Mıssııa jetekshisi M.Hortonnyń aıtýynsha, búgingi kúni Qazaqstan ekonomıkasynda ósim baıqalady. Bıylǵy jylǵa jasalǵan boljam boıynsha ekonomıkalyq ósim 4 paıyz shamasynda bolmaq.
– Alaıda atalǵan kórsetkish odan da joǵary bolýy ábden múmkin. Shamamen − 4,5 paıyz. Al memlekettik organdar jasaǵan boljam biz kórsetken mejeden joǵary bolyp otyr. Oǵan basty sebep, eldegi júrgizilip otyrǵan reformalardyń sátti iske asýy, ekonomıkany ártaraptandyrýdyń jolǵa qoıylýy dep baǵamdaımyz. Buǵan qosa, ekinshi deńgeıli bankterdiń turaqtylyǵy men áleýetiniń joǵary bolýy, ekonomıkanyń negizgi qozǵaýshy kúshteriniń biri, – dedi M.Horton. Mıssııa jetekshisi jasaǵan boljamyna sáıkes, aldaǵy 4 jylda eldegi IJО́ 5,5 paıyzdy quraýy yqtımal. Ol úshin memleket basshylyǵy men Ulttyq bank qurylymdyq reformalardyń júıeli iske asýyn nazarǵa alýy tıis.
– 2000-2007 jyldary munaı resýrstary kóptep ashylyp, Astanaǵa tartylǵan ınvestısııa kólemi aıtarlyqtaı artyp, memlekettik ınvestısııanyń qarqyn alyp turǵan shaǵynda eldegi IJО́ úlesi 7,5 paıyzdy quraǵan edi. Bul kórsetkishke qaıta qol jetkizý úshin josparly túrde jumys júrgizý qajet dep esepteımin, – dedi mıssııa jetekshisi.
Onyń aıtýynsha, ósimniń artýyna salyq salasyndaǵy reformalardyń da oń yqpaly bar. Halyqaralyq valıýta qory jalaqysy tómen azamattardyń kiris salyǵyn tómendetý sııaqty sharalardy qoldaıtyndyǵyn bildirdi. Alaıda joǵary jalaqy alatyndardyń progressıvti mejesin kóterý arqyly jeńildik sharalaryna ketken qarajatty aqtap alýǵa bolatynyn aıtady. Al bilim men densaýlyq salasynda adam basyna qaraı qarjylandyrý tetigin engizýdiń nátıjesinde bıýdjettiń biraz qarajatyn únemdeýge múmkindik bar.
– Ulttyq bank óz jumysyn oıdaǵydaı atqaryp keledi. Inflıasııanyń deńgeıi 6 paıyzdyń aınalasynda. Atalǵan kórsetkishti tómendetý maqsatynda tıisti sharalar atqarylýda. Teńge baǵamy da aıtarlyqtaı ózgergen joq. Oǵan kóp jaǵdaıda munaı baǵasy men rýbldiń baǵamy áser etip otyr. Geosaıası faktorlardyń yqpaly da bar. Jalpy, búginde elde ekonomıkalyq ósim baıqalady. Endi Ulttyq bank pen memlekettik organdarǵa ekonomıkany qarjylandyrýdy azaıtý qajet dep sanaımyn. Bıznes birinshi orynǵa shyǵýy tıis. Oǵan taǵy bir-eki jyl kerek ekeni anyq. Menińshe, eldegi qolǵa alǵan bastamalar sońyna deıin sátti júzege asatyn bolsa, ekonomıkalyq ósimniń kórsetkishi artady, – dedi Halyqaralyq valıýta qory Qazaqstandaǵy mıssııasynyń basshysy.
Erkejan AITQAZY,
«Egemen Qazaqstan»
