festıvaliniń aıasynda birqatar mádenı sharalar júzege asyryldy. Kenshilerdiń mádenıet saraıynda «Aq tilekpen, Astana!» atty kórme ótti. Onda elordadaǵy Táýelsizdik saraıynyń qorynan alynǵan qazaqstandyq óner sheberleriniń 60-qa jýyq týyndysy qoıylyp, jurt nazaryna usynyldy.
Kórmeden keıin qaraǵandylyq ónersúıer qaýym «Astanadan aq tilek!» atty aıta júrerlik konserttiń kýási boldy. Keshte Astana qalasynyń Memlekettik akademııalyq fılarmonııasynyń qazaq orkestri, «Shalqyma» halyq bıi jáne estradalyq bı ansamblderi, klassıkalyq jáne estradalyq vokal bóliminiń ánshi-solısteri óner kórsetip, kórermenge estetıkalyq lázzat syılady.
Qaırat ÁBILDA,
«Egemen Qazaqstan»
Qaraǵandy oblysy
