Qazir «BI Group» qurylys holdıngi «Araı» saıabaǵyn abattandyryp, qaıta jóndeý jobasyn aıaqtaýǵa jaqyn qaldy. Tolyqtaı qaıta jasalǵan saıabaq araıly Astanadaǵy Jetisýdyń bir bólshegine uqsas keıipke enip, oblystyń kórikti jerin kózben kórgendeı áser beretin ortalyqqa aınalady. Ári saıabaqtyń ataýy da ózgerip, ol endigi jerde «Jetisý» demalys saıabaǵy dep atalady.
Aýmaǵy 15 gektar bolatyn saıabaqty jetildirý jobasy aıasynda tórt negizgi aımaqty qurý josparlanyp otyr. Birinshisi – tynysh, serýenge óte yńǵaıly bolmaq. Budan ári ortalyq alleıa aınalasynda balalardyń oıyn alańy men tamaqtaný aımaǵy, odan ári avtoturaq aımaǵy ornalasady. Sondaı-aq saıabaqta uzyndyǵy 1,5 shaqyrym bolatyn velosıpedshilerge arnalǵan aınalma jáne júgirý joldary bolady.
– Saıabaqta arka, kireberis qaqpa qoıylýda. Bas sýburqaq pen oblystyń sımvoly bar «Aport» alańy – taýlarǵa, pavılondar men kıiz úılerge aparatyn tóbeden turady. Aýmaǵyna ártúrli jastaǵy balalarǵa arnalǵan oıyn alańshalary kiretin Táńir alańy jasalady. Tańbaly tastyń jazbalary bar balbal tastar men Sharyn shatqaly paıda bolmaq jáne saıabaqta ashyq aspan astyndaǵy amfıteatr salynady, – deıdi joba menedjerleri.
Alańnyń ortasynda hosh ıisti shópter, gúlder, butalardan turatyn Qazaqstannyń kartasy bolady. Sonymen qatar saıabaqta 270 aǵash otyrǵyzylady, onyń kóbi jemis aǵashtary. Demek, astanalyqtar osy baqqa kelip Jetisý topyraǵynda ónip-ósetin túrli jemisterdiń dámin tatady. Saıabaq aýmaǵyn jaryqtandyrý da tolyqtaı júzege asady. Túngi tynyshtyqqa múlgigen demalys ornyn 380 arnaıy sham sáýlege bólep, samaladaı jarqyratpaq.
Jýyrda oblys ákimi Amandyq Batalov jumys saparymen Astana qalasyna barǵanynda «Araı» saıabaǵyn abattandyrý boıynsha atqarylyp jatqan jumystardyń qarqynymen tanysqan bolatyn. Búgingi kúni saıabaqta ornalas-
tyrylatyn barlyq kishi sáýlet nysandary quıylyp, ornatylýǵa ázir. Qazir 15 gektar alqapqa sozylǵan saıabaq aýmaǵynyń ár buryshynda josparlanǵan jumystar qarqyndy júrgizilýde. Nysandaǵy barlyq jóndeý jumystar osy maýsym aıynyń sońynda tolyq aıaqtalady.
– Bul saıabaq Almaty oblysynyń elordasy Astananyń 20 jyldyq mereıtoıyna jasaǵan syıy bolmaq. Astanaǵa qydyryp barǵan árbir jetisýlyq osy saıabaqta serýendep júrip, týǵan ólkesiniń tabıǵatyn kózben kórgendeı bolar degen oıdamyz. Osy úshin saıabaqtyń jańa kelbetin qalyptastyrý kezinde tanymal sáýletshilerdiń erekshe dızaın úlgileri tańdaldy, – deıdi oblys ákimi Amandyq Batalov.
Qalmahanbet MUQAMETQALI,
«Egemen Qazaqstan»
Almaty oblysy
