Tarıhy sonaý 1928 jyldan bastaý alatyn bilimniń qara shańyraǵy ǵasyrǵa jýyq kezeńde eki júz myńnan astam pedagog-ustazdar, úsh myńǵa jýyq ǵylymı kadrlar daıarlap, otandyq ǵylym, bilim men mádenıetin damytýǵa zor úles qosty. Bıylǵy jyly da dástúr boıynsha bilim ordasynda bolashaq pedagogtardyń taǵy bir legi úlken ómir jolyna joldama aldy.
Ýnıversıtette jańashyldyq pen ulttyq tárbıe ustanymdaryn basshylyqqa ala otyryp, bakalavrıat, magıstratýra, doktorantýra baǵdarlamalary negizinde mamandar daıarlanýda.
«Spartak» sport kesheninde ótken saltanatty shara bakalavr baǵdarlamasy boıynsha kúndizgi bólimdi támamdaǵan myńnan astam túlekter sherýimen bastaldy.
Túlekter merekesi ýnıversıtet rektory, professor Takır Balyqbaevtyń quttyqtaý sózimen bastaldy.
«Kezinde oqý ornynyń tuńǵysh rektory bolǵan memleket jáne qoǵam qaıratkeri Sanjar Asfendııarovtan, sol kezde Qazaqstan halyq aǵartý komıssary bolǵan Oraz Jandosovtan bastap Halel Dosmuhamedov, Ahmet Baıtursynov, Sáken Seıfýllın, Ilııas Qabylov, Báımen Almanov, Temirbek Júrgenov, Qudaıbergen Jubanov, Sársen Amanjolov, Álimhan Ermekov syndy ult zııalylary dáris oqyǵan aýdıtorııalarda bilim alǵan sizder óte baqytty urpaqsyzdar. Jyldan-jylǵa oqý ornymyzdyń áleýeti artyp keledi. Búginde ol ǵylymı, ǵylymı-pedagogıkalyq kadrlar jáne pedagogıkalyq bilim berý, ekonomıka jáne bıznes, quqyqtaný salalary boıynsha mamandar daıarlaıtyn kóp salaly bilim ordasy bolyp tabylatyny ózderińizge málim. Qazirgi tańda Abaı atyndaǵy QazUPÝ Shyǵys Eýropa men Ortalyq Azııanyń arnaýly ranjırleýindegi 30 elge qarasty 200 úzdik ýnıversıtettiń bel ortasynda tursa, 2018 jylǵy Ulttyq reıtıngi boıynsha pedagogıkalyq joǵary oqý oryndary arasynda kóshbasshy oqý orny, álemniń úzdik TOP-500 ýnıversıtetteriniń qataryna jáne QS World University Rankings reıtıngisine endi. Olaı bolsa osyndaı mártebeli oqý ornyn bitirgen sizderdiń ony maqtan etýge tolyq quqylaryńyz bar» dep atap ótken ýnıversıtet rektory túlekterge sát-sapar tiledi.
Kelesi kezekte sóz alǵan Almaty qalasy Máslıhatynyń depýtaty, ýnıversıtetimizdiń Baqylaý keńesiniń múshesi Kenjehan Matyjanov bilim ordasynyń myqty kadrlyq áleýeti men otandyq joǵary bilim júıesindegi ózindik ornyn atap ótti. Al ýnıversıtet túlegi Medeý aýdany ákiminiń orynbasary Ǵanı Maılybaevıgi árdaıym bilim ordasyn maqtan tutatyndyǵyn tilge tıek etti.
QazUPÝ-niń tárbıe jumysy jáne áleýmettik damý jónindegi prorektory, professor Janatbek Ishpekbaevtyń aıtýynsha, elimizdiń pedagogıka salasyna bilikti mamandar daıarlaýdyń kósh basynda turǵan bilim ordasyndaǵy dıplom tabystaý rásimi bıylǵy jylǵy túlekterge erekshe merekelik kóńil-kúı syılady. Sharaǵa qatysqan ata-analar men qonaqtar ýnıversıtet basshylyǵyna rızashylyǵyn bildirdi. «Jigitter» karteti, R.Ýaıys, E.Rahym syndy qazaq estradasynyń juldyzdary ásem ánmen, «Saltanat» memlekettik bı ansambli kóńildi bımen keshtiń sánin kirgizdi.
Elvıra Serikqyzy,
«Egemen Qazaqstan»
ALMATY
